މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ އޮފީސް އިމާރާތުގެ ބިއްލޫރިގަނޑު ތަޅާލި މައްސަލައާ ގުޅިގެން ފުލުހުން ތިން މީހަކު ހައްޔަރުކޮށްފިއެވެ.

މި މައްސަލައާ ގުޅިގެން ފުލުހުންގެ މީޑިއާ އޮފިޝަލް "ރާއްޖެއެމްވީ" އަށް ވިދާޅުވީ، ކޯޓު އަމުރެއްގެ ދަށުން ތިން މީހަކު މިހާރު ހައްޔަރުކޮށްފައި ވާކަމަށެވެ. އެގޮތުން އެ ތިން މީހުން ހައްޔަރުކޮށްފައިވަނީ ބުދަ ދުވަހުގެ ދުވާލުގެ ވަގުތު އަދި ރޭގަނޑުގެ ވަގުތުގައި ކަމަށް ފުލުހުން މައުލޫމާތުދެއެވެ.

އެމްޑީޕީ އޮފީހަށް ގެއްލުންދިން މައްސަލައިގައި ހައްޔަރުކޮށްފައިވަނީ، އުމުރުން 36 އަހަރާއި، 24 އަހަރާއި، 21 އަހަރުގެ ދިވެހި ތިން ފިރިހެނުން ކަމަށް ފުލުހުން ބުނެއެވެ.

އަންގާރަ ދުވަހު ހަވީރު 16:50 ހާއިރު، އެމްޑީޕީ އޮފީހަށް މި ހަމަލާ ދީފައިވަނީ، އެދުވަހު އިލެކްޝަން ކޮމިޝަނުގެ އިންތިޚާބާ ބެހޭ މަރުކަޒު ހުންނަ ސަރަހައްދުގައި ވާދަވެރި ސިޔާސީ ޕާޓީތަކުން ބޮޑު ހަމަނުޖެހުމެއް ހިންގާފައި ވަނިކޮށެވެ. ހަމަނުޖެހުން ހިނގި ވަގުތު ރައީސް ނަޝީދު ވެސް އެ ހިސާބުގައި ހުންނެވިއެވެ. އެހެންނަމަވެސް އީސީގެ އެތެރެއަށް ވެދެވަޑައެއް ނުގަންނަވައެވެ.