އޭއެސް ރޯމާއަކީ މިހާތަނަށް މޮރީނިއޯގެ އެންމެ ތަފާތު ޕްރޮޖެކްޓް
5 މެއި 2021 | ބުދަ 09:43އެކި ޓީމުތަކަށް މޮރީނިއޯ ވަނީ ވިއްސަށް ވުރެ ގިނަ ތަށި ހޯދާދީފައި
ހޯސޭ މޮރީނިއޯ މީގެ އެގާރަ އަހަރުކުރިން އިންޓަރ މިލާނަށް އިޓާލިއަން ލީގު ކާމިޔާބުކޮށްދިނުމަށް ފަހު ޓްރޮފީ އުފުލާލަނީ: މޮރީނިއޯ ވަނީ މިހަފުތާގައި އޭއެސް ރޯމާއާ ހަވާލުވެފައި
އިނގިރޭސިވިލާތުގެ ޓޮޓެންހަމަ ހޮޓްސްޕާއިން ޕޯޗުގަލްގެ ހޯސޭ މޮރީނިއޯ ބޭރުކޮށްލިތާ މަސްދުވަސް ނުވަނީސް އިޓަލީގެ އޭއެސް ރޯމާއާ ހަވާލުވުމުގެ އެއްބަސްވުމެއްގައި އޭނާ ވަނީ މި ހަފުތާގައި ސޮއިކޮށްފައެވެ. ރޯމާއާ އޭނާ ހަވާލުވާނީ މި ސީޒަން ނިމުމަށްފަހު އަންނަ ސީޒަނުން ފެށިގެންނެވެ.
ރޯމާއާ ހަވާލުވެގެން އެއީ އިޓަލީގެ އެންމެ ބޮޑު ބާރަށް ހެދުމުގެ މަޝްރޫއު ހޯސޭ މޮރީނިއޯއަށް ދިނީ ކާކުބާވައެވެ. އެމީހަކީ ރޯމާގެ ވެރިޔާ ޑެން ފްރައިޑްކިން އެވެ. އެއީ އެމެރިކާގެ މަހުޖަނެކެވެ. އޭނާގެ އެދުމުގެ މަތިން މޮރީނިއޯގެ ކަންތަކުގައި އުޅުނީ ރޯމާގެ ސްޕޯޓިން ޑައިރެކްޓަރ ޓިއާގޯ ޕިންޓޯއެވެ. މި ދެމީހުން ހޯސޭ މޮރީނިއޯއަށް ދިނީ ތިން އަހަރުގެ އެއްބަސްވުމެކެވެ. އޭގައި ވަނީ ތަށި ހޯދައިދޭ ވާހަކައެއް ނޫނެވެ. ތަށި ހޯދުމަށް ޓީމު ބިނާކުރުމުގެ ވާހަކައެވެ. އެހެންވީމާ މިއީ މިހާތަނަށް މޮރީނިއޯ ހަވާލުވި އެމްމެ ތަފާތު ޕްރޮޖެކްޓެވެ.
ރޯމާގެ ކޯޗަކަށް ހޯސޭ މޮރީނިއޯ އައްޔަން ކުރި ވާހަކަ އިއުލާން ކުރީއްސުރެ ރޯމުގައި މިހާރު ދެވަނަ އެހެން ވާހަކައެއް ނެތެވެ. ރޭޑިއޯ ޓީވީތަކުން ހުއްޓުމެއް ނެތި ދައްކަނީ އެވާހަކައެވެ. ކުލަބުގެ ސަޕޯޓަރުން ތިބީ އުފަލުން ފޮޅިފައެވެ. ފަހަކަށް އައިސް ރޯމާއަށް ކުރިމަތިވަމުން އައި ބޮޑެތި ނާކާމިޔާބީތަކުގެ މަތިން ކުއްލިއަކަށް އެންމެން ހަނދާން ނެތިއްޖެއެވެ.
މޮރީނިއޯ އަންނަ ވާހަކައިން ރޯމަށް ހިތްހަމަ ޖެހުން ލިބިފައިވިޔަސް އިނގިރޭސވިލާތުގައި މޮރީނިއޯއަށް ދިމާވި ކަންތައްތައް ތަކުގެ ސަބަބުން އޭނާއަށް ރޯމުގައި ކުރެވޭނީ ކޮން ކަމެއް ބާވައޭ އަހައި ސުވާލު ކުރާ މީހުން ވެސް މަދެއް ނޫނެވެ. އެފްސީ ޕޯޓޯ އާއި އިންޓަރ މިލާނަށް ބޮޑެތި ކާމިޔާބީތަކެއް މޮރީނިއޯ ހޯދައިދިނަސް ފަހަކަށް އައިސް އެކަހަލަ ކަމެއް ނުކުރެވި ކޮންމެ ޓީމަކުންވެސް ސައްޕު ޖަހައި ބޭރުކޮށްލާ މީހަކަށް މޮރީނިއޯ ވަނީ ވެފައެވެ. އެހެންވީމާ މޮރީނިއޯއަށް އިހު ލިބިފައިވި ޚާއްސަކަން މިހާރުވެސް ލިބިފައިވޭތޯ ބަލަން ބޭނުންވަނީއެވެ.
މެންޗެސްޓަރ ޔުނައިޓެޑާއި ޓޮޓެންހަމް އަދި ރެއާލް މެޑްރިޑާއި ޗެލްސީގައި މޮރީނިއޯއަށް ދިމާވި މައްސަލައަކީ ސަޕޯޓަރުންނާއި މެނޭޖްމަންޓުގެ އުއްމީދުތައް މަތިވުމެވެ. ފުރަތަމަ ދުވަހުން ފެށިގެންވެސް ތަށި ހޯދަން އަމާޒު ހިފުމެވެ. އެކަމަކު ރޯމާގައި މޮރީނިއޯއަށް އެކަހަލަ ފިއްތުމެއް ނޯންނާނެއެވެ. ޓީމެއް އުފައްދައި ތަރައްގީކޮށް ކާމިޔާބީގެ ހަރުފަތްތަކާ ހަމައަށް ގެންދަން މޮރީނިއޯއަށް ވަގުތު ލިބޭނެއެވެ. ފުލުފުލުގައި ބަލިވިޔަސް ޓީމު ރެލިގޭޓް ނުވާހާ ހިނދަކު މޮރީނިއޯއަށް ޕްރެޝަރެއް ނޯންނާނެއެވެ. އެހެންވީމާ މިއީ މިހާތަނަށް މޮރީނިއޯ ހަވާލުވި އެންމެ ތަފާތު ޕްރޮޖެކްޓެވެ.
ޓީމު އަލުން ބަލުން އުފެއްދުމުގެ މަޝްރޫއާ މޮރީނިއޯ ހަވާލުވާއިރު އެއީ ކުއްލިއަކަށް ކުރެވެން އޮތް ކަމެއް ވެސް ނޫނެވެ. ފައިސާއެއް ނެތެވެ. ރޯމާގެ އޯނަރާއި ސްޕޯޓިން ޑިރެކްޓަރު ވަނީ ފައިސާ ބޭނުން ކަމަށްވަންޏާ ކުޅުންތެރިން އެންމެ ފުރަތަމަ ވިއްކައިގެން ފައިސާ ހޯދާށޭ ބުނެފައެވެ. އެހެންވީމާ ފުރަތަމަ ކަމަކަށްވެސް އޮންނާނީ ވިއްކުމެވެ. ގަތުން އަންނާނީ އޭގެ ފަހަތަށެވެ.
ރޯމާއަކީ އިޓަލީގައި ބޮޑު ކުލަބެކެވެ. ވަރަށް ބޮޑު ކުލަބެކެވެ. ރޯމަކީ އިޓަލީގެ ވެރިރަށެވެ. އެރަށުގެ އެންމެ މުހިއްމު އެންމެ ބޮޑު ކުލަބަކީވެސް ރޯމާއެވެ. އެކަމަކު މި ބޮޑުކަން ފުޓުބޯޅައިގައި ނުދެމެހެއްޓެއެވެ. ފުޓުުބޯޅައިގައި ރޯމާ އޮންނަން ޖެހެނީ ޓިއުރިންގެ ކުލަބުތަކާއި މިލާނުގެ ކުލަބުތަކުގެ ހިޔަނީގެ ފަހަތުގައެވެ. އެހެންވީމާ ރޯމާގެ މެނޭޖްމަންޓާއި ސަޕޯޓަރުން ބޭނުންވަނީ މޮރީނިއޯގެ އެހީގައި ރޯމާ އަލުން ބަލުން ބިނާކުރުމަށެވެ. ކާމިޔާބު ހޯދުމުގެ ބިންގަލެއް އަޅައި ދިނުމަށެވެ.
އިޓަލީގެ ލީގު ރޯމާއަށް އެންމެ ފަހުން ކާމިޔާބނު ކުރެވުނީ 2001 ވަނަ އަހަރު ފަބިއޯ ކަޕޭއްލޯގެ އިރުޝާދުގެ ދަށުންނެވެ. ތައްޓެއްގެ ފޮތުގައި ރޯމާއަށް އެންމެ ފަހުން ލިބުނު ތައްޓަކީ އިޓާލިއަން ސުޕަރ ކަޕެވެ. އެ ތަށި ލިބުނީ 2008 ވަނަ އަހަރު ލޫޗިއާނޯ ސްޕަލެއްޓީގެ އިރުޝާދުގެ ދަށުންނެވެ.
