އައްޑޫސިޓީ ކައުންސިލްގެ އިންތިޤާލީ މަޝްވަރާތައް ބާއްވައިފި
23 އެޕްރީލު 2021 | ހުކުރު 08:03ކައުންސިލަށް އިންތިޚާބުވި މެމްބަރުން ބައިވެރިވި
އައްޑޫ ސިޓީ ކައުންސިލްގެ އިންތިގާލީ މަޝްވަރާތައް
އައްޑޫ ސިޓީ ކައުންސިލްގެ އިންތިޤާލީ މަޝްވަރާތައް ކުރިއަށްގެންގޮސްފިއެވެ.
އައްޑޫ ސިޓީ ކައުންސިލް އިދާރާގައި ބުރާސްފަތިދުވަހު، އެ ސިޓީގެ ކައުންސިލްގެ އިންތިޚާބީ މޭޔަރާއި، މެމްބަރުންނާއި، މިހާރުގެ ކައުންސިލް މެމްބަރުން އަދި މޭޔަރާއެކުވަނީ މަޝްވަރާތައް ކުރިއަށްގެންސްފައެވެ. މިމަޝްވަރާތަކުގައިވަނީ އައްޑޫސިޓީ ކައުންސިލުން މިހާރު ކުރަމުން އަންނަ މަސައްކަތްތައް އިންތިޚާބީ މޭޔަރު، އަލީ ނިޒާރާ ހިއްސާ ކޮށްފައެވެެ. އަދި އައްޑޫސިޓީގެ ތަރައްގީއަށް ކައުންސިލުން މިހާރު ރާވާފައިހުރި ކަންތައް މިހާރުގެ މޭޔަރު އަބްދުﷲ ސޯދިގު (ސޯބެ)ވަނީ ހިއްސާކޮށްފައެވެ.
އައްޑޫ ސިޓީއަކީ ސަރުކާރުން ތަރައްގީގެ މަޝްރޫއުތަކަށް ބޮޑު ހޭދައެއް ކުރައްވާ ސިޓީއެކެވެ. އައްޑޫގެ ފަތުރުވެރިކަން ފުޅާކުރުމަށް 4000 އެނދު އިތުރުކުރުމުގެ މަޝްރޫއެއް މިހާރު ފެށިގެން ކުރިއަށްދެއެވެ. އެ ސިޓީގައި ކޮމާޝަލް ޕޯޓެއް ތަރައްގީކުރުމަށް އެމްޓީސީސީއާ ހަވާލުކޮށް އެމަސައްކަތްވެސްވަނީ ފަށާފައެވެ. ޗައިލްޑް ޑިވެލޮޕްމެންޓް ސެންޓަރެއް އެ ސިޓީގައި ގާއިމްކޮށްފައިވާއިރު، ސިއްޙީ ދާއިރާ ފުޅާކުރުމަށްވެސް އިތުރު ޚިދުމަތްތަކެއް ފެށުމަށް ވަނީ ނިންމާފައެވެ. އައްޑޫ ސިޓީއަކީ ސަރުކާރުގެ ޕީއެސްއައިޕީ ބަޖެޓުން އެއްމެ ބޮޑު ހޭދައެއްކުރާ އެއްތަނެވެ.
ކައުންސިލް އިންތިހާބުގައި އައްޑޫސިޓީގެ 12 ދާއިރާގެ ތެރެއިން ހަ ދާއިރާއެއްގެ ގޮނޑި ކާމިޔާބު ކުރީ އެމްޑީޕީގެ ކެންޑިޑޭޓުންނެވެ. އަދި އަމިއްލަ ގޮތުން ވާދަކުރި 3 ކެންޑިޑޭޓުން ކައުންސިލަށް ހޮވުނުއިރު، އަނެއް 3 ގޮނޑި ކާމިޔާބު ކުރެއްވީ ޕީޕީއެމްގެ ކެންޑިޑޭޓުންނެވެ.
