ރައީސް ނަޝީދަށް އަމާޒުކޮށް ދިން ޙަމަލާއަށް ދުނިޔޭގެ ސަމާލުކަން
6 މެއި 2021 | ބުރާސްފަތި 20:32ރާއްޖޭގެ އެކުވެރި ޤައުމުތަކުންވެސް ދަނީ ކަންބޮޑުވުން ފާޅު ކުރަމުން
ރައީސް ނަޝީދަށް އަމާޒުކޮށް ދިން ނިރުބަވެރި ޙަމަލާއާ ގުޅިގެން ފުލުހުން ޙަރަކާތްތެރިވަނީ
އެއްޗެއް ގޮއްވާލައިގެން ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް އަމާޒުކޮށް ދިން ޙަމަލާ ދުނިޔޭގެ މެއިންސްޓްރީމް މީޑިއާތަކުންވެސް ކަވަރ ކުރަން ފަށައިފިއެވެ.
ބުރާސްފަތި ދުވަހުގެރޭ ދިން މި ޙަމަލާއާ ގުޅިގެން ދުނިޔޭގެ ޤައުމުތަކުގެ އިސްވެރިންނާއި، ރާއްޖޭގެ އެކުވެރި ޤައުމުތަކުންވެސް ދަނީ ކަންބޮޑުވުން ފާޅު ކުރަމުންނެވެ. އަދި ބޭރުގެ ބޮޑެތި މީޑިއާތަކުންވެސް މި ޙަމަލާއާ ގުޅޭ ޚަބަރުތައް ގެނެސްދެމުންދާއިރު، މިއީ ނިރުބަވެރި ޙަމަލާއެއްގެ ގޮތުގައި ގިނަ ބަޔަކު ދަނީ ސިފަކުރަމުންނެވެ.
ރައީސް ނަޝީދަށް ދީފައިވާ ޙަމަލާއަށް ދުނިޔޭގެ ސަމާލުކަން ލިބިފައިވާއިރު، އަލްޖަޒީރާ، ރޮއިޓަރސް އަދި ބީބީސީ ފަދަ ތަންތަނުންވެސް ގެންދަނީ މި ޚަބަރު ރިޕޯޓު ކުރަމުންނެވެ. އެގޮތުން ބޭރުގެ މީޑިއާތަކުންވެސް ވަނީ ރާއްޖެއަކީ މިފަދަ ޙަމަލާތައް މަދު، އަމާން ޤައުމެއްގެ ގޮތުގައި ސިފަކޮށްފައެވެ.
މި ޙަމަލާގެ ޒިންމާ އިސްލާމިކް ސްޓޭޓް (އައިސިސް) ކަމަށް ބުނާ ބަޔަކު ނަގާފައިވާކަމަށް މީސްމީޑިއާ ޕްލެޓުފޯމް ތަކުގައި ދައުރުވަމުންދާއިރު، އެކަމަށްވެސް ގިނަ ބައެއްގެ ސަމާލުކަން ދަނީ ލިބެމުންނެވެ. އެގޮތުން ޓެރަރ އެލަރމް ކިޔާ ޓްވިޓަރ އެކައުންޓަކުން ވަނީ މި ޙަމަލާގެ ޒިންމާ އައިސިސްއިން "ޑަރކް ވެބް" ގައި ނަގާފައިވާކަމަށް ބުނެފައެވެ. ނަމަވެސް މިކަން ރަސްމީ އެއްވެސް މަސްދަރަކުން ކަށަވަރު ކޮށްދީފައެއް ނުވެއެވެ.
