ޓޮޓެންހަމް ހޮޓްސްޕާގެ ކޯޗުގެ މަޤާމުން ހޯސޭ މޮރީނިއޯ ވަކިކޮށްފިއެވެ.

ހޯމަ ދުވަހުގެ ވަގުތެއްގައި ޓޮޓެންހަމުން ވަނީ މޮރީނިއޯ އާއި އޭނާގެ ކޯޗިން ޓީމު ވަކިކުރިކަން އިޢުލާންކޮށްފައެވެ. އަދި މި ސީޒަނުގެ ނިޔަލަށް އެ ޓީމަށް ދެން ކޯޗުކޮށްދޭނީ ރަޔާން މޭސަން ކަމަށް ޓޮޓެންހަމުން ނެރުނު ބަޔާނުގައި ވަނީ ބުނެފައެވެ.

މޮރީނިއޯ ވަކިކުރުމަށްފަހު ޓޮޓެންހަމުގެ ޗެއާމަން ޑެނިއެލް ލެވީ ވަނީ އެ ކުލަބަށް ދިމާވި އެންމެ ދަތި ހާލުގައިވެސް މޮރީނިއޯ އާއި އޭނާގެ ކޯޗިން ޓީމު ކޮށްދިން ޚިދުމަތަށް ޝުކުރުއަދާކުރައްވާފައެވެ. އަދި ވިދާޅުވީ މޮރީނިއޯއަކީ ޕްރޮފެޝަނަލް ކަމާއެކު މަސައްކަތްކުރާ ކޯޗެއް ކަމަށާއި، އަދި އެ ޓީމުގެ ކޯޗުކަމުން މޮރީނިއޯ ވަކިކުރި ނަމަވެސް، ޓޮޓެންހަމުން އޭނާއަށް އަބަދުވެސް މަރުޙަބާ ކިޔާނެ ކަމަށެވެ.

ޓޮޓެންހަމުން މޮރީނިއޯ ވަކިކުރިއިރު، އޭނާ އެ ޓީމުގައި މަސައްކަތްކޮށްފައިވަނީ 17 މަސް ދުވަހަށެވެ. އެގޮތުން ކުލަބަކާ ހަވާލުނުވެ އަހަރެއްހާ ދުވަހު ހުރުމަށްފަހު، މޮރީނިއޯ ޓޮޓެންހަމުގެ ކޯޗުކަމާ 2019 ވަނަ އަހަރުގެ ނޮވެމްބަރު މަހު ހަވާލުވީ ބޮޑު މަޝްރޫއަކާއެކުއެވެ. އެގޮތުން މިދިޔަ ސީޒަނުގެ މެދުތެރެއިން ޓޮޓެންހަމާ ހަވާލުވެ، އޭނާ ރަނގަޅު މަސައްކަތްކޮށްދިންއިރު، ލީގުގެ 14 ވަނައިގައި އޮތް ޓޮޓެންހަމް ތާވަލުގެ ހަވަނައަށް ގެންގޮސްދީ، ޔުއެފާ ޔޫރަޕާ ލީގަށް ވަނީ ކޮލިފައިކޮށްދީފައެވެ.

އެކަމަކު މި ސީޒަނުގައި މޮރީނިއޯއާއެކު ޓޮޓެންހަމުގެ ނަތީޖާތައް ވަނީ ވަރަށް ބޮޑަށް ދަށްވެފައެވެ. އެގޮތުން މި ސިޒަނުގެ ޔޫރޮޕާ ލީގުން ޓޮޓެންހަމް ކަޓާފައިވާއިރު، އެ ޓީމު އޮތީ ޕްރިމިއާ ލީގުގެ ހަތްވަނައިގައެވެ. އަދި ލީގުގައި ޓޮޓެންހަމް މިހާތަނަށް ވަނީ 10 މެޗުން ބަލިވެފައެވެ. ނަމަވެސް މޮރީނިއޯގެ އިރުޝާދުގެ ދަށުން މި ސީޒަނުގެ އިނގިރޭސި ލީގު ކަޕުގެ ފައިނަލަށް ޓޮޓެންހަމް ވަނީ ދަތުރުކޮށްފައެވެ. އެގޮތުން ލީގު ކަޕުގެ ފައިނަލުގައި މެންޗެސްޓާ ސިޓީއާ ދެކޮޅަށް އަންނަ އާދިއްތަ ދުވަހު ޓޮޓެންހަމް ނުކުންނާނެއެވެ.

ޓޮޓެންހަމުގެ ކޯޗުގެ މަޤާމުން މޮރީނިއޯ ވަކިކުރިއިރު، މިއީ އޭނާގެ އިރުޝާދުދިން އަށްވަނަ ޓީމެވެ. އެގޮތުން މީގެ ކުރިން މޮރީނިއޯ ވަނީ ރެއާލް މެޑްރިޑާއި، ޗެލްސީ އަދި އިންޓަ މިލާނާއެކު ގިނަ ކާމިޔާބީތަކެއް ހޯދާފައެވެ. އަދި ފަހުން މޮރީނިއޯ ވަނީ މެންޗެސްޓާ ޔުނައިޓެޑަށްވެސް އިރުޝާދުދީފައެވެ.