ދެކުނު އިންޑިއާ ކަނޑުގައި އުފެދުނު ކޮޅިގަނޑެއް ތޫފަނަކަށް ބަދަލުވެ، ސަރަޙައްދުގެ ޤައުމުތަކަށް ބާރު ވަޔާއިއެކު ކުރަމުންދާ ވިއްސާރައިގައި އަވަށްޓެރި ސްރީލަންކާއިން 7 މީހުން އަދި އިންޑިއާއިން 8 މީހުން މަރުވެ، އެތައް ހާސް ބަޔަކު ހާލުގައި ޖެހިއްޖެއެވެ.

ތޫފާނާއި ގުޅިގެން ލަންކާއަށް ތިންވަނަ ފަހަރަށް މޫސުމީ ރަތް އިންޒާރު ނެރެފައިވާއިރު، ލަންކާގެ ހުޅަނގުގައިވާ މައި ސިޓީތަކަށް ވަނީ ތޫފާނުގައި ބޮޑެތި ގެއްލުންތަކެއް ލިބިފައެވެ.

އެގޮތުން ތޫފާނުގައި ލަންކާއިން 7 މީހުން މަރުވެފައިވާއިރު، ލަންކާގެ އަމްބަލަންގޮޑަ އަދި ޑޮޑަންޑުވަ ސަރަހައްދުގެ 3 މަސްވެރިންވެސް ހިމެނެއެވެ. އަދި މީގެ އިތުރުން މަސްވެރިއަކާއި އިތުރު 4 މީހަކު ގެއްލިގެން ހޯދަމުންދާކަމަށްވެސް ލަންކާގެ ފުލުހުން ވަނީ ހާމަކޮށްފައެވެ.

ކޮލަމްބޯ އާއި ކޮލަމްބޯގެ ވަށައިގެންވާ ހިސާބުތަކުން 20،000 އަށްވުރެ ގިނަ މީހުންނަށް ވިއްސާރައިގައި އެކިވަރުގެ ގެއްލުންތަކެއް ލިބި، އެހީއަށް ބޭނުންވެފައިވާކަމަށް ކަމާއިބެހޭ ފަރާތްތަކުން ބުނެއެވެ.

އިންޑިއާގެ ސްޓޭޓްތަކުގެ ތެރެއިން މި ތޫފާނުގައި ޓެމިލްނާޑޫ އާއި ކެރެލާއަށް ވަނީ ބޮޑު ގެއްލުންތަކެއް ލިބިފައެވެ. ތޫފާނުގައި ޓެމިލްނާޑޫއިން 4 މީހުން މަރުވެފައިވާއިރު، ކެރެލާއިންވެސް 4 މީހަކު މަރުވެފައިވެއެވެ.

ޓެމިލްނާޑޫއިން މިހާތަނަށް މީހުން މަރުވެފައިވާކަން ކަށަވަރުވެފައިވަނީ ކަންޏަކުމާރީގެ ރާޖަމަންގަލަމް، އީތަމޯޒީ އަދި ވެއްލިޗަންދައި ސަރަޙައްދުންނެވެ. މި ވިއްސާރައިގައި ކެރެލާއަށްވެސް ބޮޑެތި ގެއްލުންތަކެއް ލިބިފައިވާއިރު، އެ ސްޓޭޓްގެ ވެރިކަންކުރާ ތްރިވަނަމްތަޕޫރަމް ވަނީ ގާތްގަނޑަކަށް ހުއްޓުމަކަށް އައިސްފައެވެ. ކެރެލާއިން މަރުވި 4 މީހުންގެ ތެރޭގައި، ކޮއްލަމްގައި ދުއްވާފައި ދިޔަ އޮޓޯރިކްޝޯއެއްގެ މައްޗަށް ގަހެއް ވެއްޓުނު ހާދިސާގައި މަރުވި އެ އޮޓޯރިކްޝޯގެ ޑްރައިވަރު ހިމެނެއެވެ.

ތޫފާނާއި ގުޅިގެން އިންޑިއާ އާއި ލަންކާއިންވެސް މީހުން ސަލާމަތް ކުރުމަށާއި، ގެއްލުންތައް ލިބޭ މިންވަރު މަދުކުރުމަށް ގިނަ މަސައްކަތްތަކެއް ކުރަމުންދާއިރު، ކޮލަމްބޯ އާއި ކޮލަމްބޯގެ ވަށައިގެންވާ ސަރަޙައްދުތަކުގެ ސްކޫލްތަކާއި، އިންޑިއާގެ ޓެމިލްނާޑޫގެ ޓޫޓީކޮރިން، ތިރުވާރޫރް، ނެއްލައި އަދި ޕުޑުކޮއްޓައިގެ އިތުރުންވެސް ބައެއް ސަރަޙައްދުތަކުގެ ސްކޫލްތައް ވަނީ މުއްދަތެއް ނެތްގޮތަށް ބަންދުކޮށްފައެވެ.

މި ތޫފާނާއި ގުޅިގެން ހޮނިހިރު ދުވަހާއި ހަމައަށް ބޯކޮށް ވާރޭ ވެހޭނެކަމަށް ލަފާކުރާއިރު، ތޫފާން އުފެދިފައިވާ ސަރަޙައްދުގައި އާދީއްތަ ދުވަހާއި ހަމައަށް ގަޑިއަކު 85 ކިލޯމީޓަރު ބާރުމިނުގައި ވައިޖެހޭނެއެވެ. އަދި ބުރާސްފަތި ދުވަހުގެ ރެއިން ފެށިގެން ލަކްޝަދްވީޕަށް ގަޑިއަކު 100 ކިލޯމީޓަރު ބާރުމިނުގައި ވައިޖެހޭނެ ކަމަށް މޫސުމާއިބެހޭ އިދާރާތަކުން ލަފާކުރެއެވެ.