އެމްޑީޕީގެ ވަގުތީ ޗެއަރޕަރސަނަކަށް މެންބަރު ޣަފޫރު
8 ޑިސެމްބަރު 2025 | ހޯމަ 16:43މަގާމަށް ޣަފޫރު އިންތިހާބުކުރީ ވޯޓުގައި ބައިވެރިވި 66 މެންބަރުންގެ ތެރެއިން 65 މެންބަރުންގެ ވޯޓާ އެކު
އެމްޑީޕީގެ ވަގުތީ ޗެއަރޕަރސަންގެ މަޤާމަށް އައްޔަން ކުރި ޢަފޫރު
މޯލްޑިވިއަން ޑިމޮކްރެޓިކް ޕާޓީ، އެމްޑީޕީގެ ވަގުތީ ޗެއަރޕަރސަންގެ މަގާމަށް ރައްޔިތުންގެ މަޖިލީހުގެ ހަނިމާދޫ ދާއިރާގެ މެންބަރު އަބްދުލްޣަފޫރު މޫސާ (ގަޕޯ) އިންތިހާބުކޮށްފި އެވެ.
އެމްޑީޕީގެ ޤައުމީ މަޖިލީހުން އެގޮތަށް ފާސްކުރީ ހޯމަ ދުވަހުގެ ރެ އެ ޕާޓީގެ ގައުމީ މަޖިލީހުގެ ޖަލްސާގަ އެވެ.
އެ ޖަލްސާ ފެށި އިރު ޖަލްސާގެ ރިޔާސަތު ބެލެހެއްޓެވީ އެމްޑީޕީގެ ޗެއަރޕަރސަންގެ ނައިބު އިބްރާހިމް ވަހީދު އެވެ. އެ ޖަލްސާ ކުރިއަށް ދިޔައީ ކުރިން އެމްޑީޕީގެ ޗެއަރޕަރސަން ހޮވުމަށް ބޭއްވި ޖަލްސާ ނިމުނު ހިސާބުންނެވެ. މީގެ ކުރިން އެކަމަށްޓަކާ ބޭއްވި ޖަލްސާގައި އުފެދުނު ބައެއް ދެބަސްވުންތަކަށް ފަހު އެ ޖަލްސާ ކުރިއަށް ނުގެންދެވުމުން އެ ޖަލްސާ ވަނީ މެދުކަނޑާލާފަ އެވެ.
ހޯމަ ދުވަހުގެ ރޭގެ ޖަލްސާގައި ގައުމީ މަޖިލިސް ގެ މެމްބަރެއް ކަމުގައިވާ އިލްހާމް އަހުމަދު ޕާޓީގެ ވަގުތީ ޗެއަރޕަރސަން ކަމުގެ މަޤާމް އަށް ހަނިމާދޫ ދާއިރާގެ މަޖިލިސް ގެ މެމްބަރު އަދި ޤައުމީ މަޖިލިސްގެ މެމްބަރު އަބްދުލް ޣަފޫރު މޫސާގެ ނަން ހުށައެޅުއްވުމުން އެ ނަމަށް ތާއިދު ލިބި ޕާޓީގެ ވަގުތީ ޗެއަރޕަރސަން ކަމަށް އަބްދުލް ޣަފޫރު ހޮވުނީ ގައުމީ މަޖިލީހުގެ ޖަލްސާގައި ބައިވެރިވި 66 މެންބަރުންގެ ތެރެއިން 65 މެންބަރުންގެ ވޯޓާއެކު އެވެ. އަބްދުލް ޣަފޫރު ވަނީ އޭނާ އެ މަޤާމަށް ހޮވުމުން ވޯޓުދެއްވި މެމްބަރުންނަށް ޝުކުރު އަދާކުރައްވާފަ އެވެ.
އަބްދުލް ޣަފޫރު މޫސާ އަކީ އަކީ އެމްޑީޕީގެ ޕީޖީ ގްރޫޕުގެ އެންމެ ގިނަ ދުވަސްވީ މެމްބަރެވެ. އޭނާ އަކީ މަޖިލީހުގައި ވެސް ގިނަ ދުވަހު ޚިދުމަތް ކުރައްވާފައިވާ މެމްބަރެކެވެ. އެމްޑީޕީގެ ޗެއަރޕަރސަންގެ މަގާމު ހުސްވީ އެ މަޤާމުގައި ހުންނެވި ކުރީގެ އިކޮނޮމިކް މިނިސްޓަރު ފައްޔާޒު އިސްމާއިލް މަގާމުން އިސްތިއުފާ ދެއްވުމުންނެވެ.
