ފުލުހުންގެ ޚިދުމަތުގެ އިސްތިއުނާފު ކޮމެޓީ އެކުލަވާލައިފި

އަލަށް އަމަލުކުރަންފެށުނު ދިވެހި ފުލުހުންގެ ޚިދުމަތުގެ ގާނޫނުގެ ދަށުން، ފުލުހުންގެ ޚިދުމަތުގެ އިސްތިއުނާފު ކޮމެޓީ އެކުލަވާލައިފިއެވެ.

ހޯމް މިނިސްޓްރީން ބުނީ، އަންގާރަ ދުވަހު، ހޯމް މިނިސްޓަރު އިމްރާން އަބްދުﷲ ފުލުހުންގެ ޚިދުމަތުގެ އިސްތިއުނާފު ކޮމެޓީއަށް ފަސް މެންބަރުން އައްޔަނު ކުރައްވާފައިވާކަމަށެވެ.

ފުލުހުންގެ ޚިދުމަތުގެ ގާނޫނުގެ ދަށުން އެކުލަވާލެވުނު ފުލުހުންގެ ޚިދުމަތުގެ އިސްތިއުނާފު ކޮމެޓީއަށް ހޯމް މިނިސްޓަރު އައްޔަނުކުރެއްވި މެންބަރުންނަކީ، ޑެޕިއުޓީ ކޮމިޝަނަރ އޮފް ޕޮލިސް (ރޓ) މުޙައްމަދު ޞާދިޤާއި, ގދ. ރަތަފަންދޫ، ޗަނބޭލީވިލާ އަލްއުސްތާޛު އަޒްމީން ރަޝީދާއި، މ. ސަލްޖަމްގެ ފާތިމަތު ލީނާއާއި، މ. ލިލީސް އަލްއުސްތާޛާ މިންނާ ނާފިޒްގެ އިތުރުން ހއ. ހޯރަފުށި، ބްލެސް އަލްއުސްތާޛު އަހްމަދު ޝިހާދުއެވެ.

ފުލުހުންގެ ޚިދުމަތުގެ ގާނޫނުގެ 89 ވަނަ މާއްދާގެ (ހ) ދަށުން އެ ގާނޫނަށް އަމަލުކުރަން ފަށާތާ 30 ދުވަހުގެ ތެރޭގައި ޕޮލިސް ބޯޑުގެ ލަފާގެ މަތިން އިސްތިއުނާފު ކޮމެޓީއެއް އެކުލަވާލުމަށް ހޯމް މިނިސްޓަރުގެ މައްޗަށް ލާޒިމްކުރެއެވެ. މި ކޮމެޓީއަކީ ޑިސިޕްލިނަރީ ބޯޑުން ނިންމާ ނިންމުންތައް އިސްތިއުނާފު ކުރުމަށްޓަކައި އާންމު ރައްޔިތުންގެ ތެރެއިން ނަގާ ފަސް މެންބަރުންގެ މައްޗަށް އެކުލެވޭ ކޮމެޓީއެކެވެ.

ދިވެހި ފުލުހުންގެ ޚިދުމަތުގެ އައު ގާނޫނަށް އަމަލުކުރަން ފެށީ މާޗު މަހުގެ 27 ވަނަ ދުވަހުއެވެ. މިގާނޫނު ތަސްދީގުކޮށްފައިވަނީ މިދިޔަ އަހަރުގެ ޑިސެމްބަރ މަހުގެ 27 ވަނަ ދުވަހުއެވެ. ރައްޔިތުންގެ މަޖިލީހުން މި ގާނޫނު ފާސްކޮށްފައިވަނީ މިދިޔަ އަހަރުގެ ޑިސެމްބަރު މަހުގެ ހަވަނަ ދުވަހުއެވެ.