އިންޑިއާގެ ކޮވިޑް-19ގެ ހާލަތު ގޯހުން ގޯހަށް ގޮސް އެގައުމުން ބައްޔަށް ޕޮޒިޓިވްވި މީހުންގެ އަދަދު 20 މިލިއަނަށްވުރެ މައްޗަށް އަރައިފިއެވެ.

އިންޑިއާގެ ކޭސްތަކުގެ އަދަދު ދަށްވަމުން އަންނަ ކަމަށް އެގައުމުގެ ސަރުކާރުން ބުނި ނަމަވެސް ކަމުގެ މާހިރުން ދަނީ އިންޑިއާގެ ކޮވިޑްގެ ކޭސްތަކާއި ބަލީގައި ހާލުސީރިއަސްވެ މަރުވާ މީހުންގެ އަދަދު ދަށްނުވާ ކަމަށް ބުނަމުންނެވެ.

މިހޮނިހިރު ދުވަހުވެސް ވަނީ ރެކޯޑް އަދަދަކަށް މީހުން ޕޮޒިޓިވްވެފައެވެ. ހޮނިހިރު ދުވަހު 401،993 މީހުން ކޮވިޑަށް ޕޮޒިޓިވްވިއެވެ.

ފާއިތުވި 24 ގަޑިއިރު 357،229 މީހުން ޕޮޒިޓިވްވި އިރު، 3،449 މީހުން ވަނީ ބަލީގައި މަރުވެފައެވެ. އެގައުމުން ބައްޔަށް ޕޮޒިޓިވްވި މީހުންގެ ޖުމްލަ އަދަދު 20،400،852ށް އަރާފައިވާއިރު، 223،284 މީހުން ވަނީ ބަލީގައި މަރުވެފައެވެ. އަދި ބަލިޖެހުނު މީހުންގެ ތެރެއިން 16،716،794 މީހުން ބަލިން ރަނގަޅުވެފައިވާއިރު، މިހާރު ބައްޔަށް ފަރުވާހޯދަމުންދަނީ 3،460،774 މީހުންނެވެ.

އަންގާރަ ދުވަހު އިންޑިއާއިން ފެނުނު ކޭސްތަކުގެ އަދަދު ދަށްނަމަސް އެގައުމުން ބައްޔަށް ޓެސްޓުކުރާ ވަރު ދަށްވެފައިވާތީ މިހާރު ހާމަވެފައިވާ ނަންބަރުތަކަށްވުރެ އިންޑިއާގެ ޕޮޒިޓިވް ކޭސްތަކުގެ އަދަދު އިތުރުވާނެ ކަމާ ބެހޭ މާހިރުން ލަފާކުރެއެވެ. އަދި އެކަށީގެންވާ ވަރަށް މީހުން ބައްޔަށް ޓެސްޓު ނުކުރެވުމަކީ މިހާރު އިންޑިއާއަށް ދިމާވެފައިވާ ބޮޑު މައްސަލައެއް ކަމަށް ފާހަގަކުރެއެވެ.

އިންޑިއާގެ ކޭސްތަކުގެ އަދަދު މަޑުމަޑުން ދަށްވަމުން ދާކަމަށް ދެއްކި ނަމަވެސް ކޮވިޑްގެ ދެވަނަ ރާޅާއި އެކު އެގައުމުން ކުރިމަތިލާފައިވާ އޮކްސިޖަނުގެ ދަތިކަމަށް އަދިވެސް ހައްލެއް ނުލިބެއެވެ. ކޭސްތައް ދަށަށްދާން ފެށިނަމަވެސް މި މައްސަލައަށް އަވަސް ހައްލެއް ނުލިބޭނެ ކަމަށް މާހިރުން ބުނެއެވެ. އެގައުމުގެ ހޮސްޕިޓަލްތައް ތޮއްޖެހި އޮކްސިޖަން ނުލިބުމުގެ ސަބަބުން ބަލިމީހުންނަށް އެކަށޭނަ ގޮތުގައި ފަރުވާ ނުދެވި ބަލީގައި ހާލަތު ސީރިއަސްވެ މަރުވާ މީހުންގެ އަދަދު ދަނީ އިތުރުވަމުންނެވެ.

ހޮސްޕިޓަލްތައް ތޮއްޖެހި ސިއްހީ ނިޒާމަށް ނުކަތާވަރަށް މީހުން ބަލިވަމުންދާތީ ދުނިޔޭގެ އެންމެ ބޮޑު އެއް އިގްތިސާދުގެ ސިއްހީ ނިޒާމު މިހާރު ވަނީ ފުނޑުފުނޑުވާން ކައިރިވެފައެވެ.

ބަލިމީހުން އެޑްމިޓްކޮށް ފަރުވާދެވޭނެ އެނދު ހޮސްޕިޓަލްތަކުން ހުސްވެފައިވާއިރު، ބައްޔަށް ޓެސްޓުކޮށް ޑައިގްނޯޒްކުރުމުގެ ކަންތައް ވަނީ މަޑުޖެހެން ފަށައިފައެވެ. އަދި ބައްޔަށް ފަރުވާދޭން ބޭނުންވާ ބޭހުގެ ސަޕްލައި ދައްވަމުން އަންނަކަމަށް ވެސް ރިޕޯޓްތައް ބުނެއެވެ.

މިހާރު އިންޑިއާއަށް ކުރިމަތިވެފައިވާ ކޮވިޑްގެ ރާޅުން ރައްކާތެރިވުމަށް އެގައުމުގެ 11 ސްޓޭޓެއްގައި ވަނީ ރައްކާތެރިކަމުގެ ފިޔަވަޅުތައް ވަރުގަދަކޮށްފައެވެ. ނަމަވެސް މުޅި ގައުމު ލޮކްޑައުނަކަށް ގޮސްފިނަމަ ކުރިމަތިވާނެ އިގްތިސާދީ ކާރިސާއަކަށް ވިސްނައި މަރުކަޒީ ސަރުކާރު ދަނީ އެކަމަށް ފަސްޖެހެމުންނެވެ.