ރައީސް ނަޝީދުގެ ތިން އޮޕަރޭޝަނެއް
ދެވަނަ އޮޕަރޭޝަން ކޮށްފައިވަނީ ފުއްޕާމެއަށް ފަރުވާ ދިނުމަށް
އާސްކް ސްޕީކަރ ޕްރޮގްރާމްގައި ރައީސް ނަޝީދު ވާހަކަފުޅު ދައްކަވަނީ
މިހާރުކުރަމުންދަނީ ރައީސް މުހައްމަދު ނަޝީދުގެ ތިން ވަނަ އޮޕަރޭޝަންކަން ރާއްޖެއެމްވީއަށް އެނގިއްޖެއެވެ.
ރައީސް ނަޝީދަށް އަމާޒުކޮށް ދިން ހަމަލާގައި ލިބުނު ޒަޚަމްތަކަށް ފަރުވާ ދިނުމަށް އޭޑީކޭ ހޮސްޕިޓަލަށް އެމަނިކުފާނު ގެންގޮސްފައިވާއިރު، އެންމެ ފުރަތަމަ ފަރުވާދީފައިވަނީ ބޭރުފުށުން ފެނުނު ޒަހަމްތަކަށެވެ. އޭގެ ފަހުން ބޮލަށް ލިބިފައިވާ އަނިޔާތަކަށް ފަރުވާ ދިނުމަށްފަހު ހެދި ސީޓީ ސްކޭނަކުން އެނގުނު ގޮތުގައި އެމަނިކުފާނުގެ މޭ ކައިރިން ފުއްޕާމެއަށް ވަނީ އަސަރުކޮށްފައިވެއެވެ.
އޭގެ ސަބަބުން ދެވަނަ އޮޕަރޭޝަން ކޮށްފައިވަނީ ފުއްޕާމެއަށް ފަރުވާ ދިނުމަށެވެ. އަދި އެ އޮޕަރޭޝަން ކާމިޔާބު ކަމަށާއި މިހާރު ކުރަނީ ގޮހޮރުގެ އޮޕަރޭޝަނެއް ކަން ވެސް އެނގިފައިވެއެވެ.
ޑޮކްޓަރުންގެ އެންމެ ބޮޑު ކަންބޮޑުވުމަކަށް ވީ މެއަށް އަސަރުކޮށްފައި ހުރެދާނެތީ ކަމަށްވާއިރު، އަދި އެފަދަ ކަމެއް ވެފައިވާކަން އެނގިފައެއް ނުވެއެވެ. އެނގިފައިވާގޮތުގައި ފުއްޕާމެއާއި ގޮހޮރަށް ހެރިފައިވާ ބިއްލޫރިތައް ނެއްޓުމަށް ކުރަނީ ހަ ގަޑިއިރުގެ އޮޕަރޭޝަނެކެވެ. އެމަނިކުފާނު އޮޕަރޭޝަން އަށް ވައްދާފައިވާކަން އޭޑީކޭއިން ކަށަވަރުކޮށްދިނީ ރޭ 1 ޖަހާކަންހާއިރު އެވެ.
