އަތޮޅުތެރޭގެ ވޯޓު ފޮށިތަކަށް ނުފޫޒުފޯރުވާ ކަމުގެ ޝަކުވާ އެބަލިބޭ: އިދިކޮޅު
12 އެޕްރީލު 2021 | ހޯމަ 14:20މައްސަލަތައް އިލެކްޝަންސް ކޮމިޝަނަށް ފޮނުވާނެ
ލޯކަލް ކައުންސިލް އިންތިޚާބުގެ ވޯޓުލުން
ލޯކަލް ކައުންސިލް އިންތިޚާބާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ އިންތިޚާބުގެ ވޯޓުލުމަށް އަތޮޅުތެރޭގައި ބަހައްޓާފައި ހުރި ބައެެއް ފޮށިތަކުގެ ނަތީޖާ ބަދަލުކުރަން އެމްޑީޕީން މަސައްކަތްކުރާ ކަމަށް އިދިކޮޅު ޕީޕީއެމް/ޕީއެންސީ ކޯލިޝަނުން ތުހުމަތުކޮަށްފިއެވެ.
އިދިކޮޅު ކޯލިޝަނުން ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން ވަކި އަސާސެއް އަދި ހެއްކެއް ދެއްކެވުމަކާނުލައި އިދިކޮޅު ކޯލިޝަނުގެ ތަރުޖަމާނު ހީނާ ވަލީދު ވިދާޅުވީ ސަރުކާރުން ބާރާއި ނުފޫޒު ބޭނުންކޮށްގެން ނަތީޖާ ބަދަލުކުރަން މަސައްކަތްކުރަމުން އަންނަ ކަމަށެވެ. އެކަން ހުއްޓާލަން ގޮވާލާކަމަށް ވެސް ވިދާޅުވިއެވެ.
ހީނާ ވިދާޅުވީ އަތޮޅުތެރެއިން ކުޑަ ފަރަގަކުން ޕީޕީއެމުން ކާމިޔާބުކޮށްފައިވާ ވޯޓު ފޮށިތަކާ ކުޅެން ސަރުކާރު ހިންގާ މައި ޕާޓީން ނުފޫޒު ފޯރުވާކަމުގެ ޝަކުވާ އަތޮޅުތެރެއިން ލިބިފައިވާ ކަމަށެވެ. އެކަންކަން ބަލަމުން އަންނަ ކަމަށާއި އެ މައްސަލަތައް އިލެކްޝަންސް ކޮމިޝަނަށް ފޮނުވަމުން އަންނަ ކަމަށް ވެސް ވިދާޅުވިއެވެ.
ހީނާ ވިދާޅުވީ އެކަންކަމަށް އެޅޭނެ ގާނޫނީ ފިޔަވަޅެއް އޮތްތޯ ބަލައި އެކަން ކުރުމުގެ މަސައްކަތް ވެސް ކުރަމުން އަންނަ ކަމަށެވެ.
އަތޮޅުތެރޭގައި މިފަދަ ކަންކަން ހުރިނަމަ އަދިވެސް އެކަމުގެ ޝަކުވާތައް ހުށަހެޅުމަށް އެދޭ ކަމަށް ވިދާޅުވިއެވެ. މި އިންތިޚާބުގައި ބާތިލް ވޯޓުގެ އަދަދު ވެސް ވަރަށް ގިނަ ކަމަށާއި އެއީ ކަންބޮޑުވާ ކަމަކަށްވާާތީ އެކަންކަން ބަލައި އަލުން އެ ވޯޓުތައް ގުނުމަށް އިލެކްޝަންސް ކޮމިޝަނުގައި އެދިފައިވާކަމަށް ވެސް ހީނާ ވިދާޅުވިއެވެ.
ބޮޑެތި ތުހުމަތުތަކެއް ކުރެއްވިއަސް އެއަށް ބާރުލިބިދެނިވި އެއްވެސް ހެއްކެއް ހީނާ ނުދައްކަވައެވެ.
މި މަހުގެ 10 ވަނަ ދުވަހު ބޭއްވި ލޯކަލް ކައުންސިލް އިންތިޚާބުގެ ވޯޓުލުން ނިމި ނަތީޖާތައް ގުނާފައިވާއިރު އަދި އިންތިހާބުގެ ވަގުތީ ނަތީޖާ އިއުލާނެއް ނުކުރެއެވެ.
