ސުކޫކު ވިއްކައިގެން 190 މިލިއަން ޑޮލަރުގެ ދަރަނި ދައްކައިފި

ސަރުކާރުން ވިއްކި ސުކޫކުން ލިބުނު ފައިސާ އިން އަންނަ އަހަރު ދަންކަންޖެހޭ 250 މިލިއަން ޑޮލަރުގެ ޔޫރޯ ބޮންޑުގެ ބޮޑު ބަޔެއް ދައްކާފައިވާކަމަށް ފިނޭންސް މިނިސްޓަރ އިބްރާހީމް އަމީރު ވިދާޅުވެއްޖެއެވެ.

މިދިޔަ މަހުގެ ތެރޭގައި ސަރުކާރުން ބުނެފައިވަނީ ކްރެޑިޓް ސޫއިޒް އާއި އެމިރޭޓްސް އެންބީޑީ ކެޕިޓަލްގެ އިތުރުން އެސްއެސްބީސީ އަދި އިސްލާމިކް ކޯޕަރޭޝަން ފޯ ދަ ޑިވެލޮޕްމެންޓް އޮފް ޕްރައިވެޓް ސެކްޓާ (އައިސީޑީ) މެދުވެރިވެގެން ސަރުކާރުން 200 މިލިއަން ޑޮލަރުގެ ސުކޫކެއް ލިސްޓު ކޮށްފައިވާ ކަމަށެވެ. އެ ސުކޫކުން ލިބޭ ފައިސާ ބޭނުންކުރާނީ ކުރީގެ ސަރުކާރުގައި ވިއްކާފައިވާ 250 މިލިއަން ޑޮލަރުގެ ޔޫރޯ ބޮންޑު އަންނަ އަހަރު މެޗުއާވާތީ އެ ބޮންޑަށް ފައިސާ ދައްކަން ކަމަށް ސަރުކާރުން ވަނީ ބުނެފަ އެވެ.

އޯވަރޑްރޯ ކުރުމުގެ މުއްދަތު އިތުރުކުރުމުގެ މައްސަލަ ދިރާސާކުރި ވަގުތީ ކޮމިޓީގެ ބައްދަލުވުމުގައި މިސުކޫކާ ގުޅޭގޮތުން ފިނޭންސް މިނިސްޓަރ ވަނީ މައުލޫމާތުދެއްވާފައެވެ.

މިނިސްޓަރ ވިދާޅުވީ އަންނަ 2022 ވަނަ އަހަރު މެޗުއަވާ 250 މިލިއަން ޑޮލަރުގެ ޔޫރޯ ބޮންޑަކީ އެކީ އެއްފަހަރާ ދައްކަންޖެހޭ ބޮންޑެއް ކަމަށެވެ. އެބޮންޑުގެ ސަބަބުން ލިކިޔުޑިޓީ މެނޭޖްމަންޓަށް ބޮޑު އަސަރެއް ކުރާކަމަށް މިނިސްޓަރ ވިދާޅުވިއެވެ. އަދި މިހާލަތުގައި އިންވެސްޓަރުންނަށްވެސް 2022 ވަނަ އަހަރު ރާއްޖެއަށް އެދެއްކޭނެ ކަމުގެ ޔަގީންކަމެއް ނެތް ކަމަށް މިނިސްޓަރ ވިދާޅުވިއެވެ. އެހެންކަމުން ސުކޫކު އިޝޫ ޕްރޮގްރާމްގެ ތެރެއިން ރަނގަޅު ރޭޓެއް ހޯދުމަށްޓަކައި މަސައްކަތްކުރީ ކަމަށް މިނިސްޓަރ ވިދާޅުވިއެވެ.

މިނިސްޓަރ ވިދާޅުވީ އެހެންކަމުން މީގެ ހަފްތާއެއް ކުރިން ރާއްޖޭގެ ދަރަނީގެ ހާލަތު ހުރިވަރަށްވުރެ މިހާރުގެ ހާލަތު ރަނގަޅު ކަމަށެވެ. އަދި މިބޮންޑުގެ ތެރެއިން އަންނަ އަހަރު ދެން ދައްކަން ޖެހޭނީ 58 މިލިއަން ޑޮލަރު ކަމަށް މިނިސްޓަރ ވިދާޅުވިއެވެ.

އަދި ދެން މާކެޓަށް ދާނަމަ ރާއްޖޭގެ ރޭޓިންގްސް ރަނގަޅުވާނެކަމަށް މިނިސްޓަރ ވިދާޅުވިއެވެ.

ކުރީގެ ސަރުކާރުން 2017 ވަނަ އަހަރު ހަތް ޕަސަންޓުގެ އިންޓަރެސްޓު ރޭޓެއްގައި 200 މިލިއަން ޑޮލަރުގެ ސަވަރިން ނުވަތަ ޔޫރޯ ބޮންޑެއް ދޫކުރީ ފަސް އަހަރުން އަނބުރާ ދައްކަންޖެހޭ ގޮތަށެވެ.

މީގެއިތުރުން މި އަހަރަށް ދައުލަތުގެ ބަޖެޓަށް ބޭނުންވާ ފައިސާ ހޯދުމަށް ބޭރުގެ ފަރާތަކަށް 300 މިލިއަން ޑޮލަރުގެ ސުކޫކެއް ވިއްކަން ސަރުކާރުން ވަނީ ނިންމާފައެވެ. އިސްލާމިކް ކޯޕަރޭޝަން ފޮރ ދި ޕްރައިވެޓް ސެކްޓަރ (އައިސީޑީ) އާއި އެކު ވިއްކުމަށް މަސައްކަތް ކުރާ މި ސުކޫކުގެ މައިގަނޑު އަސާސަކީ އެސެޓް ބޭސްޑް ސުކޫކެވެ. އެގޮތުން އެއީ ދަރަނި ނަގާ ފަރާތުން ކަނޑައަޅާ 100 އިންސައްތަ ދައުލަތުން ހިއްސާވާ ސްޕެޝަލް ޕާރޕޯސް ވެހިކަލް (އެސްޕީވީ) އެއް ގޮތުން 100 އިންސައްތަ ހިއްސާވާ ދައުލަތުގެ ކުންފުންޏަކަށް ދައުލަތުގެ އެސެޓެއްގެ ބެނެފިޝަލް އޯނަރޝިޕް ބަދަލުކޮށް، ސުކޫކުގެ އިންވެސްޓަރުންގެ ފަރާތުން އެސްޓީވީ ގެ ބެނެފިޝަލް އޯނަރޝިޕްގައިވާ އެސެޓް ދައުލަތަށް އިޖާރާ އެއްބަސްވުމެއްގެ ދަށުން ދަރަންޏަށް ނަގާ ފަރާތަށް ލީސް ކުރުން ކަމަށް ފިނޭންސް މިނިސްޓްރީން ވަނީ ކުރިން މައުލޫމާތުދީފައެވެ.

މިނިސްޓްރީން ބުނީ، ސުކޫކުގެ މުއްދަތު ހަމަވުމުން އެސެޓްގެ ބެނެފިޝަލް އޯނަރޝިޕް ދައުލަތުގެ 100 އިންސައްތަ ހިއްސާވާ އެސް.ޕީ.ވީ އިން އަނބުރާ މިނިސްޓްރީ އޮފް ފިނޭންސަށް ނެގޭނެ ކަމަށެވެ. އެހެންކަމުން މި ސުކޫކު ވިއްކުމަށް އެސެޓެއްގެ ގޮތުގައި ދަރުމަވަންތަ ހޮސްޕިޓަލްގެ ބެނެފިޝަލް އޯނަރޝިޕް ފިނޭންސް މިނިސްޓްރީއަށް ބަދަލުކުރުމަށް ސަރުކާރުން ވަނީ ނިންމާފައެވެ.