ހުޅުމާލެއިން ވަގަށް ނަގާފައިވާ ޑޮލަރު ތަކެއް ހޯދައި މީހަކު ހައްޔަރުކޮށްފި
6 އެޕްރީލު 2017 | ބުރާސްފަތި 01:33ހައްޔަރުކޮށްފައިވަނީ 22 އަހަރުގެ ދިވެހި ފިރިހެނެއް
ފުލުހުން ހޯދި ޑޮލަރުތައް
ވަގަށް ނަގާފައިވާކަމަށް ބެލެވޭ 1400 ޑޮލަރު ހޯދައި މީހަކު ހުޅުމާލެ ފުލުހުންގެ ބެލުމުގެ ދަށަށް ގެނެސްފިއެވެ.
މި މައްސަލައާ ގުޅިގެން ފުލުހުންގެ ބެލުމުގެ ދަށަށް ގެނެސްފައިވަނީ 22 އަހަރުގެ ދިވެހި ފިރިހެނެކެވެ.
މިމަހުގެ 2 ވަނަ ދުވަހު ފުލުހުންނަށް މިމައްސަލަ ހުށަހެޅުމާއި ގުޅިގެން ފުލުހުން ކުރިއަށް ގެންދިޔަ ތަހްޤީޤުން އެތަކެތި ފެނިފައިވަނީ މިމައްސަލައާ ގުޅިގެން ފުލުހުންގެ ބެލުމުގެ ދަށަށް ގެނެސްފައިވާ މީހާ ދިރިއުޅޭ ފްލެޓް ބަލައި ފާސްކުރިކުރުމުން ކަމަށް ފުލުހުން ބުންޏެވެ.
ފުލުހުން ބުނީ ވަގަށް ނަގާފައިވާ ފައިސާތައް މިހާރުވަނީ އެއިގެ ވެރިފަރާތާއި ހަވާލުކޮށްފައި ކަމަށެވެ.
މި މައްސަލައާ ގުޅިގެން ފުލުހުންގެ ބެލުމުގެ ދަށަށް ގެނެސްފައިވާ މީހާގެ ބަންދާމެދު ގޮތެއްނިންމުމަށް ކްރިމިނަލް ކޯޓަށް ހާޟިރުކުރުމުން މިނިސްޓްރީ އޮފް ހޯމްއެފެއާޒުން ކަނޑައަޅާ ތަނެއްގައި ބަންދުގައި ބަހައްޓައިގެން ތަޙްޤީގު ކުރިއަށް ގެންދިއުމަށް 5 ދުވަހުގެ މުއްދަތެއް ދީފައިވެއެވެ.
