ރަމަޟާން މަހުގެ 10 ދުވަސް ފާއިތުވެގެންދިޔަ އިރު މާރުކޭޓުގައި ތަކެތީގެ އަގުތަކަށް ތަފާތު އެތައް ބަދަލުތަކެއް ވަނީ އައިސްފަ އެވެ.

އާއްމުގޮތެއްގައި މާރުކޭޓުން އެންމެ ގިނައިން ވިކެނީ ފަނިގިރުމަށް ބޭނުންކުރާ ސާމާނާއި ފަތުގެ ބާވަތްތައް ކަމަށް ވިޔަފާރިވެރިން ބުނެ އެވެ.

މާރުކޭޓުގައި ފަނި ގިރުމަށް ބޭނުންކުރާ ސާމާނު ގިނަ އަދަދަކަށް ލިބެން ހުރި ނަމަވެސް، ފަތުގެ ބާވަތްތައް ލިބެން ހުރީ ވަރަށް މަދުންނެވެ. މިކަމުގެ ސަބަބުން ފަތުގެ ބާވަތްތަކުގެ އަގުތައް ވަނީ ވަރަށް މައްޗަށް އަރާފަ އެވެ. މާރުކޭޓުގައި ކޮޕީފަތުގެ ދެފަތް އުޅެނީ 15ރ. އާއި 20ރ. އާ ދެމެދުގެ އަގުތަކެއްގަ އެވެ. އަދި ލެޓިއުސް ކިލޯއެއް އުޅެނީ 150ރ. އާއި 120ރ. އާ ދެމެދުގެ އަގުތަކެއްގަ އެވެ.

ކަރާ ކިލޯއެއްގެ އަގު އުޅެނީ، 18ރ. އާއި 20ރ. އާ ދެމެދުގެ އަގުތަކެއްގަ އެވެ. މީގެ އިތުރުން، 100ރ. އަށް ފަސް އަނބު، 100ރ. އަށް ހަތަރު އަނބު ލިބެން ހުރިއިރު، މާރުކޭޓުގައި ގިނައިން ހުރީ ފުވައްމުލަކު އަނބެވެ. ކުރުނބާގެ އަގު 15ރ. އަށް 20ރ. އަށް މާރުކޭޓުގައި ލިބެން ހުރި އިރު ދޮންކެޔޮ ވަކެއްގެ ލިބެން ހުރީ 4ރ. އަށް 5ރ.އަށެވެ.

ރަމަޟާން މަސް ފެށުނު އިރާ، މިހާރާ އަޅާ ބަލާއިރު އަގުތަކަށް ވަނީ ތަފާތު ބަދަލުތަކެއް އައިސްފަ އެވެ. އެގޮތުން ކަރާ ކިލޯއެއް  އަގު 12ރ. އަށް 15ރ. އަށް ރަމަޟާން މަސް ފެށުނު އިރު ހުރި ނަމަވެސް މިހާރު ކަރާގެ އަގު ވަނީ ފަސް ވަރަކަށް ރުފިޔާ މައްޗަށް ޖެހިލާފަ އެވެ. އަދި ރަމަޟާން މަހުގެ ކުރިއަށް އޮތް ތަނުގައިވެސް، ކަރާގެ އަގު މައްޗަށްދާނެ ކަމަށާއި ކަރާގެ އަގު އުފުލެނީ، އެންމެ ގިނައިން ކަރާ ހައްދާ، ތޮއްޑޫ އިން ކަރާ ލިބުން ދަތިވުމުގެ ސަބަބުން ކަމަށް ވިޔަފާރިވެރިން ބުނެ އެވެ.

ކާށީގެ އަގަށް ބަލާ އިރު، މިހާރު ކުޑަ ކާއްޓެއް ލިބެން ހުރީ 7ރ. އާއި 15ރ. އާ ދެމެދުގެ އަގުތަކެއްގަ އެވެ. ކާށީގެ އަގު ދަށަށް ޖެހިފައިވާ އިރު ރަމަޟާން މަސް ފެށުނު އިރު ކާއްޓެއްގެ އަގު 25ރ. އިން ފެށިގެން 40ރ. އަށް ވެސް ހުއްޓެވެ.

ލުނބޯ ކިލޯއެއް 50ރ. އަށް ލިބެން ހުރިއިރު، ރަމަޟާން މަސް ފެށުނު އިރު ލުނބޯ ކިލޯއެއްގެ އަގު އުޅުނީ 70ރ. އާއި 90ރ. އާ ދެމެދުގެ އަގުތަކެއްގަ އެވެ. މިރުސް ކިލޯއެއްގެ އަގު 350ރ. އަށް ވެއްޓިފައިވާ އިރު ރަމަޟާން މަސް ފެށުނު އިރު މިރުސް ކިލޯއެއް 800ރ އަށްވެސް ހުއްޓެވެ. މިރުހުގެ އަގު ދަށަށް ޖެހިލާފައިވާ އިރު، އަންނަ ހަފްތާއިން ފެށިގެން މިރުހުގެ އަގު، މައްޗަށް އަރާނެ ކަމަށް ބައެއް ވިޔަފާރިވެރިން ވަނީ ބުނެފަ އެވެ.