އަޅުގަނޑަކީ އެއްވެސް މީހެއްގެ ނުފޫޒަށް ތަބާވެގެން ކަންކަން ކުރާނެ މީހެއް ނޫން: ވަގުތީ ޗެއަރޕަރސަން ޣަފޫރު
8 ޑިސެމްބަރު 2025 | ހޯމަ 18:47އަބްދުލް ޣަފޫރު މޫސާ ވިދާޅުވީ އޭނާގެ މަސައްކަތްތައް ބައްޓަން ކުރައްވާނީ ޕާޓީގެ އަސާސީ ޤަވާއިދާއި އެއްގޮތަށް
އެމްޑީޕީގެ ވަގުތީ ޗެއަރޕަރސަން ޣަފޫރު ގައުމީ މަޖިލީހުގެ ރިޔާސަތު ބަލަހައްޓަވަނީ
އެއްވެސް މީހެއްގެ ނުފޫޒަށް ތަބާވެގެން ކަންކަން ނުކުރައްވާނެ ކަމަށް މޯލްޑިވިއަން ޑިމޮކްރެޓިކް ޕާޓީ، އެމްޑީޕީގެ ވަގުތީ ޗެއަރޕަރސަން އަބްދުލްޣަފޫރު މޫސާ (ގަޕޯ) ވިދާޅުވެއްޖެ އެވެ.
އެމްޑީޕީގެ ޤައުމީ މަޖިލީހުން އޭނާ އެ މަޤާމަށް ގެންނަން ފާސްކުރީ ހޯމަ ދުވަހުގެ އެ ޕާޓީގެ ގައުމީ މަޖިލީހުގެ ޖަލްސާގަ އެވެ. ޣަފޫރު ވިދާޅުވީ އޭނާގެ މަސައްކަތްތައް ބައްޓަން ކުރައްވާނީ ޕާޓީގެ އަސާސީ ޤަވާއިދާއި އެއްގޮތަށް ކަމަށެވެ. އަދި އެއްވެސް މީހަކަށް މަންފާ އެއް ހޯދައިދިނުމަށް މަސައްކަތް ނުކުރައްވާނެ ކަމުގެ ޔަޤީންކަން އޭނާ ވަނީ ޕާޓީގެ މެމްބަރުންނަށް އަރުވާފަ އެވެ.
"އަލަށް ޗެއަރޕަރސަން ކަމަށް އައީމަ ކޮންމެވެސް އެއްޗެއް އަޑު އަހާލަން ވެސް ބޭނުން ވާނެ. އަޅުގަނޑު ތިބޭފުޅުންނަށް ޔަޤީންކޮށް މި އަރުވަނީ، އަޅުގަނޑު ހަމަ އަސާސީ ޤަވާއިދާއި ހަމައިގެ ތެރެއިން ނޫން ގޮތަކަށް އެއްވެސް ކަމެއް ނުކުރާނަން. އަޅުގަނޑަށް ވަކި މީހަކަށް ވަކި ގޮތެއް ހަދަން ވަކި މީހެއްގެ ނުފޫޒަށް ތަބާވެގެން ކަން ކުރާނެ މިހެއް ނޫންކަމުގެ ޔަޤީންކަން އަރުވަން" ޣަފޫރު ވިދާޅުވި އެވެ.
ހޯމަ ދުވަހުގެ ރޭގެ ޖަލްސާގައި ގައުމީ މަޖިލިސް ގެ މެމްބަރެއް ކަމުގައިވާ އިލްހާމް އަހުމަދު ޕާޓީގެ ވަގުތީ ޗެއަރޕަރސަން ކަމުގެ މަޤާމް އަށް ހަނިމާދޫ ދާއިރާގެ މަޖިލިސް ގެ މެމްބަރު އަދި ޤައުމީ މަޖިލިސްގެ މެމްބަރު އަބްދުލް ޣަފޫރު މޫސާގެ ނަން ހުށައެޅުއްވުމުން އެ ނަމަށް ތާއިދު ލިބި ޕާޓީގެ ވަގުތީ ޗެއަރޕަރސަން ކަމަށް އަބްދުލް ޣަފޫރު ހޮވުނީ ގައުމީ މަޖިލީހުގެ ޖަލްސާގައި ބައިވެރިވި 66 މެންބަރުންގެ ތެރެއިން 65 މެންބަރުންގެ ވޯޓާއެކު އެވެ. އަބްދުލް ޣަފޫރު ވަނީ އޭނާ އެ މަޤާމަށް ހޮވުމުން ވޯޓުދެއްވި މެމްބަރުންނަށް ޝުކުރު އަދާކުރައްވާފަ އެވެ.
