ސަބްސިޑީ ބަޖެޓުގެ 99 އިންސައްތަ ހުސްވެއްޖެ: ފިނޭންސް މިނިސްޓްރީ
އަހަރުގެ ބާކީ 5 މަސް ދުވަސް އޮއްވަ ސަބްސިޑީއަށް ކުރި ބަޖެޓްގެ 99 އިންސައްތަ ހުސްވެއްޖެ
އެސްޓިއޯ ކާޑު ގުދަނުން ކާޑުގެ ބާވަތްތައް ޑެލިވަރީ ކުރުމުގައި
ފިނޭސް މިނިސްޓްރީގެ ތަފާސް ހިސާބުތައް ދައްކާ ގޮތުން އަހަރުގެ ބާކީ 5 މަސް ދުވަސް އޮއްވައި، ސަބްސިޑީއަށް މިއަހަރު ބަޖެޓުކުރި ފައިސާއިން 99 އިންސައްތަ ހުސްވެއްޖެއެވެ.
ފިނޭންސް މިނިސްޓްރީ އިން ކޮންމެ ހަފްތާއަކު ހާމަ ކުރާ މާލީ ހިސާބުތަކުގެ ތަފްސީލަށް ބަލާލާއިރު މިއަހަރުގެ އޮގަސްޓް މަހުގެ 7 ވަނަ ދުވަހުގެ ނިޔަލަށް، ސަބްސިޑީއަށް 1،836.4 މިލިޔަން ރުފިޔާ ވަނީ ހަރަދު ކޮށްފައެވެ. މިއަހަރަށް މުޅި ޖުމްލަ ސަބްސިޑީއަށް ބަޖެޓް ކޮށްފައިވަނީ 1859.6 މިލިޔަން ރުފިޔާއެވެ.
މީގެ އިތުރުން އެ ހިސާބުތަކުން އެނގޭ ގޮތުގައި މި މަހުގެ ބާކީ ދުވަސްތަކާ އެކު އަހަރުގައި ބާކީ ގާތްގަނޑަކަށް ފަސް މަސް ދުވަސް އޮއްވައި އާސަންދައަށް ބަޖެޓުކުރި އަދަދުގެ ބޮޑުބައެއްވެސް ވަނީ ހުސްވެފައެވެ. އެގޮތުން، މި އަހަރު އާސަންދައަށް ބަޖެޓުކޮށްފައިވަނީ 1،859.6 މިލިއަން ރުފިޔާގެ ތެރެއިން، އޮގަސްޓު މަހުގު ހަތްވަނަ ދުވަހާ ހަމައަށް 1،169.8 މިލިއަން ރުފިޔާ ވަނީ ޚަރަދުކޮށްފައެވެ. މިއީ އާސަންދަ ބަޖެޓުގެ 62.9 އިންސައްތަ އެވެ.
ރާއްޖޭގައި ކާޑުގެ ބާވަތްތަކާއި ކަރަންޓުގެ ސަބްސިޑީ އަށް ބޮޑު ހަރަދެއް ކުރެއެވެ. އެގޮތުން މިދިޔަ އަހަރުގެ މިހާތަނަށް ސަބްސިޑީގެ ގޮތުގައި 2496 މިލިއަން ރުފިޔާ ހަރަދު ކޮށްފައިވެއެވެ. މިއީ މިއަހަރުގެ މިހާތަނަށް ސަބްސިޑީއަށް ކޮށްފައިވާ ހަރަދާ ބަލާއިރު 650 މިލިއަން ރުފިޔާ ކުޑަ އަދަދެކެވެ. ސަރުކާރުން ސަބްސިޑީގެ ބަޖެޓް ކުޑަކުރީ، ސަބްސިޑީ ރިފޯމްކޮށް ހަމަ އެކަނި އެންމެ ބޭނުންވާ މީހުންނަށް ސަބްސިޑީ ދިނުމުގެ ނަމުގައެވެ. ނަމަވެސް މިހާތަނަށް އައި އިރުވެސް އެކަން ކުރެވިފައި ނުވުމުގެ ސަބަބުން ސަބްސިޑީ ބަޖެޓް ގާތްގަނޑަކަށް އެއްކޮށް ހުސްވީއެވެ.
މިނިސްޓްރީގެ ތަފާސް ހިސާބުތައް ދައްކާގޮތުން މިއަހަރުގެ މިހާތަނަށް ދަައުލަތުގެ ބަޖެޓުން ހަރަދު ކޮށްފައިވަނީ 22.3 ބިލިއަން ރުފިޔާއެވެ. އަދި ދައުލަތުގެ އާމްދަނީގެ ގޮތުގައި 23.7 ބިލިއަން ރުފިޔާ ލިބިފައިވާ ކަމަށް ދައްކައެވެ.
މި ތަފާސް ހިސާބުތަކަށް ބަލާފަ ބަޖެޓް އަރަނި ވިކަމަށް ސަރުކާރުން ބުނަމުން ދިޔަ ނަމަވެސް، ގިނަ ބަޔަކު ބުނަނީ މިީ ސަރުކާރުން ރައްޔިތުންނަށް އޮޅުވާލާ ވަރަށް ބޮޑު އޮޅުވާލުމެއް ކަމުގައެވެ. މިހާރުވެސް ސަޕްލަޔަރުންނަށް ދައްކަންޖެހޭ އެތައް ބިލިޔަން ރުފިޔާއެއް އޮތުމަކީ މިބުނުމަށް ބާރު ލިބޭ އަލިގަދަ ހެއްކެއް ކަމުގައި ގިނަ ރައްޔިތުން ފާހަގަކުރެއެވެ.
މީގެ އިތުރުން ރާއްޖެއަށް ދަރަނީގެ ބޮޑު ބިރުވެރިކަމެއް އޮތް ކަމަށް ބައިނަލްއަގުވާމީ މާލީ އިދާރާތަކުން ވަނީ ފާހަގަ ކޮށްފައެވެ. ހިސާބުތަކުން ދިވެހި ދަހުލަތުގެ ހަރަދުތައް ކުޑަނުވެ ދަރަނި އިތުރުވެގެންދާތަން ފެންނަން އޮތަސް ސަރުކާރުން ބުނަމުން ދަނީ ދަރިނިތައް ދެއްކޭނެކަމުގެ ޔަގީންކަން އެބައޮތް ކަމުގައެވެ.
