ޑޯޓްމުންޑް ބަލިކޮށް ސިޓީ ސެމީއަށް

ޔުއެފާ ޗެމްޕިއަންސް ލީގުގެ ކުއާޓާ ފައިނަލުން ބޮރޫޝިއާ ޑޯޓްމުންޑް ކަޓުވާލުމަށްފަހު މުބާރާތުގެ ސެމީ ފައިނަލަށް މެންޗެސްޓާ ސިޓީ ދަތުރުކޮށްފިއެވެ.

ބުދަ ދުވަހުގެރޭ ރަށުން ބޭރުގައި ކުޅުނު ދެވަނަ ލެގުން ސިޓީ ވަނީ ފަހަތުން އަރައި 2-1 ގެ ނަތީޖާއަކުން ޑޯޓްމުންޑް ބަލިކޮށްފައެވެ. އަދި އަމިއްލަ ދަނޑުގައި ކުޅުނު ފުރަތަމަ ލެގުންވެސް ސިޓީ ވަނީ 2-1 ގެ ނަތީޖާއަކުން މޮޅުވެފައެވެ. އެހެންކަމުން ސިޓީއަށް ކުރި ލިބުނީ 4-2 ގެ އެގްރިގޭޓް ނަތީޖާއަކުންނެވެ.

ބުދަ ދުވަހުގެރޭ ކުޅުނު މެޗުގެ ވަރަށް ކުރީކޮޅު ޑޯޓްމުންޑުން ވަނީ ލީޑު ނަގާފައެވެ. އެގޮތުން މެޗުގެ 15 ވަނަ މިނެޓުގައި އޭރިއާ ތެރެއިން ފޮނުވާލި ހަމަލާއަކުން މި ލަނޑު އެ ޓީމަށް ކާމިޔާބުކޮށްދިނީ އުމުރުން 17 އަހަރުގެ ޖޫޑް ބެލިންހަމެވެ. އެއާއެކު އޭނާ ވެފައިވަނީ ޗެމްޕިއަންސް ލީގުގެ ނޮކްއައުޓް ބުރުގައި ލަނޑު ޖެހި ދެވަނައަށް އެންމެ ހަގު ކުޅުންތެރިޔާއަށެވެ.

އޭގެ ފަހުން މި މެޗުގައި ސިޓީން ކުޅުން ރަނގަޅުކުރިއިރު، ދެވަނަ ހާފު ފަށައިގެން 10 ވަނަ މިނެޓުގައި އެ ޓީމުން ވަނީ ނަތީޖާ އެއްވަރުކޮށްފައެވެ. ލިބުނު ޕެނަލްޓީއަކުން މި ލަނޑު އެ ޓީމަށް ކާމިޔާބުކޮށްދިނީ ރިޔާދު މާރޭޒެވެ. މިއީ އޭރިއާ ތެރެއިން ޑޯޓްމުންޑުގެ އެމްރޭ ޗޭންގެ އަތުގައި ބޯޅަ ޖެހުމުން ރެފުރީ ދިން ޕެނަލްޓީއެކެވެ. އަދި މެޗުގެ 75 ވަނަ މިނެޓުގައި އޭރިއާ ބޭރުން ފޮނުވާލި ބާރު ހަމަލާއަކުން ފިލް ފޯޑެން ވަނީ ސިޓީއަށް ލީޑު ނަގައިދީފައެވެ.

މި މޮޅާއެކު ޗެމްޕިއަންސް ލީގުގެ ސެމީއަށް ސިޓީ ދަތުކުރުއިރު، މިއީ އެ ޓީމުގެ ތާރީޚުގައި ސެމީން ޖާގައެއް ލިބުނު ދެވަނަ ފަހަރެވެ. އެގޮތުން މީގެ ކުރިން ސެމީގައި ސިޓީ ވާދަކޮށްފައިވަނީ 2015-2016 ވަނަ އަހަރުގެ ސީޒަނުގައެވެ. އެ ފަހަރު ރެއާލް މެޑްރިޑް އަތުން 1-0 ގެ އެގްރިގޭޓް ނަތީޖާއަކުން ބަލިވެ، ސިޓީ ވަނީ މުބާރާތުން ކަޓާފައެވެ.

ޗެމްޕިއަންސް ލީގުގެ ސެމީގެ މެޗުތައް މި މަހުގެ ފަހުކޮޅު ފަށާއިރު، ސެމީގައި ސިޓީ ބައްދަލުކުރަންޖެހޭނީ ޕީއެސްޖީއާއެވެ.