އިނގިރޭސިވިލާތުގެ މާބަނޑު އަންހެނުން ފައިޒަރ އަދި މޮޑާނާއިން ކޮވިޑަށް އުފައްދާފައިވާ ވެކްސިން ޖެހުމަށް އެގައުމުގެ ވެކްސިނޭޝަން އާއި އިމުޔިނިޒޭޝަން ކޮމިޓީން ލަފާދީފިއެވެ.
އެކޮމިޓީން ބުނެފައިވަނީ މި ދެ ވެކްސިން އަކީ ދުނިޔޭގައި މިހާރު ޖަހަމުން އަންނަ ވެކްސިންތަކުގެ ތެރެއިން އެންމެ ގިނަ އަދަދަކަށް ޑާޓާތައް ނެގި ދިރާސާކުރެވިފައިވާ ދެ ވެކްސިންކަމަށެވެ. އަދި މިހާތަނަށް އައިއިރު އެ ދެވެކްސިން އަކީ ބޭނުންކުރަން ރަނގަޅު ދެވެކްސިންކަމަށް ދިރާސާތަކުން އެނގިފައިވާކަމަށް އެކޮމިޓީން ވަނީ ބުނެފައެވެ.
ކޮމިޓީން ބުނެފައިވަނީ އެމެރިކާގައި ދިރިއުޅޭ 90،000 މާބަނޑު މީހުންނަށް މި ދެ ވެކްސިންގެ ތެރެއިން ކޮންމެސް އެއް ވެކްސިނެއް ދީފައިވާކަމަށާއި މިހާތަނަށް އައިއިރު އެއްވެސް މައްސަލައެއް ދިމާވެގެން ރިޕޯޓްކޮށްފައިނުވާ ކަމަށެވެ.
އެހެންކަމުން ލިބިފައި ހުރި ޑާޓާތަކަށް ބަލާ އެކޮމިޓީން ލަފާދެނީ ފައިޒަރ އަދި ބައޯއެންޓެކްގެ ވެކްސިން ނުވަތަ މޮޑާނާ ވެކްސިން ލިބެން ހުރިނަމަ އިނގިރޭސިވިލާތުގައި ދިރިއުޅޭ މާބަނޑު އަންހެނުން އެ ދެވެކްސިންގެ ތެރެއިން ވެކްސިނެއް ޖެހުމަށްކަމަށް ކޮމިޓީން ބުނެފައިވެއެވެ. އެހެންނަމަވެސް ދެން ހުރި ވެކްސިންތަކުން ނުރަނގަޅު އަސަރެއް ކުރާކަން އަދި މިހާތަނަށް ހޯދިފައިނުވާކަމަށާއި އެކަމަށްޓަކައި އިތުރު ދިރާސާތަކެއް ކުރަންޖެހޭކަމަށް މިކޮމިޓީން ބުނެފައިވެއެވެ.
ފަހަކާ ޖެހެންދެންވެސް އިނގިރޭސިވިލާތުގައި މާބަނޑު އަންހެނުން ވެކްސިން ނުޖެހުމަށް ދިޔައީ އިރުޝާދުދެމުންނެވެ. އެއީ ވެކްސިނުން މާބަނޑު މީހުންނަށް ކުރާ އަސަރު ދެނެގަނެވޭނެ ފަދަ ދިރާސާއެއް ހެދިފައިނުވާތީއެވެ.
އިނގިރޭސިވިލާތުގެ ހެލްތު ސެކެޓްރީ މެޓް ހެންކޮކް ވަނީ މާބަނޑު ހުރިހާ އަންހެނުންނަށްވެސް ވެކްސިން ޖެހުމުގެ ފުރުސަތު ލިބުމުން ވެކްސިން ޖަހަން ދިޔުމަށް ހިތްވަރުދެއްވާފައެވެ.
އަނެއްކޮޅުން އިނގިރޭސިވިލާތުން ދާދިފަހުން ވަނީ އުމުރުން 30 އަހަރުން ދަށުގެ މީހުންގެ ތެރެއިން އެސްޓްރަޒެނިކާ ވެކްސިން ޖެހި މީހުންނަށް އިތުރު ވެކްސިނެއް ދިނުމަށް ލަފާދީފައެވެ. އެއީ މިފަހުން އެވެކްސިނުން ފެނިފައިވާ ސައިޑް އެފެކްޓްސްތަކާއި ގުޅިގެންނެވެ.
