އުމުރުން 50 އަހަރުން ދަށުގެ މީހުން އަގްސާ މިސްކިތަށް ހުކުރު ނަމާދަށް ނުވަދެވޭނެ ކަމަށް އިޒްރޭލު ފުލުހުން ބުނެފި

އުމުރުން 50 އަހަރުން ދަށުގެ މީހުން އަގްސާ މިސްކިތަށާއި އަދި ގުދުސްގެ އޯލްޑް ސިޓީއަށް ހުކުރު ނަމާދަށް ނުވަދެވޭނެ ކަމަަށް އިޒްރޭލު ފުލުހުން ބުނެފިއެވެ.

އިޒްރޭލު ފުލުހުން ނެެރުނު ބަޔާނެއްގައި މިގޮތަށް ހާމަކޮށްފައިވާއިރު ބަޔާނުގައި އިތުރަށް ބުނީ ހުރިހާ އުމުރެއްގެ އަންހެނުންނަށް އަގްސާ މިސްކިތަށާއި އަދި ގުދުސްގެ އޯލްޑް ސިޓީއަށް ވަދެވޭނެ ކަމަށެވެ.

ދާދިފަހުން އަގްސާ މިސްކިތުގައި ދިން ހަމަލާތަކެއްގައި އިޒްރޭލު ދެ ފުލުހުން މަރުވުމާއި ގުޅިގެން އިޒްރޭލު ފުުލުހުން އަގްސާ މިސްކިތް ދާދިފަހުން ބަންދުކުރިއެވެ. އަދި އެއަށްފަހު ދެތިންދުވަހަށް ފަހު ހުޅުވާލިއެވެ. އިޒްރޭލުން އަލުން މިސްކިތް ހުޅުވިއިރު ސަލާމަތީ ކަންކަން ވަނީ ވަރަށް ވަރުގަދަކޮށްފައެވެ. އެގޮތުން މިސްކިތުގެ ހަރިންމަ ފެންނާނޭހެން ގިނަ އަދަދެއްގެ ސީސީޓީވީ ކެމެރާ އާއި މެޓަލް ޑިޓެކްޓާ ހަރުކޮށްފައި ވެއެވެ. ފަލަސްތީނުގެ އިސްފަރާތްތަކާއި އަދި ރައްޔިތުން ބުނަމުން ގެންދަނީ އަގްސާ މިސްކިތް އަލުން ހުޅުވާލިއިރު، އިޒްރޭލުން މަސައްކަތް ކުރަމުން ގެންދަނީ މިސްކިތުގެ ކޮންޓްރޯލް އެއްކޮށް ނަގަން ކަމަށެވެ.

އަލް އަގްސާ މިސްކިތަކީ މުސްލިމުންގެ ތިންވަނަ އަށް އެންމެ މުގައްދަސް ތަނެވެ.