އަލްބޭނިއާގެ މިސްކިތެއްގައި ފަސް މީހަކަށް ހަމަލާދީފި

އަލްބޭނިއާގެ ވެރިރަށުގައި ހުރި މިސްކިތެއްގައި ފަސް މީހަކަށް ތޫނު އެއްޗަކުން ހަމަލާދީފިއެވެ.

އަރަބްނިއުސްގައި ރިޕޯޓްކޮށްފައިވާ ގޮތުން އަލްބޭނިއާގެ ވެރިރަށް، ޓިރާނާގައި ހުންނަ މިސްކިތަކަށް ވަދެ އެގައުމުގެ ފިރިހެނަކު ވަނީ މިސްކިތުގައި ތިބި ފަސް މީހުންނަށް ވަޅިން ހަމަލާދީފައެވެ.

އެގޮތުން އެގައުމުގެ ފުލުހުން މައުލޫމާތުދޭ ގޮތުގައި ރުޑޮލްފް ނިކޮލީ ނަމަކަށް ކިޔާ އުމުރުން 34 އަހަރުގެ މީހެއް ވަނީ ޓިރާނާގައި ހުންނަ ޑައިން ހޮކްސާ މިސްކިތަށް ހޯމަ ދުވަހުގެ މެންދުރު 2:30 ހާއިރު ވަދެ ފަސް މީހުންނަށް ވަޅިން ހަމަލާދީ ޒަޚަމްކޮށްލާފައެވެ. އަދި މިކަމާ ގުޅިގެން ވަގުތުން ފުލުހުން ހަރަކާތްތެރިވާން ފަށައި އެމީހާ ފުލުހުންގެ ބެލުމުގެ ދަށަށް ގެންގޮސްފައިވާކަމަށް ފުލުހުން ބުނެއެވެ.

މީގެ އިތުރުން ހަމަލާގައި ޒަހަމްވި ފަސް މީހުންވެސް ވަގުތުން ހޮސްޕިޓަލަށް ގެންގޮސްފަރުވާދޭން ފަށާފައިވާކަމަށާއި އެއްވެސް މީހެއްގެ ފުރާނައަށް ގެއްލުންވާފަދަ އަނިޔާއެއް ލިބިފައިވާނުވާކަމަށް ފުލުހުން ބުނެއެވެ.

އަލްބޭނިއާގެ ފުލުހުން މައުލޫމާތުދޭ ގޮތުގައި އަނިޔާ ލިބިފައިވަނީ އުމުރުން 22 އަހަރާއި 35 އަހަރާއި ދެމެދުގެ ފަސް މީހުންނަށެވެ.

މެންދުރުގެ ވަގުތު އެމީހާ މިސްކިތަށް ވަދެ ހަމަލާދިންއިރު، ގިނަ އަދަދެއްގެ ބަޔަކު ދިޔައީ މިސްކިތުގައި އަޅުކަން ކުރުމުގައި ހަރަކާތްތެރިވަމުންނެވެ. މިހަމަލާއާއި ގުޅިގެން މިސްކިތުގެ އިމާމްވަނީ މިއީ ޓެރަރިސްޓް ހަމަލާއެއް ނޫންކަމަށް އުންމީދުކުރާކަމަށް ބުނެފައެވެ.

މިހާތަނަށް ހާމަކޮށްފައިވާ މައުލޫމާތުތަކުން މިސްކިތުގައި ހަމަލާދިން ރުޑޮލްފްއަކީ ކޮން ދީނެއްގެ މީހެއްކަން ސާފެއް ނުވެއެވެ.