ގދ. ތިނަދޫ ކައުންސިލަށް ފުރަތަމަ ފަހަރަށް ޕީޕީއެމްގެ މެންބަރުން ހޮވި އަތޮޅު ކައުންސިލް ވެސް ޕީޕީއެމަށް ލިބިފައިވާ ކަމަށް އިލެކްޝަންސް ކޮމިޝަނުގެ ވަގުތީ ނަތީޖާތަކުން ދައްކައިފިއެވެ.

ގދ. ތިނަދޫ ކައުންސިލަށް ފިރިހެން 7 ކެންޑިޑޭޓުން ކުރިމަތިލާފައިވާއިރު ތިން މެންބަރަކު ހޮވުމަށް ނިންމާފައިވެއެވެ. ވަގުތީ ނަތީޖާ ދައްކާގޮތުން މެންބަރު ކަމަށް ހޮވިފައިވަނީ ޕީޕީއެމަށް ނިސްބަތްވާ އަހުމަދު ވަހީދާއި، އެމްޑީޕީއަށް ނިސްބަތްވާ ނަސްރުﷲ އަލީ އަދި ޕީޕީއެމަށް ނިސްބަތްވާ މުހައްމަދު ޒަލީފް އަބްދުﷲއެވެ.

ތިނަދޫ ކައުންސިލަށް އަންހެނުންގެ ތެރެއިން 6 ކެންޑިޑޭޓަކު ކުރިމަތިލާފައިވާއިރު އޭގެތެރެއިން 3 ކެންޑިޑޭޓުން ހޮވުމަށް ނިންމާފައިވެއެވެ. އެގޮތުން އެންމެ ގިނަ އަދަދެއްގެ ވޯޓު ލިބިފައިވަނީ އެމްޑީޕީގެ އައިމިނަތު ނަސީމާއަށެވެ. އޭނާއަށް 1073 ވޯޓު ލިބިފައިވާއިރު ދެވަނައަށް އެންމެ ގިނަ އަދަދެއްގެ ވޯޓު ލިބިފައިވަނީ ޕީޕީއެމްގެ އައިޝަތު ލިއުޝާ ޒުބައިރަށެވެ. ލިބިފައިވަނީ 1003 ވޯޓެވެ. ތިން ވަނައަށް ހޮވިފައިވަނީ 954 ވޯޓާއެކު އެމްޑީޕީގެ އަހުމީމާ އަހުމަދެވެ.

އެރަށު ކައުންސިލްގެ ރައީސް ކަމަށް 3 ކެންޑިޑޭޓުން ވާދަކޮށްފައިވާއިރު ރައީސް ކަމަށް އެންމެ ގިނަ މީހުން ވޯޓު ލާފައިވަނީ އެމްޑީޕީގެ ސައުދު އަލީއަށެވެ. ލިބިފައިވަނީ 1120 ވޯޓެވެ. އެއީ ވޯޓުލީ މީހުންގެ 54.69 އިންސައްތައެވެ. ތިނަދޫ ކައުންސިލަށް މެންބަރުން ހޮވުމަށް ޚާއްސަ ކުރެވިފައިވާ 136 ވޯޓު ފޮއްޓަށް 5389 މީހުންނަށް ވޯޓު ލުމުގެ ހައްގު ލިބިފައިވެއެވެ.

މުޅި ގދ. އަތޮޅަށް ބަލާއިރު އަތޮޅު ކައުންސިލުގެ ރައީސް ކަމަށް 3 ކެންޑިޑޭޓުން ވާދަ ކޮށްފައިވާއިރު އެންމެ ގިނައިން ވޯޓު ލިބިފައިވަނީ ޕީޕީއެމްގެ ހަސަން ފައިހަތު ގުދުރަތުﷲ އަށެވެ. އޭނާއަށް 3716 ވޯޓު ލިބިފައިވާއިރު އެއީ 54.41 އިންސައްތައެވެ.