މެދުއިރުމަތީގެ ނުތަނަވަސްކަމުގެ މެދުތެރެއިން ފަރަންސޭސީ ރައީސް ސަޢޫދީއަށް
ވަލީޢަޙުދު މުޙައްމަދު ބިން ސަލްމާންއާ އެކު ލުބްނާން، ޔަމަނު މައްސަލައިގައި މަޝްވަރާކުރާނަން: މެކްރޯން
ފަރަންސޭސީވިލާތުގެ ރައީސް އެމަނުއެލް މެކްރޯން (ކ) ސަޢޫދީ ވަލީޢަހުދު މުހައްމަދު ބިން ސަލްމާން (ވ) އާއި ސަޢޫދީގެ ވެރިރަށް ރިޔާޒްގައި ބައްދަލުކުރައްވަނީ
މެދުއިރުމަތީގެ މަސްރަހު ވަރަށް ބޮޑަށް ހޫނުވެފައި ވަނިކޮށް ފަރަންސޭސީ ރައީސް އެމަނުއަލް މެކްރޯން ކުއްލި ދަތުރުފުޅެއްގައި ސަޢޫދީ ޢަރަބިއްޔާއަށް ވަޑައިގެންފިއެވެ.
ލުބްނާނުގެ ބޮޑުވަޒީރުކަމުން ސާދު ޙަރީރީ އިސްތިއުފާ ދެއްވައި، އީރާނާއި ސަޢޫދީއާ އޮންނަ ގުޅުން މިއިން ޒަމާނަކު ގޯސްނުވާ މިންވަރަށް ގޯސްވެފައިވާ މިދަނޑިވަޅުގައި މެކްރޯން ސަޢޫދީއަށް ކުރައްވާ ދަތުރުފުޅުގައި ސަޢޫދީގެ ވަލީޢަޙުދު މުހައްމަދު ބިން ސަލްމާނާ ބައްދަލުކުރައްވާ ގޮތަށް ވަނީ ހަމަޖެހިފައެވެ. މި ބައްދަލުކުރެއްވުމުގައި ލުބްނާނުގައި ހަމަޖެހުން ޤާއިމްވެފައި އޮތުމުގެ މުހިއްމުކަމާއި، ޔަމަނުގެ މައްސަލައިގައި ވާހަކަ ދައްކަވާނެ ކަމަށް މެކްރޯން ސަޢޫދިއަށް ވަޑައިގަތުމުގެ ކުރިން ޔޫއޭއީގައި ހުންނަވައިގެން ވިދާޅުވިއެވެ. އަދި ލުބްނާނުގެ ސިޔާސީ ހުރިހާ ލީޑަރުންނަށް ވެސް ލުބްނާނުގައި މިނިވަންކަމާ އެކު އުޅެވެން ޖެހޭނެ ކަމަށް އޭނާ ވިދާޅުވިއެވެ.
މެކްރޯން ވިދާޅުވީ އިސްތިއުފާ ދެއްވި ލުބްނާނުގެ ކުރީގެ ބޮޑުވަޒިރު ސާދު ހަރީރީއާ އެކު ނުރަސްމީ ވާހަކަތައް ދެކެވުނު ކަމަށެވެ. އެހެން ނަމަވެސް އޭގެ ތަފްޞީލެއް ނުދެއްވައެވެ. ޙަރީރީ އިސްތިއުފާ ދެއްވާފައި ވަނީ އެމަނިކުފާނުގެ ހަށިކޮޅަށް ގެއްލުން ދިނުމަށް ރޭވުންތަކެއް ރާވާ ކަމަށް ވިދާޅުވެ، އީރާނަށް ވަރަށް ބޮޑަށް ފާޑުވިދާޅުވުމަށް ފަހުއެވެ.
މެދުއިރުމައްޗާއި އަރަބި ދުނިޔޭގެ މަސްރަހު ހޫނުވެފައިވާއިރު، މުޅި ދުނިޔޭގެ ސަމާލުކަން އެސަރަހައްދަށް ވަނީ ހުއްޓިފައެވެ.
