ސީޝެލްސް: ޗައިނާއާއި އިންޑިއާގެ ކުރިމަތިލުމުގެ މައިދާން

ޗައިނާއިން އިންޑިއާ ކަނޑަށް އަތް ގަދަކުރަމުންދާއިރު، އިންޑިއާ ކަނޑުގެ ޖަޒީރާ ޤައުމުތައް ވެފައިވަނީ ޗައިނާއާއި އިންޑިއާގެ ހަނގުރާމައިގެ މައިދާނަ ކަށެވެ. ހަތިޔާރު ބޭނުން ކޮށްގެން އެއްޤައުމުން އަނެއް ޤައުމަށް ހަމަލާ ނުދިން ނަމަވެސް، ދެޤައުމުން ގެންދަނީ ސިޔާސީ އަދި އަސްކަރީ އުކުޅުތައް ބޭނުންކޮށް، އިންޑިއާ ކަނޑުގެ ޖަޒީރާތަކުގެ ކޮންޓްރޯލް ނެގުމަށް މަސައްކަތް ކުރަމުންނެވެ. ބައެއް ޖަޒީރާތައް ޗައިނާގެ ފައިސާއަށް ހެއްލެމުންދާއިރު، އަނެއް ބައި ޤައުމުތަކުން ގެންދަނީ ޗައިނާއާއި އިންޑިއާގެ ވާދަވެރިކަމުގެ ބޭނުން އޭގެ އެންމެ ފުރިހަމަ ގޮތުގައި ހިފާފައެވެ. އެގޮތުން ސީޝެލްސްއަކީ މީގެ އެއް މިސާލެވެ.

ރާއްޖެއާއި ޕާކިސްތާން އަދި ސްރީލަންކާއިން ޗައިނާގެ ފައިސާއަށް ހެއްލި، އިންޑިއާގެ އެހީތަކަށް ބުނީ ނޫނެކޭއެވެ. މި ޤައުމުތަކުގައި ޗައިނާއިން ބޮޑެތި ޕްރޮޖެކްޓްތައް ފެށުމާއިއެކު މިޤައުމުތަކަށް ހީވީ ޗައިނާއިން މެދުކެނޑުމެއް ނެތި މިފަދަ އިންވެސްޓްތައް ކުރާނެ ކަމަށެވެ. އެހެން ނަމަވެސް ބެލްޓް އެންޑް ރޯޑް އިނީޝިއޭޓިވްއަށް ބޭނުންވާ އިންފްރާސްޓްރަކްޗަރ މަސައްކަތްތައް ފެށުމަށް ފަހު ޗައިނާއިން މިޤައުމުތަކުގައި އިތުރު އިންވެސްޓްމަންޓްތަކަށް ފައިސާ ޚަރަދު ކުރުން ހުއްޓާލިއެވެ. ޗައިނާގެ މައްޗަށް ބަރޯސާވެ، ޕާކިސްތާން، ލަންކާ އަދި ދިވެހިރާއްޖެއިން އިންޑިއާއާއިއެކު އޮންނަ ގުޅުންތައް އެއްކޮށް ކަނޑާލާ ހިސާބަށް ދިޔައިރު، ޗައިނާގެ އިންވެސްޓްމަންޓްތައް ހުއްޓުމުން، އިންޑިއާއާއި ދިމާއަށް އެނބުރުނުއިރު، އެޤައުމުން ވަނީ އެޤައުމާއުއެކު މަސައްކަތް ކުރަން އެއްބަސްވި ޤައުމުތަކާއިއެކު އޮންނަ ގުޅުން ބަދަހި ކޮށްފައެވެ.

ޗައިނާއާއިއެކު ގުޅުން ބާއްވާ ޤައުމުތަކާއިއެކު ވެސް ގުޅުން ބާއްވަން އިންޑިއާއިން އޮތީ ތައްޔާރަށެވެ. ލަންކާއާއި ރާއްޖެއަށް އެކަން ނުވިސްނުނީއެވެ. އެހެން ނަމަވެސް ސީޝެލްސްއިން އެފެންނަ މިސާލަކީ އިންޑިއާއާއިއެކު މަސައްކަތް ކުރަން ބޭނުންވާ ޤައުމުތަކާއިއެކު، ޗައިނާއާއި ގުޅުން ބޭއްވި ނަމަވެސް، އިންޑިއާއިން މަސައްކަތްކުރަން ތައްޔާރަށް އޮތްކަމެވެ.

ސީޝެލްސްގައި ޗައިނާގެ ނުފޫޒު ގަދަކުރުމަށް މަސައްކަތްކުރަމުންދާއިރު، އިންޑިއާއިން ގެންދަނީ ސީޝެލްސްގެ އެސެޝަންގައި އަސްކަރީ ބޭސްއެއް ޤާއިމްކުރުމުގެ މަސައްކަތް ފަށާފައެވެ. 2015ވަނަ އަހަރުގެ މާޗް މަހު އިންޑިއާގެ ބޮޑުވަޒީރު ނަރެންދްރަ މޯދީ ސީޝެލްސްއަށް ކުރެއްވި ދަތުރުފުޅުގައި ސޮއެކުރެވުނު މިއެއްބަސްވުމުގެ ދަށުން އަސްކަރީ ބޭސްގެ މަސައްކަތް ކުރިޔަށްދާއިރު، އިންޑިއާއިން ވަނީ ޑޯނިއާ މަތިންދާ ބޯޓަކާއި ހެލިކޮޕްޓަރުތަކެއްގެ އިތުރުން ކަނޑުގެ މަގުން ސީޝެލްސްގެ އިޤްތިޞާދީ ސަރަހައްދު ބެލެހެއްޓުމަށް އަސްކަރީ އުޅަނދުތަކެއް ހަދިޔާކޮށްފައެވެ. މިއީ އިންޑިއާއާއި ރާއްޖޭގެ ގުޅުންތައް ގޯސްނުވަނީސް އެޤައުމުން ރާއްޖެއަށްވެސް ދިން އެހީތަކެކެވެ.

އިންޑިއާއިން ސީޝެލްސްގެ އިތުރުން މޮރިޝަސްގެ އަގަލޭގާ ގައިވެސް އަސްކަރީ މަރުކަޒެއް ޤާއިމްކުރަމުންދާއިރު، މި ދެ މަރުކަޒަކީ ޗައިނާއިން އިންޑިއާ ކަނޑުގައި އަތްގަދަ ކުރަމުންދާ ކުރުމަށް އިންޑިއާއިން ދޭ ރައްދެވެ. ޗައިނާއިން އެފްރިކާގެ ޖިބޫޓީގެ އައްސޭރިފަށުގައި ކަނޑުގެ ސިފައިންގެ މަރުކަޒެއް ޤާއިމް ކޮށްފައިވާއިރު، ރާއްޖޭގައި ވެސް އަސްކަރީ މަރުކަޒެއް ޤާއިމް ކޮށްފާނެކަމުގެ ބިރު އިންޑިއާއަށް އޮވެއެވެ. އަދި ލަންކާއިން ވެސް ޗައިނާގެ ކަނޑުގެ ސިފައިންނަށް މަރުހަބާ ކިޔުމަށް އަތް ދިއްކޮށްފައިވުމަކީ އިންޑިއާއިން އިންޑިއާ ކަނޑުގައި އެމީހުންގެ މަރުކަޒުތައް އިތުރުކުރުމަށް މަޖުބޫރުކުރުވާ ކަމެކެވެ.

އިންޑިއާ ކަނޑުގައި ޗައިނާއާއި އިންޑިއާގެ ވާދަވެރިކަން ބޮޑުވެފައިވާއިރު، އިންޑިއާއާއި ގުޅިގެން މަސައްކަތްކުރަން ތައްޔާރަށް އޮތް ސީޝެލްސްއަށް އިންޑިއާގެ ފޮރިން ސެކެޓްރީ އެސް. ޖަޔަޝަންކަރު މިދިޔަ ހަފްތާގައި ވަޑައިގެން އަސްކަރީ ބޭސްގެ މަސައްކަތް އަވަސް ކުރެއްވުމަށާއި، ޗައިނާގެ ނުފޫޒު ފޯރާފައިވާ ސީޝެލްސްގެ ސިޔާސީ ބޭފުޅުންގެ ކަންބޮޑުވުންތަކާއި ބެހޭ ގޮތުން ވާހަކަ ދައްކަވައި، މަޝްވަރާ ކުރެއްވިއެވެ.

އިންޑިއާ ކަނޑުގެ ޖަޒީރާތަކުން އެޤައުމަކުން ނަގާނެ ކޮޅެއް ނިންމާފައިވާއިރު، ދެން ބަލަން ތިބެންވީ އިންޑިއާއާއި ޗައިނާގެ ފިޔަވަޅުތަކަށެވެ.