ރާއްޖޭގައި އިންޑިއާގެ ވޭރިއަންޓް އުޅެދާނެ - ޝާހް މާހިރު

ރާއްޖޭގައި އިންޑިއާގެ ކޮވިޑް-19 ވޭރިއަންޓް އުޅެދާނެ ކަމަށް މިނިސްޓަރ އޮފް ސްޓޭޓް ފޮރ ހެލްތު ޑރ. ޝާހް މާހިރު ވިދާޅުވެއްޖެއެވެ.

ރާއްޖޭގައި ކޮވިޑްގެ ކޭސްތައް އިތުރުވަމުންދާއިރު، މިހާރު ރާއްޖޭގައި ކޮވިޑްގެ އައު ވޭރިއަންޓް ނޫޅޭނެއެކޭ ނުބުނެވޭނެ ކަމަށާއި ކޮވިޑް-19ށް މިއުޓޭޝަންސް އަންނާނެ ކަމީ ޔަގީންކަމެއް ކަމަށް ޑރ. ޝާހް ވިދާޅުވިއެވެ. އެޗްއީއޯސީން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ޑރ. ޝާހް ވިދާޅުވީ އިންޑިއާގައި މިހާރު ދިމާވެގެން މިއުޅެނީ މި މައްސަލަ ކަމަށާއި، ރާއްޖެ އަށް މި މައްސަލަ ދިމާވާނެ ކަމަށެވެ.

Advertisement

މި ބައްދަލުވުމުގައި ވާހަކަދައްކަވަމުން ޑރ. ޝާހް ވަނީ ރާއްޖޭގައި އައު ވޭރިއަންޓް އުޅޭތޯ ބެލުމުގެ މަސައްކަތް ކުރަމުންދާ ކަމަށާއި އަންހަ ހަފްތާގެ ތެރޭގައި އިތުރު ސާމްޕަލްތައް ޓެސްޓުކުރުމަށް ބޭރަށް ފޮނުވާނެ ކަމަށެވެ.

މިބައްދަލުވުމުގައި ވާހަކަދައްކަވަމުން އެޗްއީއޯސީގެ ޓެކްނިކަލް އެޑްވައިޒަރީ ގްރޫޕްގެ ޑރ. ނަޒްލާ މުސްތަފާ ވަނީ މާލެ ސަރަހައްދުގައި މިގޮތަށް ކޭސްތައް ގިނަވަމުންދާނަމަ ވެކްސިން ޖަހައިގެން ތިބި ނަމަވެސް ވެކްސިނަށް ނުގުޑާ ބާވަތެއް އަށަގަތުމުގެ ފުރުސަތު އޮންނާނެ ކަމަށް ވިދާޅުވެފައެވެ. އެހެންކަމުން މާލެ ސަރަހައްދުގައި އަޅާފައިވާ ރައްކާތެރިކަމުގެ ފިޔަވަޅުތައް އިތުރަށް ވަރުގަދަކޮށް ހަރުދަނާކުރަން ޖެހޭ ކަމަށް ޑރ. ނަޒްލާ ވިދާޅުވިއެވެ. އަދި ވެކްސިން ޖެހިނަމަވެސް މާސްކު އެޅުމާއި ގައިދުރުކަން ބަހައްޓަން ޖެހޭނެ ކަމަށް ވިދާޅުވިއެވެ.

އިންޑިއާއިން ފެނުނު އައު ވޭރިއަންޓުގައި ދެ މިއުޓޭޝަނެއް ހިމެނޭ ކަމަށް ސައިންވެރިން ބުނާއިރު، މި ވޭރިއަންޓަށް މިހާރު އުފައްދާފައިވާ ވެކްސިންތަކުން ކުރާ އަސަރު ކުޑަ ކަމަށް ވެސް ސައިންސްވެރިން ބުނެއެވެ. އައު ވޭރިއަންޓާކު އިންޑިއާގެ ކޮވިޑް ކޭސްތައް ވަނީ އިންތިހާއަށް އިތުރުވާން ފަށާފައެވެ. އަދި އިންޑިއާގެ ކޮވިޑް ވޭރިއަންޓް ކުރިއަށް އޮތް ހަފުތާތަކުގެ ތެރޭގައި މުޅި ދުނިޔެއަށް ފެތުރިގެން ދިއުމުގެ ފުރުސަތު ބޮޑުކަމަށް ވެސް މާހިރުން ބުނެއެވެ.

ރާއްޖެއިން ކޮންމެ ދުވަހަކު ފެންނަމުންދާ ކޭސްތަކުގެ އަދަދު މައްްޗަށް އަރާފައިވާއިރު، އެކްޓިވް ކޭސްތަކުގެ އަދަދު ވަނީ މިހާރު 4396ށް އަރާފައެވެ.