ކ. މާލެ
|
22 އޭޕްރިލް 2021 | ބުރާސްފަތި 05:23
ކުލަބު ވެލެންސިއާގެ ކޯޗު މުޙައްމަދު އާތިފް (އާތީ)
ކުލަބު ވެލެންސިއާގެ ކޯޗު މުޙައްމަދު އާތިފް (އާތީ)
އެފްއޭއެމް
ވެލެންސިއާ އާއި ޔޫވީގެ މެޗު
ޔޫވީ އޮތީ ފޯމުގައި، ސަމާލުވާން ޖެހޭ: އާތީ
 
ލީގުގައި އެންމެ ފަހުން ކުޅުނު ދެ މެޗުންވެސް ޔޫވީ ވަނީ ފަސޭހަކަމާއެކު މޮޅުވެފައި
 
ވެލެންސިއާ އާއި ޔޫވީ ބައްދަލުކުރާ މެޗު ފަށާނީ ބުރާސްފަތި ދުވަހުގެރޭ 22:00 ގައި

ދިރާގު ދިވެހި ޕްރިމިއާ ލީގުގައި އެންމެ ފަހުން ކުޅުނު ދެ މެޗުންވެސް މޮޅުވެ ޔުނައިޓެޑް ވިކްޓަރީ (ޔޫވީ) އޮތީ ވަރަށް ފޯމުގައި ކަމަށާއި، އެ ކަމަށް ސަމާލުވާން ޖެހޭ ކަމަށް ކުލަބު ވެލެންސިއާގެ ކޯޗު މުޙައްމަދު އާތިފް (އާތީ) ބުނެފިއެވެ.

ލީގުގެ އެންމެ ފުލުގައި އޮތް ޔޫވީން އެންމެ ފަހުން ކުޅުނު ދެ މެޗުން މޮޅުވެފައިވާއިރު، އެޓީމުން އަންނަނީ މި ފަހަކަށް އައިސް ތަފާތު މޮޅު ކުޅުމެއް ދައްކަމުންނެވެ. އެގޮތުން 4-1 ގެ ނަތީޖާއަކުން ދަ ގްރާންޑޭ ސްޕޯޓްސް ކުލަބު އަތުން ޔޫވީ މޮޅުވެފައިވާއިރު، އެ ޓީމު ވަނީ އެންމެ ފަހުން ކުޅުނު މެޗުގައި 5-1 ގެ ނަތީޖާއަކުން ސުޕަ ޔުނައިޓެޑް ސްޕޯޓްސް (ސަސް) ބަލިކޮށްފައެވެ.

ލީގުގައި ބުރާސްފަތި ދުވަހުގެރޭ ޔޫވީއާ ދެކޮޅަށް ނުކުތުމުގެ ކުރިން އަންގާރަ ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަމުން އާތީ ބުނީ ލީގު ތާވަލުގެ އެންމެ ފުލުގައި އޮތް ނަމަވެސް ޔޫވީއަކީ ތަފާތު މޮޅު ޓީމެއް ކަމަށާއި، އެގޮތުން ބަލިވި މެޗުތަކުންވެސް އެ ޓީމު ބަލިވެފައިވަނީ ހަނި ފަރަގަކުން ކަމަށެވެ. އަދި މި މެޗަށް ނުކުންނައިރު، އެންމެ ފަހުން ކުޅުނު ދެ މެޗުން މޮޅުވެ، ޔޫވީ މި ވަގުތު އޮތީ ވަރަށް ފޯމުގައި ކަމަށާއި، އެހެންކަމުން ވެލެންސިއާއިން އެ ކަމަށް ތައްޔާރުވާން ޖެހޭ ކަމަށްވެސް ބުންޏެވެ.

ޔޫވީ މެޗަށް ނުކުންނައިރު، ވެލެންސިއާއަށް ވަނީ އަނިޔާގެ ބައެއް މައްސަލަތައް ކުރިމަތިވެފައެވެ. އެގޮތުން ނޫސްވެރިންގެ ބައްދަލުވުމުގައި އާތީ ވަނީ އެ ޓީމުގެ ހުނަރުވެރި ފޯވާޑް ހުސެއިން ނިޔާޒް މުޙައްމަދު (ބޮކުރީ) ގެ ވާހަކަ ހިއްސާކޮށްފައެވެ. އަނިޔާގެ މައްސަލަތަކާއި، އެކި ސަބަބުތަކާ ހުރެ 2017 ވަނަ އަހަރު ބޮކުރީ ފުރަތަމަ ޑިވިޝަނުން ބްރޭކެއް ނެގިއިރު، އޭނާ އަލުން އަނބުރާ ފުރަތަމަ ޑިވިޝަނުގެ ކުލަބަކާ ގުޅުނީ މި ސީޒަނުގައި ވެލެންސިއާއަށެވެ. އެކަމަކު ދެވަނަ ބުރުގައި އަނިޔާގެ ސަބަބުން ބޮކުރީއަށް ވަނީ ގިނަ މެޗުތަކެއް ގެއްލިފައެވެ. އާތީ ބުނީ މީގެ ކުރިން ބޮކުރީގެ ކަކުލަށް އަނިޔާވި ނަމަވެސް، މި ފަހަރު އަނިޔާވެފައިވަނީ އޭނާގެ ތަނބިކައްޓަށް ކަމަށެވެ. އެހެންކަމުން މީގެ ކުރިން ލިބުނު އަނިޔާ އާއި، މި ފަހުން ލިބުނު އަނިޔާއާ ގުޅުމެއް ނެތް ކަމަށާއި، އެ އަނިޔާއިން ރަނގަޅުވެ ލީގުގެ ތިންވަނަ ބުރުގައި ބޮކުރީ ފެނިގެންދާނެ ކަމަށް އުއްމީދުކުރާ ކަމަށްވެސް އާތީ ބުންޏެވެ.

ވެލެންސިއާ މެޗުގެ ކުރިން ޔޫވީގެ ކޯޗު އިހުސާން އަބްދުލް ޣަނީ (ސާންތި) ބުނީ މި މެޗަށް ނުކުންނައިރު، ޔޫވީއަށް އޮތް އެންމެ ބޮޑު ހިތްހަމަޖެހުމަކީ ލީގުގައި އެންމެ ފަހުން ކުޅުނު ދެ މެޗުން މޮޅުވެފައިވުން ކަމަށެވެ. އެކަމަކު މި މެޗަށް ނުކުންނައިރުވެސް ޔޫވީގައި އަނިޔާގެ މައްސަލަތައް އެބައުޅޭ ކަމަށާއި، އަދި ސަސްޕެންޝަނުގެ ސަބަބުން ޑިފެންޑަރު މޫސާ އަޒީމް ހަސަނަށް ނުކުޅެވޭ ކަމަށްވެސް ބުންޏެވެ. އަޒީމް ސަސްޕެންޑްވިއިރު، އޭނާއަކީ ޔޫވީއަށް ވަރަށް މުހިންމު ކުޅުންތެރިއެއް ކަމަށާއި، އެހެންކަމުން އޭނަ ނެތްތަން ވެލެންސިއާ މެޗުގައި ދައްކާނެ ކަމަށްވެސް ސާންތި ބުންޏެވެ.

ވެލެންސިއާއާ ބެހޭ ގޮތުން ސާންތި ބުނީ މުޅި ވެލެންސިއާ ޓީމު ބިނާވެފައި އޮތީ އަލީ އަޝްފާގު (ދަގަނޑޭ) އަށް ކަމަށާއި، ވެލެންސިއާ މިހާރު އޮތް ހިސާބުގައި އޮތުމުގައި ދަގަނޑޭގެ ދައުރު ބޮޑު ކަމަށެވެ. އަދި ވެލެންސިއާގައި މި ވަގުތު ތިބި ކުޅުންތެރިންގެ ތެރެއިން ދަގަނޑޭ އާއި، އަލީ ފާސިރު (ސެންޓޭ) އަށް ސަމާލުވާން ޖެހޭ ކަމަށާއި، އެ ދެ ކުޅުންތެރިންނަކީ މެޗުގެ ނަތީޖާ އަނބުރާލާނެ ދެ ކުޅުންތެރިން ކަމަށްވެސް ބުންޏެވެ.

ލީގުގައި ވެލެންސިއާއާ ދެކޮޅަށް ޔޫވީ ނުކުންނައިރު، ޔޫވީ އޮތީ ފުލުގައި ކުޅުނު 13 މެޗުން ލިބުނު 9 ޕޮއިންޓާއެކުއެވެ. އަދި ވެލެންސިއާ އޮތީ ތާވަލުގެ ދެވަނައިގައި ކުޅުނު 12 މެޗުން ލިބުނު 24 ޕޮއިންޓާއެކުއެވެ. ލީގުގެ ދެވަނަ ބުރުގައި ވެލެންސިއާ އާއި ޔޫވީ ބައްދަލުކުރާއިރު، ފުރަތަމަ ބުރުގައި މި ދެ ޓީމު ބައްދަލުކުރި މެޗުން ވެލެންސިއާ ވަނީ 4-0 ގެ ނަތީޖާއަކުން މޮޅުވެފައެވެ.

ދިރާގު ދިވެހި ޕްރިމިއާ ލީގުގައި ވެލެންސިއާ އާއި ޔޫވީ ބައްދަލުކުރާ މެޗު ފަށާނީ ބުރާސްފަތި ދުވަހުގެރޭ 22:00 ގައެވެ.

އެންމެ ފަހުން އަޕްޑޭޓް ކުރީ: 3 ހަފްތާ ކުރިން
ރިވިއު ކުރީ: އިސްމާޢީލް ޝާހް
0%
0%
0%
0%
0%
0%
ކޮމެންޓް