ބިލް ލަސްވަމުންދާ ސަބަބު ރައީސްގެ ލީގަލް ކައުންސިލަށް ނޭގުމަކީ ލަދުވެތިކަމެއް - އުޝާމް
2 މެއި 2021 | އާދީއްތަ 23:10ބިލް ގާނޫނަކަށްވެފައިނުވުމަކީ ބަދަލުދިނުމުގެ މައްސަަލަތަކުގައި އިންސާފު ލިބުމަށް އޮތް ހުރަހެއް
ވިލިމާލޭ ދާއިރާގެ މެމްބަރު އަހުމަދު އުޝާމް
މަދަނީ އިޖުރާއަތުގެ ބިލް ލަސްވަމުންދާ ސަބަބު ރައީސްގެ ލީގަލް ކައުންސިލަށް ނޭގުމަކީ ލަދުވެތިކަމެއް ވިލިމާލޭ ދާއިރާގެ މެމްބަރު އަދި ކުރީގެ ޑެޕިއުޓީ އެޓާނީ ޖެނެރަލް އަހުމަދު އުޝާމް ވިދާޅުވެއްޖެއެވެ.
ރައީސް އޮފީހުން ކުރިއަށްގެންދިޔަ ނޫސްވެރިންގެ ބައްދަލުވުމެއްގައި މަދަނީ އިޖުރާއަތުގެ ބިލް ގާނޫނަކަށްވެފައިނުވުމަކީ ބަދަލުދިނުމުގެ މައްސަަލަތަކުގައި އިންސާފު ލިބުމަށް އޮތް ހުރަހެއް ކަމަށް މޭރުންވާގޮތަށް ރައީސުލްޖުމްހޫރިއްޔާގެ ލީގަލް އެޑްވައިސަރު އަހުމަދު އަބްދުﷲ އަފީފް ވާހަކަދެއްކެވުމާއި ގުޅިގެން މެމްބަރު އުޝާމް ކުރެއްވި ޓްވީޓެއްގައި ވިދާޅުވެފައި ވަނީ ސަރުކާރުން ހުށައަޅާފައި އޮތް މަދަނީ އިޖުރާއަތުގެ ބިލް ކުޑަކޮށް ކިޔާލާފަ ހުރި ނަމަވެސް އެފަދަ ވާހަކައެއް ނުދައްކާނެ ކަމަށް ވިދާޅުވެފައެވެ. އަދި ބިލް ލަސްވަމުންދާ ސަބަބު ރައީސްގެ ލީގަލް ކައުންސިލަށް ނޭނގުމަކީ ލަދުވެތިކަމެއް ކަމަށް އުޝާމް ވަނީ ވިދާޅުވެފައެވެ.
ރައީސް އޮފީހުން ކުރިއަށް ގެންދިޔަ ބައްދަލުވުމުގައި ރައީސްގެ ލީގަލް އެޑްވައިސަރު އަފީފް ވަނީ ސަރުކާރުން ބަދަލުދޭން ޖެހޭ މައްސަލަތަކުގައި ބަދަލު ހޯދުމަށް ހުށަހަޅާ ފަރާތްތަކާއި ކޯޓުން ބޭރުގައި މައްސަލަތައް ހައްލުކުރުމަށް ކޮމިޓީއެއް އެކުލަވާލައި ކޯޓަށް ނުގޮސް ދެފަރާތުން ވާހަކަދައްކައިގެން އެއްބަސްވުމަކަށް އާދެވޭ ގޮތަކަށް މައްސަލަ ހައްލުކުރުމަށް މަސައްކަތްކޮށްފައިވާ ކަމަށް ވިދާޅުވެފައެވެ. އެކަމަކު އޭގެ ސަބަބުން ސަރުކާރުން މިކަން ކުރަމުން މިދަނީ ކޮރަޕްޝަންގެ ތެރެއިން ކަމަށް ބުނެ ތުހުމަތުތަކެއް އަމާޒުވެ، މަޖިލީހުގެ ވަކިވަކި މެންބަރުންނާއި މުޅި މަޖިލީހުގައި މި ވާހަކަ ދައްކަން ފަށައި އެއީ ކޮށްގެންވާނެ ކަމެއް ނޫންކަމަށް މަޖިލީހުގެ ކޮމިޓީން ނިންމާފައިވާ ކަމަށް އަފީފް ވިދާޅުވިއެވެ.
އަފީފް ވަނީ މިހެން މިކަން ކުރިމަތިވުމުގެ ސަބަބުން އެއީ ސަރުކާރަށް ކުރިމަތިވި ވަރަށްބޮޑު ގޮންޖެހުމެއް ކަމަށާއި، މީހުންނަށް އަދި ދައުލަތަށް ވެސް ބުރަ ނުވާނެ ގޮތަކަށް މިބާވަތުގެ މައްސަކަތައް ނިންމުމަށް ބުރަވެގެންދިޔަ ކަމަށް ވިދާޅުވެފައެވެ.
މަދަނީ އިޖުރާއަތުގެ ބިލަކީ މަދަނީ ދަޢުވާތަކާބެހޭ އުޞޫލުތަކާއި، ޝަރީޢަތަށް މައްސަލަ ފޮނުވުމުގެ ކުރިން މައްސަލަ ޙައްލުކުރުމުގައި ޢަމަލުކުރާނެ އުޞޫލުތަކާއި، ޝަރީޢަތަށް ހުށަހެޅޭ މައްސަލަތަކުގެ ޝަރީޢަތް ހިންގުމުގެ އުޞޫލުތަކާއި، ހެއްކާބެހޭ ބައެއް އުޞޫލުތައް ބަޔާން ކުރާ ބިލެކެވެ. މީގެ އިތުރުން ރާއްޖެއިން ބޭރުގެ ކޯޓުތަކުގައި ކޮށްފައިވާ ޙުކުމްތައް ދިވެހިރާއްޖޭގައި ތަންފީޒުކުރުމާގުޅޭ އުޞޫލުތަކާއި، ޙުކުމް ތަންފީޒުކުރުމާގުޅޭ އުޞޫލުތަކާއި، އިސްތިޢުނާފުކުރުމާގުޅޭ އުޞޫލުތަކާއި، އެނޫންވެސް މަދަނީ އިޖުރާޢަތާގުޅޭ ޢާންމު އުޞޫލުތައް ބިލުގައި ވެއެވެ.
