މަންދު ކޮލެޖަށް ބަދަލުގެ ގޮތުގައި އެންމެ ގިނަވެގެން ދޭންޖެހެނީ 1.5 މިލިއަން ރުފިޔާ
27 އެޕްރީލު 2021 | އަންގާރަ 11:56އެކި ކަންކަން ހިމެނޭ ގޮތަށް 4.6 މިލިއަން ރުފިޔާ އެކިފަހަރު މަތިން ވަނީ ދީފައި
އިބްރާހީމް އިސްމާއީލް - ބައެއް ބަދަލުތަކަކީ މީގެ ކުރިންވެސް ބަދަލު ދެވިފައިވާ ކަންކަންކަމަށް އޮޑިޓް އެސެސްމެންޓްގައި ފާހަގަކޮށްފައިވޭ
މަންދު ކޮލެޖް ހިންގި އިމާރާތް، އޭރުގެ ސަރުކާރުން ކުއްލި ގޮތަކަށް އަތުލުމުގެ ސަބަބުން ލިބުނު ގެއްލުމުގެ ބަދަލުގެ ގޮތުގައި އެންމެ ގިނަވެގެންވެސް ދޭން ޖެހޭނީ 1.5 މިލިއަން ރުފިޔާކަމަށް އޮޑިޓް އޮފީހުގެ އެސެސްމެންޓްގައި ބުނެފި އެވެ.
2020ވަނަ އަހަރުގެ ސެޕްޓެމްބަރު މަހުގެ 20 ވަނަ ދުވަހު އޮޑިޓަރ ޖެނެރަލް ހަސަން ޒިޔާތު ސޮއި ކުރައްވާފައިވާ މި އެސެސްމެންޓްގައިވާ ގޮތުން އެމްއީއެސް އިމާރާތުގެ އެއްބަސްވުން، މިނިސްޓްރީ އޮފް އެޑިއުކޭޝަނުން އުވާލާފައިވަނީ އެ އެއްބަސްވުމާ ޚިލާފަށްކަމަށް ކަނޑައެޅިގެންދާ ހާލަތެއްގައިވެސް އެ ކުންފުންޏަށް ގެއްލުމުގެ ބަދަލުގައި އެންމެ ގިނަވެގެން ދޭންޖެހޭނީ، އެއް މިލިއަން ދުއިސައްތަ ހަތްދިހަ ނުވަ ހާސް ހަ ސަތޭކަ އެކާވީސް (1،279،621) ރުފިޔާއާއި އެއް މިލިއަން ފަސް ލައްކަ އަށްޑިހަ އެއް ހާސް ހަތަރު ސަތޭކަ ހަތްދިހަ ފަސް (1،581،475) ރުފިޔާ ކަމަށެވެ.
އޮޑިޓް އޮފީހުން ހަދާފަައިވާ މި އެސެސްމެންޓްގައި، މަންދު ކޮލެޖްގެ އެއްބަސްވުން ބާތިލްކުރުމާ ގުޅިގެން ކުރިމަތިވި ކަންކަމަށް ވަކިވަކިން ބަލާފައިވާއިރު، އެގޮތުން މަންދު ކޮލެޖް ހިންގާ މާލޭ ހައި ޕްރައިވެޓް ލިމިޓެޑަށް މީގެކުރިން އެކިފަހަރު މަތިން ބަދަލު ދީފައިވާކަންވެސް ފާހަގަކޮށްފައިވެއެވެ. އެގޮތުން އެކި ކަންކަން ހިމެނޭ ގޮތަށް 4.6 މިލިއަން ރުފިޔާ އެކިފަހަރު މަތިން ދީފައިވެއެވެ.
މަންދު ކޮލެޖްގެ ފަރުނީޗަރުތަކެއް ގެއްލިފައިވާތީ އޭގެ ބަދަލު ހޯދުމަށް އެ ކުންފުނިން ސިވިލް ކޯޓުގައި ދައުވާކުރުމުން، ބަދަލުގެ ގޮތުގައި ހަތަރު ލައްކަ ރުފިޔާ އެޑިއުކޭޝަން މިނިސްޓްރީން އެ ކުންފުންޏަށް ދެއްކި ކަމަށް އެސެސްމެންޓްގައިވެއެވެ.
މީގެ އިތުރުން އެމްއީއެސްގެ އިމާރާތުގައި އަރަބިއްޔާ ސްކޫލް ހިންގުމަށް ވަގުތީ ގޮތުން ބޭނުން ކުރަމުން ދިޔަ ބައިތައް މަންދު ކޮލެޖާއެކުވީ އެއްބަސްވުމާ އެއްގޮތަށް ހުސްނުކޮށް ލަސްވުމުން، ލިބުނު ގެއްލުމުގެ ބަދަލުގައިވެސް މަންދު ކޮލެޖަށް ސިވިލް ކޯޓު މެދުވެރިކޮށް ތިން މިލިއަން ރުފިޔާ، އެޑިއުކޭޝަން މިނިސްޓްރީން ދީފައިވެއެވެ.
މަންދު ކޮލެޖްގެ ކަރަންޓާ ގުޅިގެން މަރާމާތު މަސައްކަތްތަކަށް ދެލައްކައަށްވުރެ ގިނަ ރުފިޔާ ދީފައިވެއެވެ. އަރަބިއްޔާ ހިންގުމަށް އެ ކޮލެޖުން ދޫކުރި ބައި އެ ސްކޫލުން ހުސްކުރުމުން އެބައިތައް މަރާމާތު ކުރުމަށްވެސް ދެލައްކަ އަށްވުރެ ގިނަ ރުފިޔާ ދީފައިވެއެވެ.
އޮޑިޓްގައިވާ ގޮތުން، އެކިއެކި ގެއްލުންތަކުގެ ސަބަބުން ބަދަލުގެ ގޮތުގައި ހޯދުމަށް މަންދު ކޮލެޖުން ސަރުކާރަށް ޖުމްލަ 243 މިލިއަން ރުފިޔާ ހޯދުމަށް ހުށަހަޅާފައިވެއެވެ. އޭގެ ތެރޭގައި، އަރަބިއްޔާ ސްކޫލް ހިންގަން ދޫކުރި ބައި ހުސްކުރުން ލަސްވުމުން ލިބުނު ބަދަލާއި ފަރުނީޗަރުތަކުގެ ބަދަލާއި އެމްއީއެސް އިމާރާތުގައި ހުރި ހަރުމުދަލާއި އިންވެންޓްރީގެ ބަދަލާއި، އެހެން ތަނެއް ކުއްޔަށް ހިފަންޖެހުމުން ކުލީގެ ގޮތުގައި ހޯދުމަށް ހުށަހަޅާފައިވާ އަދަދާއި، ކޮލެޖަށް ވަން ދަރިވަރުން މަދުވިކަމުގެ ބަދަލާއި، އާމްދަނީ ދަށްވުމުގެ ބަދަލުގެ އިތުރުން ބިޒްނަސް ގްރޯވްތް ދަށްވުމުގެ ބަދަލު ހިމެނެއެވެ.
އެހެންނަމަވެސް އޮޑިޓް އެސެސްމެންޓްގައި ނަގައިދޭން ޖެހޭ ބަދަލުގެ ގޮތުގައި ފާހަގަކޮށްފައިވަނީ، އެމްއީއެސްގެ އިމާރާތަށް ކުރި އިންވެސްޓްމެންޓްގެ އަގުގެ ގޮތުގައި ކެޕިޓަލައިޒްކޮށްފައިވާ 1.4 މިލިއަން ރުފިޔާކަމަށެވެ.
އޭގެ ބޭރުން، ބަދަލު ހޯދަން އެދިފައިވާ އެހެން ބަދަލުގެ ތެރެއިން ބައެއް ބަދަލުތަކަކީ މީގެ ކުރިންވެސް ބަދަލު ދެވިފައިވާ ކަންކަންކަމަށާއި ވިޔަފާރިއަށް ލިބުނު ގެއްލުންފަދަ ގެއްލުންތަކުގެ ޒިންމާ، ދައުލަތުން އުފުލަން ޖެހޭކަމަށް ގަބޫލު ނުކުރެވޭ ކަމަށެވެ.
މަންދު ކޮލެޖް ހިންގަމުން އައި އެމްއީއެސް އިމާރާތުގެ އެއްބަސްވުން 2015ވަނަ އަހަރު ބާތިލް ކޮށްފައިވަނީ ރަނގަޅަށްކަމަށް ސިވިލްކޯޓުން ކުރި ހުކުމް ހައި ކޯޓުންވަނީ ބާތިލް ކޮށްފައެވެ. އަދި މިއަހަރުގެ ތެރޭގައި ހައިކޯޓުގެ ހުކުމް ދަމަހައްޓައި ސުޕްރީމް ކޯޓުންވަނީ އެ އެއްބަސްވުން ބާތިލްކުރީ ގޯސްކޮށްކަމަށް ކަނޑައަަޅާފައެވެ. އަދި އޭގެ ބަދަލު ހޯދުމަށް މަންދު ކޮލެޖަށް ވަކިން ދައުވާ ކުރެވޭނެ ކަމަށްވެސް ކަނޑައެޅިއެވެ.
އެއާއެކު މަންދު ކޮލެޖުން އެދުނީ ބަދަލުގެ ގޮތުގައި 18 މިލިއަން ރުފިޔާ ދައުލަތުން ނަގައިދިނުމަށެވެ. މި މައްސަލާގައި ޑިސްޕިއުޓް ރިޒޮލިއުޝަން މަރުހަލާގައި ދައުލަތުން އެއްބަސްވީ، 15 މިލިއަން ރުފިޔާގެ ބަދަލެއް އެއްމަސްދުވަހުގެ ތެރޭގައި ދިނުމަށެވެ.
އޮޑިޓަރ ޖެނެރަލް އޮފީހުން މި އޮޑިޓް ކުރިއަށް ގެންގޮސްފައިވަނީ، މަންދަށް ބަދަލުގެ ގޮތުގައިދޭން ޖެހޭ ފައިސާގެ އަދަދު ބަލައި ވަޒަންކުރުމަށް މިނިސްޓްރީ އޮފް އެޑިއުކޭޝަނުން އެދިފައިވާތީއެވެ.
