އިންޑިއާއިން 18 އަހަރުން މަތީގެ އެންމެންނަށް ވެކްސިން ޖެހުމަށް ޚާއްސަ ޕްރޮގްރާމެއް

އަވައްޓެރި އިންޑިއާގައި 18 އަހަރުން މަތީގެ އެންމެންނަށް ކޮވިޑް ވެކްސިން ޖެހުމަށް ނިންމައިފިއެވެ.

މިހިނގާ އޭޕްރީލް މަހުގެ 15 ވަނަ ދުވަހުން ފެށިގެން އިންޑިއާއިން ދަނީ ރެކޯޑު އަދަދުތަކުން ކޭސްތައް ރިޕޯޓު ކުރެވެމުންނެވެ. އެގޮތުން ދުވާލެއްގެ މައްޗަށް ދެލައްކައަށްވުރެ ގިނަ ކޭސް ރިޕޯޓު ކުރެވެމުންދާއިރު، މައި ބައެއްސްޓޭޓުތަކުގައި ގެންދަނީ ލޮކްޑައުންގެ ފިޔަވަޅުތައްވެސް ތަންފީޒު ކުރަމުންނެވެ. ބީބީސީގައި ރިޕޯޓު ކޮށްފައިވާ ގޮތުން އަންނަ މެއި މަހުގެ 1 ވަނަ ދުވަހުން ފެށިގެން 18 އަހަރުން މަތީގެ ހުރިހާ އެންމެންނަށް ވެކްސިން ޖެހުމުގެ ބޮޑު ޙަރަކާތެއް ކުރިއަށް ގެންދިއުމަށް ވަނީ ނިންމާފައެވެ.

އިންޑިއާއިން މިވަގުތު ވެކްސިން ޖަހަމުން ގެންދަނީ ހަމައެކަނި ސިއްޙީ ދާއިރާގެ މަސައްކަތްތެރިންނާއި، ފްރަންޓްލައިން މަސައްކަތްތެރިންނަށެވެ. އަދި 45 އަހަރުން މަތީގެ މީހުންނަށްވެސް ކޮވިޑް ވެކްސިން ދެމުންގެންދެއެވެ. ނަމަވެސް އިންޑިއާގައި ކޮވިޑުގެ ޙާލަތު ގޯސްވެފައިވާ ބައެއް ސްޓޭޓުތަކުގައި ވެކްސިން ލިބުމުގައި ދަތިތަކެއް އުޅޭކަމަށް ބީބީސީގައި ރިޕޯޓު ކޮށްފައިވެއެވެ.

ބީބީސީގައި ރިޕޯޓްކޮށްފައިވާ ގޮތުން 23 އޭޕްރީލް ވާ ހުކުރު ދުވަހުން ފެށިގެން އިންޑިއާ، ޔޫކޭގެ ރެޑް ލިސްޓުގައިވެސް ހިމެނިގެންދާނެއެވެ. އެގޮތުން ފާއިތުވި 10 ދުވަސް ތެރޭގައި އިންޑިއާއަށް ދަތުރުކޮށްފައިވާ މީހެއްނަމަ އެ ޤައުމަށް އެތެރެވުން މަނާވާނެކަމަށް ބީބީސީގައި ރިޕޯޓް ކޮށްފައިވެއެވެ. އެހެންނަމަވެސް، ޔޫކޭ އަދި އައިރިޝް ޕާސްޕޯޓެއް އޮތް މީހެއްނަމަ އެ ޤައުމަށް އެތެރެވުމުގެ ހުއްދަ ދޭނެއެވެ. އަދި އެފަދަ މީހުންވެސް ސަރުކާރުން ކަނޑައަޅާ ތަނެއްގައި 10 ދުވަހުގެ ކަރަންޓީން މުއްދަތެއް ފުރިހަމަ ކުރަން ޖެހެއެވެ.

ރިޕޯޓުތައް ބުނާގޮތުން އިންޑިއާއިން ފެނިފައިވާ ކޮވިޑް ވޭރިއަންޓުގެ 100ށް ވުރެ ގިނަ ކޭސް ޔޫކޭއިން މިހާތަނަށް ރިޕޯޓް ކޮށްފައިވެއެވެ. އެކަމުގެ ސަބަބުން އެ ޤައުމުގައި ކޮވިޑް-19އަށް ޓެސްޓު ކުރުމުގެ ކަންކަންވެސް މިހާރު ވަނީ އިތުރަށް ވަރުގަދަކޮށްފައެވެ. ސިއްޙީ މާހިރުންނާ ޙަވާލާދީ ބީބީސީގައި ރިޕޯޓު ކޮށްފައިވާގޮތުން އިންޑިއާއިން ފެނިފައިވާ ވޭރިއަންޓުގައި ކަންބޮޑުވާންޖެހޭފަދަ ކަންކަން ފާހަގަ ކުރެވިފައިވާއިރު، ސައިންސްވެރިން ދަނީ މިހާރު އެކަންކަން އިތުރަށް ދިރާސާ ކުރަމުންނެވެ.