67 އަހަރުގެ ތެރޭގައި ޓޯކިޔޯގެ މޮޓޯ ޝޯވް ފުރަތަމަ ފަހަރަށް ކެންސަލް!
25 އެޕްރީލު 2021 | އާދީއްތަ 07:39ވާރޗުއަލްކޮށް މި ޝޯވް ކުރިއަށް ގެންދަން ބޭނުން ނުވާކަމަށް އޮގަނައިޒަރުން ބުނޭ
ޓޯކިޔޯގައި މީގެ ކުރިން ބޭއްވި މޮޓޯ ޝޯވް އެއްގެ ތެރެއިން- މި ޝޯވްގައި ވެސް 1.3 މިލިއަނަށްވުރެ ގިނަ މީހުން ބައިވެރިވި
67 އަހަރުގެ ތެރޭގައި ޓޯކިޔޯގެ މޮޓޯ ޝޯވް ފުރަތަމަ ފަހަރަށް ކެންސަލްވެއްޖެއެވެ.
ބީބީސީގައި ރިޕޯޓު ކޮށްފައިވާ ގޮތުން ޓޯކިޔޯއިން ކުރިއަށް ގެންދާ މި ޝޯވް ކެންސަލްވެފައިވަނީ ކޮވިޑް-19 ގެ ބަލިމަޑުކަމުގެ ޙާލަތުގެ ސަބަބުންނެވެ. އެގޮތުން ޖަޕާނުން ވަނީ މިހިނގާ އޭޕްރީލް މަހުގެ 25 ވަނަ ދުވަހުން ފެށިގެން މެއި މަހުގެ 11 ގެ ނިޔަލަށް ޓޯކިޔޯ، އޮސާކާ އަދި އިތުރު ބައެއް ސްޓޭޓުތަކުގައި ކުއްލި ޙާލަތު އިއުލާންކުރުމަށް ވެސް ނިންމާފައެވެ. ޖަޕާނުން ފެންނަ ކޮވިޑު ކޭސްތައް ވެސް ފާއިތުވި ދުވަސްތަކުގައި ދަނީ އިތުރުވަމުންނެވެ.
ޓޯކިޔޯ މޮޓޯ ޝޯވް އަކީ 1954 ވަނަ އަހަރުން ފެށިގެން ކޮންމެ 2 އަހަރަކުން އެއްފަހަރު ބާއްވަމުން އަންނަ ޝޯވްއެކެވެ. މިއަހަރުވެސް އޮކްޓޯބަރު މަހުގެ ތެރޭގައި މި ޝޯވް ބޭއްވުމަށް ކުރިން އޮތީ ތާވަލުކޮށްފައެވެ. 2019 ވަނަ އަހަރު ވެސް މި ޝޯވް ކުރިއަށް ގެންގޮސްފައިވެއެވެ. އެ ފަހަރު 1.3 މިލިއަނަށްވުރެ ގިނަ މީހުން ބައިވެރިވެފައިވެއެވެ.
މި ޙަރަކާތް އިންތިޒާމު ކުރާ އޮގަނައިޒޭޝަންގެ ޗެއަރމަން އަކިއޯ ޓޮޔޯޑާއާ ޙަވާލާދީ ބީބީސީގައި ރިޕޯޓު ކޮށްފައިވާ ގޮތުން، މި ޙަރަކާތް ކެންސަލް ކޮށްފައިވަނީ ކޮވިޑުގެ މި ޙާލަތުގައި ރައްކާތެރިކަމާއެކު ކުރިއަށް ގެންދިއުމަށް އެތައް ގޮންޖެހުންތަކެއް ހުރުމުންނެވެ. ޓޮޔޯޑާއަކީ ކާރު އުފެއްދުމަށް މަޝްހޫރު ޓޮޔޯޓާ ކުންފުނީގެ ރައީސެވެ. ޓޮޔޯޑާގެ އިތުރުން، މި ޝޯވް ގެ އޮގަނައިޒަރުން ވެސް ވަނީ ޝޯވް ކެންސަލްކުރުމަށް ތާއީދުކޮށް، ވާރޗުއަލްކޮށް މި ޝޯވް ކުރިއަށް ގެންދަން ބޭނުން ނުވާކަމަށް ބުނެފައެވެ.
ރިޕޯޓުތައް ބުނާގޮތުން ޖަޕާނުގެ ބޮޑުވަޒީރު ޔޮޝިހިޑޭ ސުގާ ގެންދަވަނީ އެ ޤައުމުގެ ސްޓޭޓުތަކުގައި ކުއްލި ޙާލަތު އިއުލާނު ކުރެއްވުމަށް ތައްޔާރުވަމުންނެވެ.
