މި ވެރިކަމާއި މެދު ރައީސް ޔާމީން: ފަނޑު ނޫކުލައިން ގެނުވީ ބަލިމަޑުކަމާއި ހައިހޫނުކަން!
ކުރީގެ ރައީސް ޔާމީން ވިދާޅުވީ ޝަކުވާ ނޫން ކަމެއް ދިވެހިރާއްޖޭގައި އުފުލާނެ ޖާގަ މިހާރު ނެތް ކަމަށް
ކުރީގެ ރައީސް އަބްދުﷲ ޔާމީން، ޕީއެންއެފް އިން ބުރާސްފަތި ދުވަހުގެ ރޭ އާޓިފިޝަލް ބީޗްގައި ބޭއްވި "ވޭކް އަޕް" ޖަލްސާގައި ވާހަކަދައްކަވަނީ
ފަނޑު ނޫކުލައިން ރާއްޖެ އަށް ގެނުވީ ބަލިމަޑުކަމާއި ހައިހޫނުކަން ކަމަށް ފާހަގަކުރައްވާ ކުރީގެ ރައީސް އަބްދުﷲ ޔާމީން ރައީސް ޑރ.މުހައްމަދު މުއިއްޒު އާއި ޕީއެންސީ އަށް ވަރަށް ބޮޑަށް ފާޑު ވިދާޅުވެއްޖެ އެވެ.
އެ މަނިކުފާނު މި މޭރުމުން ވާހަކަދައްކަވާފައި ވަނީ ޕީއެންއެފް އިން ބުރާސްފަތި ދުވަހުގެ ރޭ އާޓިފިޝަލް ބީޗްގައި ބޭއްވި "ވޭކް އަޕް" ޖަލްސާގައި ވާހަކަދައްކަވަމުންނެވެ. ޅެން ބައިތަކުން ޕީއެންސީގެ ވެރިކަން ސިފަކޮށްދެއްވަމުން ރައީސް ޔާމީން ވަނީ ކުރިން ފެނުނު ޕީޕީއެމްގެ ވެރިކަމަކީ ބަހާރު މޫސުން ކަމަށް ސިފަކުރައްވާފަ އެވެ.
އެގޮތުން، އޭރު ދިވެހިން ނަލަ ފިނިފެންމަލާއި އަސުރުމާ ކުލައިގެ ޖާދޫ ދެކެފައިވާ ކަމަށް ވެސް އެ މަނިކުފާނު ވިދާޅުވި އެވެ. މި ފަދައިން އެ މަނިކުފާނު ވިދާޅުވީ އެ މަނިކުފާނުގެ އަމިއްލަފުޅު ވެރިކަމަކީ ފޮނި ދުވަސް ވަރެއް ކަމަށް ސިފަކުރައްވާ ވާހަކަދައްކަވަމުންނެވެ.
އެހެންނަމަވެސް އޭރު ލިބުނު ފޮނިކަން ބަޔަކަށް ކަމު ނުދިޔަ ކަމަށް ކުރީގެ ރައީސް ޔާމީން ވަނީ ވިދާޅުވެފަ އެވެ. އަދޮ އޭރުގެ ވެރިކަމުގައި ވެސް ބަޅިނދާއި ކޮކާތައް ފޮނިބޯން އައި ކަމަށް ވެސް އެ ޅެންބައިތުގައި ރައީސް ޔާމީން ވިދާޅުވި އެވެ. މިހެން އެ މަނިކުފާނު ވިދާޅުވީ އެ ވެރިކަމުގައި މަންފާ ހޯދަން ބައެއް އުޅުނު ކަަމަށް ފާހަގަކުރައްވަ އެވެ. އެއަށް ފަހު ދެން އައީ ފަނޑު ނޫކުލައިގެ ވެރިކަމެއް ކަމަށް ރައީސް ޔާމީން ވިދާޅުވި އެވެ.
ފަނޑު ނޫކުލައިން ގެނުވައިފިއޭ ބަލިމަޑުކަމާއި ހައި ހޫނުކަން. ގަޑުބަޑު ނުކޮށް ފައްކާވިއޭ ވައުދާއި ކޮރަޕްޝަން ގައި ގޯޅިކޮށް. މިއީ ފިނިފެންމާ ކުލަ ނައްތާލާފައި ފަނޑު ނޫކުލަ މަޑު ނޫކުލަ، ކުލައިގެ އަސަރު ވެސް ނެތް ކުލަ އައުމުން ވާގޮތް. ސިނަމާލެ ބްރިޖުގައި ފަނޑު ނޫކުލަ ޖެހުމަކުން އެތަން އަދި ރައީސް މުއިއްޒުގެ ތަރިކަ މުދަލަކަށް ނުވެއޭ.ކުރީގެ ރައީސް އަބްދުﷲ ޔާމީން
އިތުރަށް ކުރީގެ ރައީސް ޔާމީން ވިދާޅުވީ ޝަކުވާ ނޫން ކަމެއް ދިވެހިރާއްޖޭގައި އުފުލާނެ ޖާގަ މިހާރު ނެތް ކަމަށެވެ. އަދު އަނދިރި ދައުލަތެއްގެ ފަރާތުން މިހާރު ހިންގަމުންދާ ބޭއިންސާފުގެ ނަތީޖާއަކަށް ވެގެން ދަނީ ދިވެހިރައްޔިތުން ފުނޑިގެން ދިއުން ކަމަށް އެ މަނިކުފާނު ވިދަޅުވި އެވެ. އަދި ވެރިންގެ ޖީބުތައް ފަލަވެގެން މިދަނީ ރިޝްވަތުގެ ފައިސާއިން ކަމަށް އެ މަނިކުފާނު ވިދާޅުވިއެވެ. ހަމަ އެއާއި އެކު ރައްޔިތުންގެ ހާލަތު ދަށަށް ދާ ކަމަށް ރައީސް ޔާމީން ވަނީ ވިދާޅުވެފަ އެވެ.
