ރައީސް ނަޝީދަށް އަމާޒުކޮށް ދިން ހަމަލާ ދުނިޔޭގެ މީޑިއާތަކުގެ ފަލަ ސުރުޚީއަށް
7 މެއި 2021 | ހުކުރު 08:09އެންމެ ފުރަތަމަ މި ޚަބަރު ކަވަރުކޮށްފައިވަނީ އަލްޖަޒީރާއިން
ރައީސް ނަޝީދު ގެކޮޅު ކައިރީ އެއްޗެއް ގޮއްވާލުން
ކުރީގެ ރައީސް މުހައްމަދު ނަޝީދަށް އަމާޒުކޮށް ބުރާސްފަތި ދުވަހުގެރޭ ދިން ނިރުބަވެރި ހަމަލާގެ ޚަބަރުތައް ދުނިޔޭގެ މީޑިއާތަކުން ކަވަރުކޮށްފިއެވެ.
ރައީސް ނަޝީދު، އެމަނިކުފާނު ދިރިއުޅުއްވާ ގ. ކެނެރީގެއިން ނުުކުމެވަޑައިގެން، މަޖީދީމަގުގައި ޕާކުކޮށްފައި އޮތް އެމަނިކުފާނުގެ ކާރުކޮޅަށް އަރާ ވަޑައިގަތުމަށްޓަކައި، ހިންގަވާފައި ވަޑައިގެން ކާރުކޮޅާ އަރާ ހަމަވިތަނުން އެއްޗެއް ގޮއްވާލައިގެން ދީފައިވާ މި ހަމަލާ ދުނިޔޭގެ ބޮޑެތި ގިނަ މީޑިއާތަކުގެ ސަމާލުކަން ހޯދިއެވެ.
މި ޚަބަރު އެންމެ ފުރަތަމަ ކަވަރު ކޮށްފައިވަނީ އަލްޖަޒީރާއިންނެވެ. އަލްޖަޒީރާއިން މި ޚަބަރު ގެނެސްދީފައިވަނީ ކުއްލި ޚަބަރެއްގެ ގޮތުގައެވެ.
ރޮއިޓާސްގެ އިތުރުން ދުނިޔޭގެ ބޮޑެތި މީޑިއާތަކުގެ ތެރޭގައި ހިމެނޭ ބީބީސީއިން ވެސް މިހަމަލާގެ ޚަބަރުތައް ރޭގެ އެކި ވަގުތުތަކުގައި ކަވަރު ކޮށްފައިވެއެވެ.
ސީއެންއެންއިން ވެސް މި ޚަބަރު ކަވަރުކޮށްފައިވާއިރު، އެންމެ ބޮޑު ކަވަރޭޖެއް ގެނެސްދީފައިވަނީ އިންޑިއާގެ ނޫސްތަކުން ކަން ފާހަގަކޮށްލެވެއެވެ. މިގޮތުން އިންޑިއާގެ އެންމެ ބޮޑެތި ނޫސްތައް ކަމަށްވާ ދަ ހިންދޫ އާއި، ޓައިމްސް އޮފް އިންޑިއާއިންނާއި އަދި މަޝްހޫރު ޓީވީ ޗެނަލް އެންޑީޓީވީން މި ޚަބަރު ވަރަށް ބޮޑަށް ކަވަރު ކޮށްފައިވެއެވެ. އަދި މީގެ އިތުރުން އަލް އަރަބިއްޔާ ނިއުސް ޗެނަލުން ވެސް މި ޚަބަރު ގެނެސްދީފައިވެއެވެ.
ސްރިލަންކާގެ ބައެއް މީޑިއާތަކުން ވެސް މި ޚަބަރަށް ވަރަށް ބޮޑު ސަމާލުކަމެއް ދިނެވެ.
މި ހަމަލާ ކުށްވެރިކޮށް ބައިނަލްއަގުވާމީ މަސްރަހުގައި ގިނަ އަދަދެއްގެ ބަޔަކު ޓުވީޓު ކޮށްފައިވާއިރު، މިހަމަލާ ކުށްވެރިކޮށް އަވައްޓެރި ބައެއް ގައުމުތަކުން ވެސް ވަނީ ނޫސް ބަޔާންތައް ނެރެފައެވެ.
ހަމަލާއަށް ފަހު ލިބުނު ޒަޚަމްތަކަށް އޭޑީކޭ ހޮސްޕިޓަލުގައި މިހާރުވެސް ގެންދަވަނީ ފަރުވާ ހޯއްދަވަމުންނެވެ.
