ރައީސް ޞާލިހުގެ ބައިވެރިވެވަޑައިގަތުމާއެކު އެމްޑީޕީގެ ގައުމީ ހިންގާ ކޮމިޓީގެ ބައްދަލުވުން ފަށައިގެން ކުރިޔަށް
މިބައްދަލުވުމުގެ އެޖެންޑާގައި ވަނީ ދެ މަސައްކަތެއް
އެމްޑީޕީގެ ގައުމީ ހިންގާ ކޮމިޓީގެ ބައްދަލުވުން
އެމްޑީޕީގެ ގައުމީ ހިންގާ ކޮމިޓީގެ ބައްދަލުވުމުގައި ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ ބައިވެރިވެވަޑައިގެންނެވުމާއެކު ފަށައިފިއެވެ.
މިބައްދަލުވުމުގެ ރިޔާސަތުގައި އެމްޑީޕީގެ ރައީސް، ރައީސް މުހައްމަދު ނަޝީދު އާއި ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ތިއްބެވިއެވެ. ބިލަބޮންގ ހައި އިންޓަރނޭޝަނަލް ސްކޫލު ގައި ކުރިޔަށްދާ މިބައްދަލުވުން ފަށާފައިވަނީ ހޮނިހިރު ދުވަހުގެ ރޭ 9:30 ހާއިރުއެވެ. މިބައްދަލުވުމުގައި ބައިވެރިވެވަޑައިގެންނަވަނީ ވަޒީރުންގެ މަޖިލީހުގައި ތިއްބަވާ އެމްޑީޕީގެ މެމްބަރުންނާއި ރައްޔިތުންގެ މަޖިލީހުގެ އެމްޑީޕީގެ މެމްބަރުންނެވެ.
މިއީ މިފަހަކުން އެމްޑީޕީގެ ގައުމީ ހިންގާ ކޮމިޓީގެ ބައްދަލުވުމެއް ބާއްވާ ފުރަތަމަ ފަހަރެވެ. މިބައްދަލުވުމުގެ އެޖެންޑާގައި ވަނީ ދެ މަސައްކަތެކެވެ. އެއް ކަމަކީ އެމްޑީޕީގެ ދާއިރާތަކުގެ އިންތިޚާބު 2021 ގައި ބައިވެރިވާ ކެންޑިޑޭޓުންގެ ޝަރުތުތައް ކަޑައެޅުމެވެ. ދެވަނަ ކަމެއްގެ ގޮތުން ތާވަލު ކޮށްފައިވަނީ ނިމިގެން ދިޔަ ލޯކަލް ކައުންސިލް އިންތިޚާބާއި ގުޅޭ މައްސަލަތައް ކޯޓަށް ހުށައެޅުމާއިމެދު ގޮތެއް ނިންމުމެވެ.
ބައްދަލުވުން ފަށަމުން ވާހަކަދައްކަވަމުން ރައީސުލްޖުމްހޫރިއްޔާ ވިދާޅުވީ ކޮވިޑްގެ ބަލިމަޑުކަމުގެ ތެރޭގައި އެމްޑީޕީގެ ހަރަކާތްތައް މަޑުޖެހިފައި އޮތުމަށްފަހު ޕާޓީގެ ހަރަކާތްތައް ކުރިޔަށް ގެންދަންޖެހޭކަމަށެވެ. އަދި އެޖެންޑާގައި ހުރި ކަންކަމަށް ގައުމީ މަޖިލީހުގައި މަޝްވަރާކޮށްގެން ގޮތްތަކެއް ނިންމަންޖެހޭ ކަމަށް ރައީސް ވިދާޅުވިއެވެ.
އެމްޑީޕީގެ ގައުމީ ހިންގާ ކޮމިޓީގައި ތިއްބަވަނީ ޕާޓީގެ ރައީސް އާއި ނައިބު ރައީސްގެ އިތުރުން ޗެއާޕާސަން، ޕާޓީގެ ތެރެއިން ކެބިނެޓްގައި ތިއްބަވާ މެމްބަރުން، އަމީން އާންމު އަދި އަމީން އާންމުގެ ނައިބެވެ. ޗެއާޕާސަންގެ ނައިބު ސިޔާސީ އާއި ޗެއާޕާސަންގެ ނައިބު މާލީވެސް ތިއްބަވައެވެ. މީގެއިތުރުން ޕާޓީއަށް ނިސްބަތްވާ ރައްޔިތުންގެ މަޖިލީހުގެ މެމްބަރުންވެސް ގައުމީ ހިންގާ ކޮމިޓީގައި ތިއްބަވައެވެ.
