ޓެކްނިކަލް އަދި ވޮކޭޝަނަލް ދާއިރާގެ 5 ކޯހެއް ހިންގުން އެމްއައިޓީއާއި ހަވާލުކޮށްފި
މި 5 ކޯހުގައި 100 ދަރިވަރުން ތަމްރީނުކޮށް ވަޒީފާގެ ބާޒާރަށް ނެރުމަށް ތައްޔާރުކުރާނެ
ޓެކްނިކަލް އަދި ވޮކޭޝަނަލް ދާއިރާގެ ފަސް ކޯހެއް ހިންގުން އެމްއައިޓީއާއި ވަނީ ހަވާލުކޮށްފައި
ޓެކްނިކަލް އަދި ވޮކޭޝަނަލް ދާއިރާގެ 5 ކޯހެއް ހިންގުން މޯލްޑިވްސް އިންސްޓިޓިއުޓް އޮފް ޓެކްނޮލޮޖީ، އެމްއައިޓީއާއި ހަވާލުކޮށްފިއެވެ.
މިކަމުގެ އެއްބަސްވުމުގައި ސޮއިކުރެއްވީ މިނިސްޓަރ އޮފް ހަޔަރ އެޑިއުކޭޝަން ޑރ.އިބްރާހީމް ހަސަންއެވެ. މިކޯސްތަކަކީ ވަޒީފާގެ ބާޒާރަށް ދިވެހި ޒުވާނުން ތަމްރީން ކުރުމަށް ކުރިއަށް ގެންދާ "ސްކިލްސް ފޯ އަ ރެސިލިއަންޓް ވޯރކް ފޯސް"ގެ ދަށުން ހިންގުމަށް ހަމަޖެހިފައިވާ ކޯސްތަކެކެވެ. ޓެކްނިކަލް އަދި ވޮކޭޝަނަލް ދާއިރާއިން ހިންގުމަށް ހަވާލުކުރެވުނު ކޯސްތަކަކީ ނޭޝަނަލް ސެޓްފިކެޓް ތްރީ އިން ބޯޓް އޮޕަރޭޝަން، ނޭޝަނަލް ސެޓްފިކެޓް ތްރީ އިން ޖުވެލަރީ ޑިޒައިން، ނޭޝަނަލް ސެޓްފިކެޓް ތްރީ އިން ސްނޯކްލިންގ ގައިޑް، ނޭޝަނަލް ސެޓްފިކެޓް ތްރީ އިން ސްޕޯޓްސް ފިޝިންގ ގައިޑް، ނޭޝަނަލް ސެޓްފިކެޓް ތްރީ އިން ސާފް ގައިޑެވެ. މި 05 ކޯހުގައި 100 ދަރިވަރުން ތަމްރީނުކޮށް ވަޒީފާގެ ބާޒާރަށް ނެރުމަށް ތައްޔާރުކުރެވިގެން ދާނެކަމަށް މިނިސްޓްރީ އޮފް ހަޔަރ އެޑިޔުކޭޝަނުން ބުނެއެވެ.
ސަރުކާރާއި ވޯލްޑް ބޭންކް ގުޅިގެން ކުރިއަށް ގެންދާ "ސްކިލްސް ފޯ އަ ރެސިލިއަންޓް ވޯރކް ފޯސް" ޕްރޮގްރާމަކީ، ވަޒީފާގެ ބާޒާރަށް ނުކުންނަ ދިވެހި ޒުވާނުން ތަމްރީން ކުރުމަށް ކުރިއަށް ގެންދާ ޕްރޮގްރާމެކެވެ. މިއީ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހްގެ އިސްނެންގުވުމުގެ މަތިން ޒުވާނުންނަށް ވަޒީފާގެ ފުރުޞަތުތައް ހޯދައިދީ ޤައުމު މިހާރު އޮތް ހާލަތުން އަރައިގަނެ އިޤްތިޞާދު އަލުން ފަށައިގަންނައިރު ސިނާޢަތްތަކަށް މީހުން ބިނާކުރުމަށް ކުރިއަށްގެންދާ ޕްރޮގްރާމެކެވެ.
މި ޕްރޮގްރާމުގެ ދަށުން ފަންނީ ހުނަރުވެރި މަސައްކަތްތެރިކަމުގެ އެކި ދާއިރާތަކުން 1200 މީހުން ތަމްރީން ކުރުމަށް ވަނީ ހަމަޖެހިފައެވެ. އަދި ތަމްރީން ކުރާ މީހުންގެ ތެރެއިން މަދުވެގެން 33 އިންސައްތަ، އަންހެނުންނަށް ޚާއްސަކުރުމަށް ނިންމާފައިވާކަމަށް ހަޔަރ އެޑިއުކޭޝަން މިނިސްޓްރީން ވަނީ ބުނެފައެވެ. މި ޕްރޮގްރާމްގެ ދަށުން ފަތުރުވެރިކަމުގެ ދާއިރާއަށް ޚާއްސަކޮށްގެން 600 މީހުން ތަމްރީން ކުރުމަށްވެސް ވަނީ ހަމަޖެހިފައެވެ. އަދި އައިސީޓީ ދާއިރާއިން 200 މީހުން ތަމްރީން ކުރުމަށް ހަމަޖެހިފައިވާއިރު ފަތުރުވެރިކަމުގެ ދާއިރާއާ ގުޅުން ހުރި އިމާރާތްކުރުމުގެ ދާއިރާއިން 400 މީޙުން ތަމްރީން ކުރުމަށްވެސް ވަނީ ހަމަޖެހިފައެވެ.
ވަޒީފާގެ ބާޒާރަށް ދިވެހި ޒުވާނުން ތަމްރީން ކުރުމަށް ކުރިއަށް ގެންދާ ޕްރޮގްރާމުގެ ކޯސްތަކަކީ ޤައުމީ ސަނަދުގެ ލެވެލް 3ގެ ކޯސްތަކެކެވެ. ހަޔަރ އެޑިއުކޭޝަން މިނިސްޓްރީން ވަނީ ކޯހުގެ ބައިވެރިންނަށް ކަނޑައެޅޭ އުޞޫލެއްގެ މަތިން ޕޮކެޓް މަނީގެ ގޮތުގައި 2000 ރުފިޔާ ދިނުމަށް ހަމަޖެހިފައިވާކަމަށް ބުނެފައެވެ.
