ފެނަކައިގެ ޑީއެމްޑީގެ މަގާމުގައި ހުންނެވި ރުކުމާ މޯލްޑިވްސް ގޭސްގެ ޑީއެމްޑީގެ މަގާމަށް ބަދަލުކޮށްފި
މި ސަރުކާރު އައުމާއެކު އެންމެ ފުރަތަމަ އޭނާ އައްޔަން ކުރެއްވީ ކުނި މެނޭޖު ކުރާ ވެމްކޯގެ ޑީއެމްޑީއަކަށް
މުހައްމަދު އަބްދުލްކަރީމް (ރުކުމާ)
ފެނަކަ ކޯޕަރޭޝަން ލިމިޓެޑުގެ ޑެޕިއުޓީ މެނޭޖިން ޑިރެކްޓަރުގެ މަގާމުގައި ހުންނެވި ރުކުމާ މުހައްމަދު އަބްދުލްކަރީމް މޯލްޑިވްސް ގޭސްގެ ޑެޕިއުޓީ މެނޭޖިން ޑިރެކްޓަރުގެ މަގާމަށް ބަދަލުކޮށްފި އެވެ.
މިއީ މި ސަރުކާރުގައި ރުކުމާ ކުންފުނި ބަދަލު ކުރެއްވި ތިން ވަނަ ފަހަރެވެ. ސަރުކާރު އައުމާއެކު އެންމެ ފުރަތަމަ އޭނާ އައްޔަން ކުރެއްވީ ކުނި މެނޭޖު ކުރާ ވެމްކޯގެ ޑީއެމްޑީއަކަށެވެ. ނަމަވެސް މިދިޔަ އަހަރުގެ އޮގަސްޓް މަހުގެ ފަހުކޮޅު އޭނާ ވަނީ ފެނަކައިގެ ޑީއެމްޑީއަކަށް ބަދަލު ކުރައްވައިފައެވެ.
މޯލްޑިވްސް ގޭސްގެ ޑެޕިއުޓީ މެނޭޖިން ޑިރެކްޓަރުގެ މަގާމަށް އައްޔަނުކުރުމާ ގުޅިގެން ފެނަކައިގެ ޑީއެމްޑީގެ މަގާމުން މުހައްމަދު އަބްދުލްކަރީމް ވަނީ އިންސިއުފާދެއްވައިފައެވެ.
މައުލޫމާތު ލިބިފައިވާ ގޮތުގައި މޯލްޑިވްސް ގޭސްގެ ޑީއެމްޑީގެ މަގާމަށް އޭނާ އައްޔަނުކުރީ ޖޫން މަހުގެ 23 ގައި އެވެ.
މި ބަދަލު ގެނައީ ކޮން ސަބަބަކާ ހުރެ ކަމެއް އަދި ސާފެއް ނުވެ އެވެ. ނަމަވެސް މި ބަދަލު ގެނައިއިރު، މޯލްޑިވް ގޭސްއިން ގޭހުގެ ޝިޕްމަންޓަކަށް ދެއްކި އެޑްވާންސް ފައިސާތައް ވީނުވީއެއް ނޭނގި ގެއްލުނު މައްސަލަ އެންޓި ކޮރަޕްޝަން ކޮމިޝަނާއި އެސްޓީއޯއިން ވެސް ދަނީ ތަހުގީގު ކުރަމުންނެވެ. އެ މައްސަލައިގެ ތަފުސީލެއް ފަހުން ހާމައެއް ނުކުރެ އެވެ.
ސިޔާސީ މައިދާނުން ރުކުމާ ފާހަގަ ވެގެން ދިޔައީ އެމްޑީޕީގެ ތެރެއިންނެވެ. އެގޮތުން އޭނާ ވަނީ އެމްޑީޕީގެ ޓިކެޓުގައި މާލޭ ސިޓީ ކައުންސިލްގެ މެންބަރުކަމާއި ރައްޔިތުންގެ މަޖިލީހުގެ ހެންވޭރު ދެކުނު ދާއިރާގެ މެންބަރުކަން ވެސް ކުރައްވާފައެވެ.
ނިމިދިޔަ އެމްޑީޕީގެ ވެރިކަމުގައި 2019 ވަނަ އަހަރު އޮތް މަޖިލިސް އިންތިޚާބުގައި ވާދަ ކުރަން އެމްޑީޕީގެ ޕްރައިމަރީގައި ރުކުމާ ވާދަ ކުރެއްވެވިއެވެ. ނަމަވެސް އެ ޕްރައިމަރީން އޭނާވީ ނާކާމިޔާބެވެ. ދެން އޭނާ އެ ފަހަރުގެ މަޖިލިސް އިންތިޚާބަށް ނުކުންނެވީ އަމިއްލަ ގޮތުންނެވެ. އެ އިންތިޚާބު ކާމިޔާބު ކުރެއްވީ އެމްޑީޕީގެ ޓިކެޓުގައި ނުކުންނެވި ހުސައިން ޝަހީމް (އަނދުން ހުސައިން) އެވެ.
ފަހުން ރުކުމާ ވަނީ 2021 ވަނަ އަހަރު އޭރު އިދިކޮޅުގައި އޮތް ޕީޕީއެމާ ގުޅިވަޑައިގެންފައެވެ.
