އެމްޑީޕީ ގެ ވަގުތީ ޗެއަރޕާސަން އަކަށް ހޮވުނު ޣަފޫރަށް ރައީސް ޞާލިހް މަރުހަބާ ދަންނަވައިފި
ރައީސް ޞާލިހް ވަނީ ޣަފޫރަށް ފުރިހަމަ އިތުބާރު އޮތް ކަމަށާއި މި ނާޒުކު ދަނޑިވަޅުގައި ޕާޓީ ކުރިއަށް ގެންދިއުމުގައި ޣަފޫރު ކާމިޔާބު ވާނެ ކަމަށް ޔަގީން ކުރައްވާކަން ހާމަ ކުރައްވާފަ
ކުރީގެ ރައީސް އިބްރާހިމް މުހައްމަދު ޞާލިހު
ރައްޔިތުން ގެ މަޖިލީހުގެ ހަނިމާދޫ ދާއިރާ ގެ މެމްބަރު އަބްދުލް ޣަފޫރު މޫސާ (ގަޕޯ) އެމްޑީޕީ ގެ ވަގުތީ ޗެއަރޕާސަން ގެ މަގާމަށް ހޮވުމާ ގުޅިގެން، ކުރީގެ ރައީސް އިބްރާހިމް މުހައްމަދު ޞާލިހް އެ މަނިކުފާނަށް މަރުހަބާ ދަންނަވައިފި އެވެ.
ރައީސް ޞާލިހް މިކަން ހާމަކުރެއްވީ އެކްސްގައި ކުރެއްވި ޕޯސްޓެއްގަ އެވެ. އެ ޕޯސްޓްގައި ރައީސް ޞާލިހް ވިދާޅުވީ މެމްބަރު އަބްދުލްޣަފޫރު މޫސާ އެމްޑީޕީގެ ވަގުތީ ޗެއަރޕާސަންގެ މަގާމަށް ހޮވުމުން، ހެޔޮ އެދުންތަކާއެކު މަރުހަބާ ދަންނަވާ ކަމަށެވެ.
ރައީސް ޞާލިހް ވަނީ ޣަފޫރަށް ފުރިހަމަ އިތުބާރު އޮތް ކަމަށާއި، މި ނާޒުކު ދަނޑިވަޅުގައި ޕާޓީ ކުރިއަށް ގެންދިއުމުގައި ޣަފޫރު ކާމިޔާބުވާނެ ކަމުގެ ޔަގީންކަން އޮތް ކަމަށްވެސް ވިދާޅުވެފަ އެވެ.
ހޯމަ ދުވަހުގެ ރޭގައި ބޭއްވި އެމްޑީޕީ ގައުމީ މަޖްލިސް ޖަލްސާގައި އިލްހާމް އަހުމަދު ޕާޓީގެ ވަގުތީ ޗެއަރޕާސަން ކަމުގެ މަގާމަށް ޣަފޫރު ގެ ނަން ހުށައެޅުއްވުމުން، ވަގުތީ ޗެއަރޕާސަން ކަމަށް ޣަފޫރު ހޮވުނީ ގައުމީ މަޖިލީހުގެ ޖަލްސާގައި ބައިވެރިވި 66 މެންބަރުންގެ ތެރެއިން 65 މެންބަރުންގެ ވޯޓާއެކު އެވެ. ޣަފޫރު ވަނީ އޭނާ އެ މަޤާމަށް ހޮވުމުން ވޯޓުދެއްވި މެމްބަރުންނަށް ޝުކުރު އަދާކުރައްވާފަ އެވެ.
ޣަފޫރު އަކީ އަކީ އެމްޑީޕީ ޕީޖީ ގްރޫޕުގެ އެންމެ ގިނަ ދުވަސްވީ މެމްބަރެވެ. އޭނާ އަކީ މަޖިލީހުގައި ވެސް ގިނަ ދުވަހު ޚިދުމަތް ކުރައްވާފައިވާ މެމްބަރެކެވެ. އެމްޑީޕީގެ ޗެއަރޕާސަންގެ މަގާމު ހުސްވީ އެ މަޤާމުގައި ހުންނެވި ކުރީގެ އިކޮނޮމިކް މިނިސްޓަރު ފައްޔާޒު އިސްމާއިލް މަގާމުން އިސްތިއުފާ ދެއްވުމުންނެވެ.
