އިންތިޚާބުވި ހަތަރު މޭޔަރުންނަށް ރައީސް ތަހުނިޔާ ވިދާޅުވެއްޖެ

ހޮނިހިރު ދުވަހު ބޭއްވި ލޯކަލް ކައުންސިލް އިންތިޚާބު ކާމިޔާބުކުރެއްވި ހަތަރު މޭޔަރުންނަށް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ތަހުނިޔާ ވިދާޅުވެއްޖެއެވެ.

ރައިސް އޮފީހުގެ ތަރުޖަމާނު މަބްރޫކް އަޒީޒް ވިދާޅުވީ، އިންތިޚާބުވެ ވަޑައިގެންނެވި ހުރިހާ މޭޔަރުންނަށް، ރައީސް ފޯނުން ގުޅުއްވިކަމަށެވެ. އަދި ލާމަރުކަޒީ ނިޒާމުގެ ތެރެއިން ތަރައްގީގެ މަޝްރޫއުތައް ހިންގުމުގައި ފުރިހަމަ އެއްބާރުލުން ދެއްވާނެކަމުގެ ޔަޤީންކަން ދެއްވާފައިވާކަމަށެވެ.

އިންތިޚާބުގައި، މާލޭ ސިޓީގެ މޭޔަރުކަން ކާމިޔާބު ކުރައްވާފައިވަނީ އިދިކޮޅު ޕީޕީއެމްގެ ކެންޑިޑޭޓް ޑރ. މުޙައްމަދު މުއިއްޒެވެ. އެކަމަކު ބާކީ ތިން މޭޔަރު ގޮނޑި ކާމިޔާބު ކުރީ ވެރިކަންކުރާ އެމްޑީޕީންނެވެ.

އެގޮތުން، ކުޅުދުއްފުށީގެ ފުރަތަމަ މޭޔަރު ގޮނޑި ކާމިޔާބު ކުރެއްވީ އެމްޑީޕީގެ މުހައްމަދު އާތިފެވެ. އައްޑޫ ސިޓީގެ މޭޔަރުކަން އެމްޑީޕީގެ ކެންޑިޑޭޓް އަލީ ނިޒާރު ކާމިޔާބު ކުރެއްވިއިރު ފުވައްމުލައް ސިޓީގެ މޭޔަރުކަން ކާމިޔާބު ކުރެއްވީ އިސްމާއީލް ރަފީގެވެ.