ރާއްޖޭގެ ސިޓީ ހޮޓާތަކަށް ޚާއްސަ ސެމިނާރ އެއް ބާއްވަން ނިންމާފައިވާކަން މިނިސްޓްރީ އޮފް ޓުއަރިޒަމުން ހާމަކޮށްފިއެވެ.
ޓޫރިޒަމް މިނިސްޓްރީން ހުކުރު ދުވަހު ކުރި ޓުވީޓެއްގައި ބުނެފައިވަނީ ރާއްޖޭގެ ފަތުރުވެރިކަމުގެ ދާއިރާ ސިންދަފާތުކުރުމަށް ގިނަ މަސައްކަތްތަކެއް ކުރަމުންދާކަމަށާއި އެގޮތުން ގެސްޓް ހައުސްތަކާއި ސިޓީ ހޮޓާތަކަކީ ރާއްޖޭގެ ފަތުރުވެރިކަމުގެ ދާއިރާގައި މިހާރު މަގުބޫލުކަން ލިބިފައިވާ ތަންތަން ކަމަށެވެ. މި ސަބަބަށްޓަކައި ސިޓީ ހޮޓާތަކަށް އަމާޒުކުރެވޭ ޚާއްސަ ސެމިނާރެއް ވަރަށް އަވަހަށް ބާއްވަން މިހާރު ނިންމާފައިވާކަމަށް ބުނެފައިވެއެވެ.
"މޯލްޑިވްސް ހޮޓެލް ކްލެސިފިކޭޝަން- ދަ ވޭ ފޯވާޑް" ނަމުގައި ބާއްވާ މި ސެމިނާރ އޮންނާނީ މެއި މަހުގެ 12ން 13ށް ކަމަށް މިނިސްޓްރީން ބުނެއެވެ. ސެމިނާރގައި ބައިވެރިވުމަށް ދާއިރާގެ ތަޖުރިބާކާރުންނާއި ސްޓޭކްހޯލްޑަރުންނަށް ދައުވަތު ދެމުންދާކަމަށް ވެސް ބުނެއެވެ. ކުރިއަށް އޮތް ދުވަސްތަކުގައި މި ސެމިނާރގެ މަޢުލޫމާތާއި ބައިވެރިވާނެގޮތްވެސް ހާމަކުރާނެކަމަށް ޓޫރިޒަމް މިނިސްޓްރީން ވަނީ ބުނެފައެވެ.
