މަލީހު ދެއްކެވީ ހަގީގަތާ ޚިލާފު ވާހަކައެއް ނަމަވެސް ފިޔަވަޅު ނޭޅުމަށް ނިންމައިފި
މަޖިލީހަށާއި ކޮމިޓީއަށް ގަސްދުގައި އޮޅުވާލާފައިވާކަމަށް މެމްބަރުންގެ އިއްތިފާގުން ފާސްކޮށްފައިވޭ
މުހައްމަދު މަލީހު ޖަމާލް - މައްސަލަ ދިރާސާކޮށް ނިންމިގޮތަށް ފާސްކޮށްފައިވަނީ އެ ވޯޓުގައި ބައިވެރިވެވަޑައިގެންނެވި 51 މެމްބަރުންގެ ތެރެއިން 48 މެމްބަރުންގެ އަގުލަބިއްޔަތުން
ކުރީގެ ސައިންސް އެންޑް ކޮމިޔުނިކޭޝަން މިނިސްޓަރު މުހައްމަދު މަލީހު ޖަމާލް ރައްޔިތުންގެ މަޖިލީހުގައި ދައްކާފައިވަނީ އެއްވެސް ހަގީގަތެއްނެތް ވާހަކަތަކެއް ނަމަވެސް އެކަމަށް އެއްވެސް ފިޔަވަޅެއް ނާޅަން ފާސްކޮށްފިއެވެ.
ކޮމިޓީ ރިޕޯޓު ހުށަހަޅުއްވަމުން ކޮމިޓީގެ މުގައްރިރު، ކުޅުދުއްފުށި އުތުރު ދާއިތާގެ މެމްބަރު ޔާސިރު އަބްދުއްލަތީފު ވިދާޅުވީ، ކުރީގެ މިނިސްޓަރ މަލީހު މަޖިލީހުގެ ތަޅުމުގައި ދެއްކެވީ ހަގީގަތާ ޚިލާފު ވާހަކަތަކެއް ކަމަށް ނިންމައި މައްސަލަ ފައިލްކުރުމަށް ކޮމިޓީން ނިންމާފައިވާކަމަށެވެ.
މައްސަލަ ދިރާސާކޮށް ނިންމިގޮތަށް ފާސްކޮށްފައިވަނީ އެ ވޯޓުގައި ބައިވެރިވެވަޑައިގެންނެވި 51 މެމްބަރުންގެ ތެރެއިން 48 މެމްބަރުންގެ އަޣުލަބިއްޔަތުންނެވެ. އެ ރިޕޯޓާ ދެކޮޅަށް އެއް މެމްބަރަކު ވޯޓު ދެއްވިއިރު، ވަކި ގޮތަކަށް ވޯޓު ނުދެއްވާ ދެ މެމްބަރުން ވެސް ތިއްބެވިއެވެ.
މަލީހުގެ މައްސަލަ އިމްތިޔާޒާއި ސުލޫކު ކޮމިޓީން ބަލަން ނިންމީ، މަލީހުގެ އިތުބާރުނެތް ކަމުގެ މައްސަލައިގައި ރައްޔިތުންގެ މަޖިލީހުން ކަނޑައެޅިގެން ވަޒީރުންނަށާއި ސަރުކާރަށް ބިރުދައްކަމުންދާ ކަމަށާއި، ތަކުރާރުކޮށް ވަޒީރުންނަށް އެބޭފުޅުންގެ މަސްއޫލިއްޔަތު އަދާކުރުމަށް ހުރަސް އަޅާ ބިރުދައްކަމުންދާކަމަށް ތުހުމަތުކުރެއްވުމުންނެވެ. އަދި ކުރީގެ ޖެންޑާރ މިނިސްޓަރު ޝިދާތާ ޝަރީފް މަގާމުން އިސްތިއުފާ ދެއްވަން މަޖުބޫރުވީ ވެސް އެކަމުގެ ސަބަބުން ކަމަށް މަލީހު އެ ދުވަހު ވިދާޅުވިއެވެ.
މަލީހުގެ އިތުބާރުނެތް ކަމަށް ފާސްކޮށް އޭނާ ވަކި ކުރުމަށްފަހު، އޭނާ ކުރެއްވި ތުހުމަތުތަކުގެ ހަގީގަތް ބަލަން މަޖިލީހުގެ އިމްތިޔާޒާއި ސުލޫކު ކޮމިޓީން ފެށިއެވެ.
މިދިޔަ މާރޗް މަހު މަލީހު ކޮމިޓީއަށް ހާޒިރުކުރުމުން ވެސް މަލީހު ދެއްކެވީ ހިޔާލުފާޅުކުރުމަށް ގާނޫނު އަސާސީން ލިބިދޭ ހައްގުގެ ވާހަކައެވެ. އަދި ކޮމިޓީން ކުރި ސުވާލުތަކަށް ސީދާ ޖަވާބުދާރީވުމަށް އުޒުރުވެރިވި ކަމަށް ރިޕޯޓުގައި ވަނީ ފާހަގަކޮށްފައެވެ. އެހެންކަމުން އެދުވަހު މަޖިލީހުގެ ތަޅުމުގައި ދައްކަވާފައި ވަނީ އެއްވެސް އަސާސެއްނެތް ވާހަކަތަކެއްކަން ކޮމިޓީގެ 6 މެމްބަރުންގެ އިއްތިފާގުންވަނީ ފާސްކޮށްފައެވެ.
އެހެންކަމުން އޭނާ މަޖިލީހަށާއި ކޮމިޓީއަށް ގަސްދުގައި އޮޅުވާލާފައިވާކަމަށް މެމްބަރުންގެ އިއްތިފާގުން ފާސްކޮށްފައިވާކަމަށް ރިޕޯޓުގައި ބުންޏެވެ.
އިމްތިޔާޒު ގާނޫނުގައި ބުނަނީ މަޖިލީހަށް ނުވަތަ ކޮމިޓީއަށް ގަސްދުގައި ކަމެއް އޮޅުވާލުމަކީ ކުށެއް ކަމަށާއި، އެފަދަ ކުށެއް ކުރި މީހެއްގެ އަދަބަކީ 3،000 ރުފިޔާއާއި 10،000 ރުފިޔާގެ އަދަދަކުން ޖޫރިމަނާ ކުރުން ނުވަތަ ތިންމަސް ދުވަހާއި ހަމަސް ދުވަހުގެ މުއްދަތަކަށް ޖަލަށްލުން ކަމަށެވެ.
