ފުރަތަމަ އައިއޭއެސް ޓެނިސް ޗެމްޕިއަންޝިޕް ނިންމާލައިފި

ޓެނިސް އެސޯސިއޭޝަން އޮފް މޯލްޑިވްސް އާއި އައިލެންޑް އޭވިއޭޝަން ސާވިސް (އައިއޭއެސް) ގުޅިގެން ބޭއްވި ފުރަތަމަ އައިލެންޑް އޭވިއޭޝަން މޯލްޑިވިއަން ޓެނިސް ޗެމްޕިއަންޝިޕް ކާމިޔާބުކަމާއެކު ކުލަގަދަ ރަސްމިއްޔާތަކުން ނިންމާލައިފިއެވެ.

މެރީ ބްރައުން ޓެނިސް ކޯޓުގައި ހޯމަ ދުވަހުގެރޭ ކުރިއަށްގެންދިޔަ މި މުބާރާތުގެ ކްލޯސިން ސެރަމަނީ ޝަރަފްވެރިކޮށްދެއްވީ ކުޅިވަރާބެހޭ ވަޒީރު އިރުތިޝާމް އާދަމާއި އައިލެންޑް އޭވިއޭޝަންގެ ޗެއާމަން އަހުމަދު ޝަފީއު އެވެ.

ޖުމްލަ 136 ކުޅުންތެރިން ވާދަކުރި 10 ކެޓަގަރީގެ ތެރެއިން އަންހެން ބައިގެ ސިންގަލްސް އިވެންޓުގެ ޗެމްޕިއަންކަން ހޯދީ އައިމިނަތު މަލީލާ ސާލިހު އެވެ. އަދި މިބައިގެ ފިރިހެން ޗެމްޕިއަންކަން ހޯދީ ރާއްޖޭގެ އެއް ނަމްބަރު ޓެނިސް ކުޅުންތެރިޔާ އަބްދުﷲ ފާއީ ފަޒީލެވެ.

އެކި އުމުރުފުރާތަކުގެ ކުޅުންތެރިންނަށް އަމާޒުކޮށްގެން ކުރިއަށްގެންދިޔަ މި މުބާރާތުގައި 68 ފިރިހެން ކުޅުންތެރިންނާއި 68 އަންހެން ކުޅުންތެރިން ވާދަކުރި އިރު، މުބާރާތުގައި 45 އަހަރުން މަތީގެ ކުޅުންތެރިންވެސް ވަނީ ވާދަކޮށްފައެވެ. އެގޮތުން މި އުމުރުފުރާގެ ސިންގަލްސް އިވެންޓުގެ އެއްވަނަ ހޯދީ ހަސަން ޝާމް އެވެ. އަދި އޯޕަން ޑަބަލްސްގެ ޗެމްޕިއަންކަން އަބްދުﷲ ފާއީ ފަޒީލް އާއި ހުސައިން ރަބީއުގެ ޕެއާއިން ހޯދި އިރު، އަންހެން ޑަބަލްސް އިވެންޓުން ޗެމްޕިއަންކަން ހޯދީ އައިމިނަތު މަލީލާ ސާލިހު އާއި އަޔާނީ މޫސާ ކަލީމްގެ ޕެއާ އެވެ.

ކުރިއަށް އޮތް ތިން އަހަރުވެސް އައިއޭއެސް ގުޅިގެން މި މުބާރާތް ބޭއްވުމަށް ހަމަޖެހިފައިވާ އިރު، ޓެނިސް އެސޯސިއޭޝަންގެ ރައީސް އަހުމަދު ނަޒީރު ވިދާޅުވީ މޯލްޑިވިއަން ފަދަ ބޮޑު ކުންފުންޏެއް މިވަރުގެ މުބާރާތެއްގެ މެއިން ސްޕޮންސަރުގެ ގޮތުގައި ހަމަޖެހިގެން ދިއުމުން އެކަމާ ވަރަށް ބޮޑަށް ހިތްހަމަޖެހޭ ކަމަށާއި އަދި މިކަމުން ދައްކުވައިދެނީ އެފަރާތުން ކުޅިވަރަށް ހުންނަ ޝައުގުވެރިކަން ކަމަށެވެ.

ނަޒީރު ވިދާޅުވީ މި މުބާރާތް ފެށިގެން ނިމުމާ ހަމައަށް އައި އިރުވެސް މޯލްޑިވިއަންގެ މުވައްޒަފުންގެ ފަރާތުން ކޮންމެ ދުވަހެއްގެ ކުޅުން ކުރިއަށްދާ އިރު އެއްބާރުލުން ލިބޭ ކަމަށާއި އެކަމަށް ޝުކުރު އަދާކުރާ ކަމަށެވެ.