މޯލްޑިވްސް ޓްރާންސްޕޯޓް އޮތޯރިޓީ އުވާލުމަކީ ފަހަތަށް އެޅޭ ފިޔަވަޅެއްކަމަށް ޓްރާންސްޕޯޓް މިނިސްޓްރީގެ ޑެޕިއުޓީ މިނިސްޓަރ ހަމަދު އަބްދުލްޣަނީ ވިދާޅުވެއްޖެއެވެ.

ޓްރާންސްޕޯޓް މިނިސްޓްރީގެ ހިންގުން ހަރުދަނާކުރުމަށް ޓްރާންސްޕޯޓް އޮތޯރިޓީގެ ގާނޫނު އުވާލުމަށް ސަރުކާރުގެ ފަރާތުން ވަނީ ރައްޔިތުންގެ މަޖިލީހަށް ބިލެއް ހުށަހަޅާފައެވެ. މިބިލް ދިރާސާކުރަމުންދަނީ ގައުމީ ތަރައްގީ އާއި ތަރިކައިގެ ކޮމިޓީ އާއި ލާމަރުކަޒީ ކޮމިޓީގެ ޖޮއިންޓް ކޮމިޓީއަކުންނެވެ. އެ ކޮމިޓީން ހޯމަ ދުވަހު ބޭއްވި ބައްދަލުވުމުގައި ވަނީ މިބިލް އުވާލުމާއި ގުޅޭގޮތުން މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަނާއި މޯލްޑިވްސް ޓްރާންސްޕޯޓް އޮތޯރިޓީ އާއި އެޓަރނީ ޖެނެރަލް އަދި ލޯކަލް ގަވަރމެންޓް އޮތޯރިޓީ (އެލްޖީއޭ)އާ ބައްދަލުކޮށް މަޝްވަރާކުރައްވާފައެވެ.

މި ބައްދަލުވުމުގައި ޓްރާންސްޕޯޓް މިނިސްޓްރީގެ ބޭފުޅުން ވިދާޅުވީ ޓްރާންސްޕޯޓް އޮތޯރިޓީގެ ގާނޫނު އުވާލަނީ ޓްރާންސްޕޯޓް އޮތޯރިޓީ އާއި މިނިސްޓްރީން ކުރަމުންދާ މަސައްކަތްތަކުގައި ފުށުއެރުންތަކެއް ހުރުމުގެ ސަބަބުން ކަމަށެވެ. އަދި ޓްރާންސްޕޯޓް އޮތޯރިޓީގެ ބޯޑުން މިނިސްޓަރ ބޭނުންފުޅުވާ ގޮތަށް ސިޔާސަތުތައް ތަންފީޒުކުރަމުން ނުދާކަމަށާއި މިނިސްޓަރުގެ ބަސް ނުވިކޭކަމަށް ވަނީ ވިދާޅުވެފައެވެ.

އެކަމާއި ގުޅޭގޮތުން ވާހަކަދައްކަވަމުން އެ މިނިސްޓްރީގެ ޑެޕިއުޓީ މިނިސްޓަރ ހަމަދު އަބްދުލްޣަނީ ވިދާޅުވީ ޓްރާންސްޕޯޓް އޮތޯރިޓީގެ ގާނޫނު އުވާލުމުގެ ވިސްނުމަކަށް އެންމެ ފުރަތަމަ ދިޔައީ އޮތޯރިޓީ އާއި މިނިސްޓްރީގެ މެންޑޭޓްގެ ތެރޭގައި ފުށުއަރާ ކަންތައްތަކެއް ހުރުމުން ކަމަށެވެ. ޓްރާންސްޕޯޓް އޮތޯރިޓީއަކީ ކުރީގެ ރައީސް އަބްދުﷲ ޔާމީން ޓްރާންސްޕޯޓް މިނިސްޓްރީ އުވާލުމަށްފަހު އުފެއްދެވި ތަނެކެވެ. އޭގެފަހުން މިސަރުކާރު އައުމަށްފަހު ވަނީ ޓްރާންސްޕޯޓް މިނިސްޓްރީ އަލުން އުފައްދަވާފައެވެ.

ހަމަދު ވިދާޅުވީ މިނިސްޓްރީގެ ސިޔާސަތުގެ ދަށުން ކުރަންޖެހޭ ކަންކަން ހާސިލްނުކުރެވޭ ކަމަށެވެ. އެގޮތަށް ކަންތައްވަނީ ޓްރާންސްޕޯޓް އޮތޯރިޓީގެ މެންޑޭޓްގެ ދަށުން އުދައްފާއިވާ ބޯޑުން އަމިއްލަ ކަންތައްތަކެއް ކުރަމުންދާތީ ކަމަށް ހަމަދު ވިދާޅުވިއެވެ.

އިންޓަރނޭޝަނަލް ބެސްޓް ޕްރެކްޓިސްއަށް ބަލާލާއިރު ދަތުރުފަތުރާ ގުޅުންހުރި ކަންކަން އަބަދުވެސް ބަލަމުންދާނީ މިނިވަން ސިޔާސީ ނުފޫޒުން އެއްކިބާވެފައިވާ ތަނަކުން ކަމަށް ހަމަދު ވިދާޅުވިއެވެ. ނަމަވެސް ރާއްޖެއަށް ބަލާނަމަ ޓްރާންސްޕޯޓް އޮތޯރިޓީގެ ތެރޭގައި ވަރަށް ބޮޑަށް ކޮރަޕްޝަން އަށަގެންފައި އޮތުމާއި އެކަމުން އަރައިގަތުމަށް އޮތް ހައްލަކީ އެތަން އުވާލާ އެތަނުން ކުރަމުންދިޔަ މަސައްކަތްތައް މިނިސްޓްރީގެ ދަށަށް ގެނައުން ކަމަށް ހަމަދު ވިދާޅުވިއެވެ. އަދި ފަހުން މިނިވަން ތަނެއް އުފެއްދުންކަމަށް ވެސް ވިދާޅުވިއެވެ.

ކޮމިޓީގައި މެމްބަރުން އެންމެ ބޮޑަށް ފާހަގަކުރެއްވި ކަމަކީ މައްސަލަ އޮތީ އޮތޯރިޓީގެ ބޯޑާއި މިނިސްޓަރާ ދެމެދު ކަމަށްވާއިރު ގާނޫނު އުވާލުމަށް މިނިސްޓްރީން ބޭނުންވާ ސަބަބާމެދުއެވެ. އެކަން ސާފުނުވާކަމަށް ތަކުރާރުކޮށް މެމްބަރުން ގެންދެވީ ވިދާޅުވަމުންނެވެ. އެގޮތުން ހޯރަފުށީ ދާއިރާގެ މެމްބަރު އަހުމަދު ސަލީމް ވަނީ ބޯޑު އުވާލުމުގެ ބާރު ރައީސަށް ލިބިދޭއިރު އަދި ޓްރާންސްޕޯޓް އޮތޯރިޓީ އުވާލުމަކީ ގުޑް ގަވަރނަންސްގައި ރާއްޖެއިން ފަހަތަށް އަޅާ ފިޔަވަޅެއްކަމަށް މިނިސްޓްރީން ދެކޭއިރު މިކަން ކުރެވެނީ ރަނގަޅަށްތޯ މިނިސްޓްރީއާ ސުވާލުކުރައްވާފައެވެ.

އެސުވާލަށް ޖަވާބު ދެއްވަމުން ހަމަދު ވިދާޅުވީ އެއީ ފަހަތަށް އެޅޭ ފިޔަވަޅެއް ކަމަށެވެ. އަދި މިނިސްޓްރީއެއް އޮވެ އޮތޯރިޓީއެއް އޮވުމުން ކަންކަން ރަނގަޅަށް ކުރިއަށް ނުދާކަމަށް ހަމަދު ވިދާޅުވިއެވެ.

ޓްރާންސްޕޯޓް އޮތޯރިޓީގެ ބޯޑަށް މެމްބަރުން އައްޔަންކޮށް ވަކިކުރުމުގެ ބާރު އެގާނޫނުން ލިބިދެނީ ރައީސުލްޖުމްހޫރިއްޔާއަށެވެ. އަދި ބޯޑު ހިނގަމުންދާންވާނީ މިނިސްޓަރުގެ ބެލުމުގެ ދަށުންކަމަށް ގާނޫނުގައި ބުނެފައިވެއެވެ.

އެހެންކަމަށްވާއިރު މުޅި ގާނޫނު އުވާނުލާ ބޯޑުގައި ތިބި ބަޔަކު ބަދަލުކޮށްގެން އެކަން ނުވާނެތޯ މެމްބަރުން ވަނީ ތަކުރާރުކޮށް ސުވާލުކުރައްވާފައެވެ. އެކަމަށް ޖަވާބު ދެމުން މިނިސްޓްރީން ފާހަގަކުރަމުން އައީ ދެ ފަރާތުގެ މަސައްކަތުގައި ފުށު އެރުންތަކެއް ހުރުމާއި އޮތޯރިޓީގެ މަސައްކަތްތަކުގައި ލަސްތަކެއް ހުރުމެވެ. އަދި މިނިސްޓަރ އަންގަވާގޮތަށް އޮތޯރިޓީގެ ބޯޑުން މަސައްކަތްތައް ކުރަމުން ނުދިޔުމެވެ. އޮތޯރިޓީގެ ގާނޫނު އުވާލުމަށް މިނިސްޓްރީން ބޭނުންވަނީ ގާނޫނުގައި މައްސަލަތަކެއް އުޅޭތީ ނޫންކަމަށް މިނިސްޓްރީގެ ބޭފުޅުން ވަނީ ވިދާޅުވެފައެވެ.

ސަރުކާރުން އެކުލަވާލާފައިވާ ސްޓްރެޓިޖިކް އެކްޝަން ޕްލޭންގެ ދަށުން ޓްރާންސްޕޯޓް މިނިސްޓްރީގެ ދަށުން ހިންގާ ވަޔާއި އެއްގަމާއި ކަނޑުގެ ދަތުރުފަތުރާ ގުޅޭ އެންމެހާ ކަންކަން މިހާރަށްވުރެ ހަރުދަނާކުރުމަށް ވަކި ގާނޫނުތަކަކުން ވަކިވަކި ބޯޑުތަކެއް އެކުލަވާލުމަށް ވަނީ ހިމަނާފައެވެ.