އެންމެ 24 ދުވަސްތެރޭ ލ. ގަމުން 950 ޓަނުގެ ކުނި ސާފުކޮށްފިއެވެ.

އަތޮޅުތެރޭގައި އެންމެ ކުނި ގިނައިން ޖަމާކޮށްފައިވާ 20 ރަށުގެ ކުނީގެ މައްސަލައަށް ކުރިއަށް އޮތް 7 މަސް ދުވަހުގެ ތެރޭގައި ހައްލު ލިބޭނެކަމަށް ސަރުކާރުން ވަނީ ހާމަކުރައްވާފައެވެ. މިމަސައްކަތް މިހާރު ވޭސްޓް މެނޭޖްމަންޓް ކޯޕަރޭޝަނާ ވަނީ ހަވާލުކޮށްފައެވެ. ކުނީގެ މައްސަލަ ހައްލުކުރުމުގެ މަސައްކަތް ބާރު ސްޕީޑެއްގައި ކުރިއަށްދާކަން ވެމްކޯގެ ޓުވިޓަރ މެދުވެރިކޮށް ދަނީ ހާމަކުރަމުންނެވެ. 

ލ ގަމުގައި ޖަމާވެފައިވާ ކުނި ސާފުކުރުމުގެ މަސައްކަތް ފަށާފައިވާއިރު، މުކުރިމަގު އަވަށާއި ތުނޑި އަވަށުމަސައްކަތް ވަނީ މުޅިން ނިންމާލާފައެވެ. އެގޮތުން މި ދެ އަވަށުން 24 ދުވަހުގެ ތެރޭގައި 950 ޓަނުގެ ކުނި ވަނީ ސާފުކޮށްފައެވެ. ވެމްކޯއިން މިހާރުދަނީ މި އަވަށުގައިވެސް ކުނި ނެގި ސަރަހައްދުގެ ވެލިގަނޑު އެއްވަރުކުރުމާއި، ސާފުކުރި ކުނީގެ ތެރެއިން ރަށުގައި ނައްތާލެވޭ ކުނި ނައްތާލުމުގެ މަސައްކަތް ކުރަމުންނެވެ. މީގެ އިތުރުން ވެމްކޯއިން މިހާރު ވަނީ މަތިމަރަދޫ އަވަށުގެ ކުނި ސާފުކުރުމުގެ މަސައްކަތް ފަށާފައެވެ.

ވެމްކޯއިން އެންމެ މަހެއްގެ ތެރޭގައި 13،350 ޓަނުގެ ކުނި ސާފުކޮށް ގިނަ ރަށްރަށުގެ މަލަމަތި ވަނީ ބަދަލުކޮށްލާފައެވެ.

މިހާތަނަށް އައިރު ވެމްކޯއިން ވަނީ 8 ރަށަކުން ކުނި ނެގުމުގެ މަސައްކަތް މުޅިން ނިންމާލާފައެވެ. މިހާތަނަށް މަސައްކަތް ފުރިހަމަކޮށްފައިވާ ރަށްރަށަކީ، ކ. ގުރައިދޫ، ކ. ތުލުސްދޫ، ކ. ކާށިދޫ، ކ. ގުޅި، އއ. މާޅޮސް، އދ. ހަންޏާމީދޫ، އދ.މަހިބަދޫ އަދި ލ. ފޮނަދޫއެވެ. މި ރަށްރަށުގައި ކުނި ނެގުމާއި، ކުނި ނެގި ސަރަހައްދު ސާފުކުރުން އަދި ކުނި ޓްރާންސްފަރކުރުމުގެ މަސައްކަތް ވަނީ ނިންމާލާފައެވެ. އެގޮތުން ކ. ގުރައިދޫން 1850 ޓަނުގެ ކުންޏާއި، ކ. ތުލުސްދޫއިން 2800 ޓަނުގެ ކުންޏާއި، ކ. ކާށިދޫން 1700 ޓަނުގެ ކުންޏާއި، ކ. ގުޅިން 650 ޓަނުގެ ކުންޏާއި، އއ. މާޅޮހުން 400 ޓަނުގެ ކުންޏާއި، އދ. ހަންޏާމީދޫން 250 ޓަނުގެ ކުންޏާއި، އދ.މަހިބަދޫން 800 ޓަނުގެ ކުނި އަދި ލ. ފޮނަދޫން 800 ޓަނުގެ ކުނި ވަނީ ޓްރާންސްފަރކޮށްފައެވެ.

މީގެ އިތުރުން ވެމްކޯއިން މިހާރުވެސް ދަނީ އިތުރު 6 ރަށެއްގައި ކުނި ސާފުކުރުކުރުމުގެ މަސައްކަތް ކުރަމުންނެވެ. ގދ. ތިނަދޫ އިން ސާފުކުރުމަށް ލަފާކޮށްފައިވާ 1500 ޓަނުގެ ކުނީގެ ތެރެއިން 1050 ޓަނުގެ ކުނި ޓްރާންސްފަރ ކޮށްފައިވާއިރު، އދ. މާމިގިލިން ސާފުކުރުމަށް ލަފާކޮށްފައިވާ 12،000 ޓަނުގެ ކުނީގެ ތެރެއިން 1850 ޓަނުގެ ކުނި ވަނީ ޓްރާންސްފަރ ކޮށްފައެވެ. މީގެ އިތުރުން ފުވައްމުލައް ސިޓީން ސާފުކުރުމަށް ލަފާކޮށްފައިވާ 25،932 ޓަނުގެ ކުނީގެ ތެރެއިން 800 ޓަނުގެ ކުނި ޓްރާންސްފަރ ކޮށްފައިވާއިރު، ކުޅުދުއްފުށި ސިޓީން ސާފުކުރުމަށް ލަފާކޮށްފައިވާ 92،000 ޓަނުގެ ކުނީގެ ތެރެއިން 400 ޓަނުގެ ކުނި މިހާރު ވަނީ ޓްރާންސްފަރ ކޮށްފައެވެ. މީގެ އިތުރުން އދ. ފެންފުށިންވެސް 1100 ޓަނުގެ ކުނި ވެމްކޯއިން ވަނީ ސާފުކޮށްފައެވެ.

ވެމްކޯއިން 7 މަސްދުވަހުގެ ތެރޭގައި ރާއްޖޭގައި އެންމެ ކުނި ގިނަ 20 ރަށުގެ ކުނީގެ މައްސަލަ ހައްލުކުރުމަށް އަމާޒު ހިފާފައިވާއިރު، ކުރިއަށް ރާވާފައިވާ މަސައްކަތްތަކުގެ ތަފްސީލުވެސް ވަނީ ހިއްސާކޮށްފައެވެ. އެގޮތުން ގއ. ވިލިގިލިން ސާފުކުރުމަށް ލަފާކޮށްފައިވާ 704 ޓަނުގެ ކުނި ސާފުކުރުމުގެ މަސައްކަތް 7 ޖޫންގައި ފަށަން ތާވަލުކޮށްފައިވާއިރު، ތ. ކަނޑޫދޫން ސާފުކުރުމަށް ލަފާކޮށްފައިވާ 359 ޓަނުގެ ކުނި ސާފުކުރުމުގެ މަސައްކަތް 17 ޖުލައިގައި ފެށުމަށް ވަނީ ނިންމާފައެވެ.

މީގެ އިތުރުން ތ. މަޑިފުށިން ސާފުކުރުމަށް ލަފާކޮށްފައިވާ 310 ޓަނުގެ ކުނި ސާފުކުރުމުގެ މަސައްކަތް 30 ޖުލައިގައި ފަށަން ތާވަލުކޮށްފައިވާއިރު، ދ. ކުޑަހުވަދޫއން ސާފުކުރުމަށް ލަފާކޮށްފައިވާ 800 ޓަނުގެ ކުނި ސާފުކުރުމުގެ މަސައްކަތް 24 އޮގްސްޓްގައި، ހދ. ވައިކަރަދޫން ސާފުކުރުމަށް ލަފާކޮށްފައިވާ 15،000 ޓަނުގެ ކުނި ސާފުކުރުމުގެ މަސައްކަތް 18 ސެޕްޓެމްބަރުގައި އަދި ހއ. ކެލާއިން ލަފާކޮށްފައިވާ 200 ޓަނުގެ ކުނި ސާފުކުރުމުގެ މަސައްކަތް 23 ސެޕްޓެމްބަރުގައި ފެށުމަށް ވަނީ ތާވަލުކޮށްފައެވެ.

މިއަހަރަށް ރައްޔިތުންގެ މަޖިލީސް ހުޅުވުމުގެ ޖަލްސާގައި އިއްވެވި ރިޔާސީ ބަޔާނުގައި ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ވިދާޅުވީ ކުނީގެ މައްސަލަ ހައްލުކުރުމަށް މަސައްކަތް ކުރައްވަމުން ގެންދަވާކަމަށެވެ. މިއީ ބުރަ ބޮޑު މައްސަލައެއްނަމަވެސް ކުރިއަށް އޮތް 7 މަސްދުވަހުގެ ތެރޭގައި 20 ރަށަކަށް ޖަމާވެފައިވާ ކުނިތައް އެއްކޮށް ރަށުން ބޭރުކޮށް ސާފުކުރުމުގެ މަޝްރޫއުމި ހާރު ވެމްކޯއާއި ހަވާލުކުރައްވާފައިވާ ކަމަށް ރައީސުލްޖުމްހޫރިއްޔާ ވިދާޅުވިއެވެ. އަދި މިކަން ކުރުމުގައި އެންމެ ގިނައިން މިވަގުތު ކުނި ޖަމާކޮށްފައި ހުރި ރަށްރަށުގެ ތެރެއިން ކުނީގެ މައްސަލަ ބޮޑުވެފައިވާ ރަށްރަށަށް އިސްކަން ދެއްވުމަށްވަނީ ނިންމަވާފައެވެ.