މާލެއިން ފެނުނު ކޭސްތައް 147ށް ޖުމްލަ 253 ކޭސް
25 އެޕްރީލު 2021 | އާދީއްތަ 17:28މާލެ ސަރަހައްދުން 147 ކޭސް ވަނީ ފެނިފައި
ކޮރޯނާވައިރަސް މުޅި ދުނިޔޭގައި ފެތުރެމުންދާއިރު ރާއްޖޭގައިވެސް ވަނީ ރައްކާތެރިކަމުގެ ފިޔަވަޅުތައް އަޅާފައި --- ފޮޓޯ : ޔޫސުފް ސޮފްވާން
ފާއިތުވެދިޔަ 24 ގަޑިއިރު ރާއްޖެއިން 253 މީހުން ކޮވިޑް-19ށް ޕޮޒިޓިވްވެފައިވާ ކަމަށް އެޗްޕީއޭގެ ތަފާސްހިސާބުތަކުން ދައްކައިފިއެވެ.
އެޗްޕީއޭއިން އާންމުކުރި ތަފާސްހިސާބުތައް ދައްކާގޮތުން އެންމެ ގިނައީ އަތޮޅުތެރެއިން ރިޕޯޓުކުރި ކޭސްތަކެވެ. ހޮނިހިރު ދުވަހު އިރުއޮއްސި ހަޔަކުން ފެށިގެން އާދިއްތަ ދުވަހު އިރުއޮއްސި ހަޔަކަށް ނެގި 3،485 ސާމްޕަލްގެ ތެރެއިން ޕޮޒިޓިވްވި 253 މީހުންގެ ތެރޭގައި ހިމެނެނީ އަތޮޅުތެރެއިން 35 ކޭސްއާއި މާލެ ސަރަހައްދުން 147 ކޭސް އަދި ރިސޯޓުތަކުން 31 ކޭހެވެ. އަދި އިންޑަސްޓްރިއަލް ރަށްރަށުންވެސް 40 ކޭސް ވަނީ ފެނިފައެވެ.
ރާއްޖޭގެ ކޭސްތަކުގެ އަދަދު އަނެއްކާވެސް އިތުރުވެފައިވާއިރު މިދިޔަ ދެ ދުވަހު އަތޮޅުތެރެއިން ވަނީ 200އާ ގާތްކުރާ އަދަދަކަށް މީހުން ޕޮޒިޓިވްވެފައެވެ. އަނެއްކާ މިއަދު މިވަނީ މާލެ ސަރަހައްދުން ފެނުނު ކޭސްތަކުގެ އަދަދު އިތުރުވެފައެވެ.
އާދިއްތަ ދުވަހު ރިޕޯޓުކުރި 253 ކޭސްއާއެކު މުޅި ރާއްޖެއިން ޖުމްލަ އަދަދު ވަނީ 27،847ށް އަރާފައެވެ. އަދި އޭގެ ތެރެއިން 24،309 މީހަކު ބަލިން ރަނގަޅުވެފައިވާއިރު، މިވަގުތު ފަރުވާދެމުން އަންނަނީ 3،485 މީހަކަށެވެ. އޭގެ ތެރެއިން 123 މީހުންނަށް ފަރުވާދެނީ އެޑްމިޓްކޮށްގެންނެވެ. އަދި ރާއްޖޭގައި މިހާތަނަށް 71 މީހަކު ވަނީ މަރުވެފައެވެ.
