އިންޑިއާއިން އަނެއްކާވެސް ރިކޯޑް އަދަދަކަށް މީހުން މަރުވެއްޖެ

އިންޑިއާއިން އަނެއްކާވެސް ރިކޯޑް އަދަދެއްގެ މީހުން ކޮވިޑް-19 ޖެހިގެން މަރުވެއްޖެއެވެ.

އިންޑިއާގެ ހެލްތު މިނިސްޓްރީން ބުދަ ދުވަހު އާންމުކޮށްފައިވާ ތަފާސްހިސާބުތައް ދައްކާގޮތުން ފާއިތުވި 24 ގަޑިއިރުތެރޭ އެގައުމުން 3780 މީހުން ކޮވިޑް ބަލީގައި ވަނީ މަރުވެފައެވެ. މިއީ މިހާތަނަށް 24 ގަޑިއިރުތެރޭ އެގައުމުން އެންމެ ގިނަ މީހުން މަރުވި ފަހަރެވެ. އެއާއެކު އެގައުމުން ކޮވިޑް ޖެހިގެން މަރުވި މީހުންގެ ޖުމްލަ އަދަދުވަނީ 226،188ށް އަރާފައެވެ.

ވޭތުވެދިޔަ 24 ގަޑިއިރުތެރޭ އިންޑިއާއިން 382،315 މީހުން ބައްޔަށް ޕޮޒިޓިވްވެފައިވެއެވެ. މިހާރު އިންޑިއާއިން ބައްޔަށް ޕޮޒިޓިވްވި މީހުންގެ ޖުމްލަ އަދަދުވަނީ 20,665،148ށް އަރާފައެވެ.

އިންޑިއާގެ ކޮވިޑްގެ ކޭސްތައް ފާއިތުވި ދެދުވަހު ދަށަށް ދާން ފެށުމަށްފަހު އަނެއްކާވެސް މިވަނީ އިތުރުވާން ފަށާފައެވެ.

އިންޑިއާގެ ކޭސްތަކުގެ އަދަދު މަޑުމަޑުން ދަށްވަމުން ދާކަމަށް ދެއްކި ނަމަވެސް ކޮވިޑްގެ ދެވަނަ ރާޅާއި އެކު އެގައުމުން ކުރިމަތިލާފައިވާ އޮކްސިޖަނުގެ ދަތިކަމަށް އަދިވެސް ހައްލެއް ނުލިބެއެވެ. ކޭސްތައް ދަށަށްދާން ފެށިނަމަވެސް މި މައްސަލައަށް އަވަސް ހައްލެއް ނުލިބޭނެ ކަމަށް މާހިރުން ބުނެއެވެ.

އެގައުމުގެ ހޮސްޕިޓަލްތައް ތޮއްޖެހި އޮކްސިޖަން ނުލިބުމުގެ ސަބަބުން ބަލިމީހުންނަށް އެކަށޭނަ ގޮތުގައި ފަރުވާ ނުދެވި ބަލީގައި ހާލަތު ސީރިއަސްވެ މަރުވާ މީހުންގެ އަދަދު ދަނީ އިތުރުވަމުންނެވެ. ކޭސްތައް މަދުވި ނަމަވެސް އޮކްސިޖަންގެ މައްސަލައަށް ހައްލެއް ނުލިބޭނެ ކަމަށް މާހިރުން ދަނީ ބުނަމުންނެވެ.