އެމްޑީޕީ އަކީ ޚިޔާލު ތަފާތު ވުންތަކާއެކު ދިރި ދެމި އޮންނަ ޕާޓީއެއް، އެއީ ޕާޓީ ބައިބައި ވުމެއް ނޫން: ޣަފޫރު
އެމްޑީޕީ އަކީ ފެށުނީއްސުރެ ޚިޔާލު ތަފާތުވުމާއެކު ދިރިދެމި އޮތް ޕާޓީއެއް ކަމަށް
އެމްޑީޕީގެ ވަގުތީ ޗެއާޕަރސަން، ރައްޔިތުންގެ މަޖިލީހުގެ ހަނިމާދޫ ދާއިރާގެ މެންބަރު އަބްދުލްޣަފޫރު މޫސާ
މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އަކީ ޚިޔާލު ތަފާތު ވުންތަކާއެކު ވެސް ދިރި ދެމި އޮންނަ ޕާޓީ އެއް ކަމަށް އެ ޕާޓީގެ ވަގުތީ ޗެއާޕަރސަން، ރައްޔިތުންގެ މަޖިލީހުގެ ހަނިމާދޫ ދާއިރާގެ މެންބަރު އަބްދުލްޣަފޫރު މޫސާ ވިދާޅުވެއްޖެ އެވެ.
އެމްޑީޕީ އިން އަންގާރަ ދުވަހު ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން ޣަފޫރު ވިދާޅުވީ ޚިޔާލު ތަފާތު ވުން ހުރުމަކީ ޕާޓީ ބައިބައި ވުން ނޫން ކަމަށެވެ. އެމްޑީޕީ އަކީ އަބަދު ވެސް ފެށުނީއްސުރެ ވެސް ޚިޔާލުތަފާތު ވުމާއެކު ދިރިދެމި އޮތް ޕާޓީ އެއް ކަމަށާ އެކަން އެގޮތުގައި ދެމި އޮންނާނެ ކަމަށް ޣަފޫރު ވިދާޅުވި އެވެ.
ޣަފޫރު ވިދާޅުވީ ޕާޓީގެ މެންބަރުން ޕާޓީގައި ދެމިތިބުމަކީ މުހިއްމު ކަމެއް ކަމަށެވެ. އަދި ވަކި ލީޑަރެއްގެ ފަހަތުން ޕާޓީ ދޫކޮށް ދިއުމަކީ ރަނގަޅު ކަމެއް ނޫން ކަމަށް ވެސް ޣަފޫރު ވިދާޅުވި އެވެ.
ކޮންމެ މީހަކަށް ވެސް ސިޔާސީ ގޮތުން ފުރުސަތުތައް ލިބެނީ ޕާޓީ އިން ކަމަށާ އެ ފުރުސަތުތަކަކީ ޕާޓީ ގެ މެންބަރުން ކުރާ މަސައްކަތުން ލިބޭ ފުރުސަތުތަކެއް ކަމަށް ވެސް ޣަފޫރު ވަނީ ވިދާޅުވެފަ އެވެ.
އެހެންވީމާ އެކަން އަޅުގަނޑުމެން އެންމެން ވެސް ހަނދާނުގައި ބަހައްޓަން ޖެހޭނެ. އޭރުން އަޅުގަނޑުމެންގެ ޕާޓީ އަަބަދުވެސް ގަދަކޮށް، އެންމެން އެއްކޮށް އޮންނާނީ. އެނޫން އެހެން ވިސްނުމެއްގައެއް އަޅުގަނޑުމެން މަސައްކަތެއް ނުކުރާނަން. އަޅުގަނޑުމެން މިތިބީކީއެއް ވަކި ލީޑަރެއްގެ ފަހަތުގައެއް ނޫން، އަޅުގަނޑުމެން މިތިބީ އެމްޑީޕީގައި.އެމްޑީޕީގެ ވަގުތީ ޗެއާޕަރސަން، ރައްޔިތުންގެ މަޖިލީހުގެ ހަނިމާދޫ ދާއިރާގެ މެންބަރު އަބްދުލްޣަފޫރު މޫސާ
ޣަފޫރު ވިދާޅުވީ ޕާޓީގެ ތެރޭގައި ހުރިހާ ކަމެއް ވެސް ގެންދާނީ އިންސާފުން ކަމަށެވެ. އަދި ވިދާޅުވީ އެއްވެސް މެންބަރަކު މާޔޫސް ވާން ނުޖެހޭނެ ކަމަށާ ޚިޔާލުތަފާތުވުން ތަކަށް ވެސް ޕާޓީ ޖާގަ ދޭނެ ކަމަށެވެ.
ނަމަވެސް މިވަގުތަށް އެކަން އެއްފަރާތް ކުރުމަށް ފަހު ކުރިއަށް އޮތް ލޯކަލް ކައުންސިލް އިންތިޚާބުގައި ޕާޓީގެ އެންމެހާ މެންބަރުން ނިކުމެ މަސައްކަތް ކުރަން ޖެހިފައިވާ ކަމަށް ވެސް ޣަފޫރު ވިދާޅުވި އެވެ.
ސަރުކާރުން އެތައް ގޮތަކަށް ޕާޓީގެ ކަންކަމަށް ދަތި ކުރަމުންދާ ކަމަށާ މެންބަރުންނަށް ބިރު ދައްކަމުން ދާ ކަން ފާހަގަކުރައްވާ ޣަފޫރު ވިދާޅުވީ ސަރުކާރުގެ އިންޒާރުތަކަށް ބެލުމެއް ނެތި މެންބަރުން އެކުގައި މަސައްކަތް ކޮށްފިނަމަ އެ ޕާޓީ އަށް ކާމިޔާބު ވާނެ ކަމާ މެދު ޝައްކު ނުކުރައްވާ ކަމަށެވެ.
