ޕްރިންސް ފިލިޕް އަވަހާރަވުމާ ގުޅިގެން ރައީސް ސާލިހު ތައުޒިޔާ ވިދާޅުވެއްޖެ
ޕްރިންސް ފިލިޕަށް ނިޝާން އިއްޒުއްދީނުގެ އިއްޒަތުގެ ޝަރަފު 1972 ވަނަ އަހަރު އެރުވިފައިވޭ
ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު- ރައީސް ވަނީ ރާނީގެ އިތުރުން ޝާހީ އާއިލާއަށް ތައުޒިޔާ ވިދާޅުވެފައި
އިނގިރޭސީ ރާނީ އެލިޒަބަތު 2ގެ ފިރިކަލުން ޕްރިންސް ފިލިޕް އަވަހާރަވުމާއި ގުޅިގެން ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ތައުޒިޔާ ވިދާޅުވެއްޖެއެވެ.
ޕްރިންސް ފިލިޕް އަވަހާރަވީއިރު އުމުރުފުޅަކީ 99 އަހަރެވެ. ޝާހީ އާއިލާއާ ހަވާލާދީ ރިޕޯޓުތައް ބުނާގޮތުން ފިލިޕް އަވަހާރަވެފައިވަނީ ހުކުރު ދުވަހުގެ ހެނދުނުގެ ވަގުތެއްގައި ވިންޑްސަރ ގަނޑުވަރުގައެވެ. ޕްރިންސް ފިލިޕް އަވަހާރަވުމާއި ގުޅިގެން ރައީސް ސާލިހު ކުރެއްވި ޓްވީޓެއްގައި ރާނީއާއި ޝާހީ އާއިލާގެ އިތުރުން، އިނގިރޭސިވިލާތުގެ ރައްޔިތުންނަށް ތައުޒިޔާ ވިދާޅުވެފައިވެއެވެ.
އޭގެ އިތުރުން، 1972 ވަނަ އަހަރު ފިލިޕް ރާއްޖެއަށް ކުރެއްވި ޒިޔާރަތުގެ ހަނދާން އައު ކުރައްވައި ރައީސް ވިދާޅުވީ، ފިލިޕަކީ އާންމުންނަށް ޚިދުމަތް ކޮށްދެއްވުމުގައި ވަފާތެރި ލާމަސީލު ނަމޫނާއެއް ކަމަށެވެ. ޕްރިންސް ފިލިޕަކީ ދިވެހިރާއްޖެއިން މެހުމާނުންނަށް އަރުވާ އެންމެ މަތީ ޝަރަފުކަމަށްވާ ނިޝާން އިއްޒުއްދީނުގެ އިއްޒަތުގެ ޝަރަފު 1972 ވަނަ އަހަރުގެ މާޗް މަހު އެރުވިފައިވާ އިއްޒަތްތެރިއެކެވެ.
ޕްރިންސް ފިލިޕް އަވަހާރަވުމާއި ގުޅިގެން ގިނަ ބަޔަކު ދަނީ ޝާހީ އާއިލާއަށް ތައުޒިޔާ ފޮނުވަމުންނެވެ.
މިއަހަރުގެ ކުރީކޮޅުވެސް ޕްރިންސް ފިލިޕްގެ ހާލުކޮޅު ދެރަވެ، ހޮސްޕިޓަލުގައި އެޑްމިޓްކޮށްގެން ފަރުވާދޭން ޖެހިފައިވެއެވެ. އޭރު މަހެއް ވަންދެން އެޑްމިޓްކޮށްގެން ފަރުވާދީފައިވެއެވެ. ޕްރިންސް ފިލިޕްގެ ހަޔާތުގެ ބޮޑުބައި ހޭދަ ކުރެއްވީ ދުޅަހެޔޮ ސިއްހަތެއްގައެވެ. ނަމަވެސް 2011 ވަނަ އަހަރު ހިތުގެ ނާރެއް ބްލޮކްވެގެން ފަރުވާ ހޯއްދަވާފައިވާއިރު 2012 ވަނަ އަހަރު ބްލެޑަރގެ އިންފެކްޝަނަކަށް ފަރުވާ ހޯއްދަވާފައި ވެއެވެ.
ޕްރިންސް ފިލިޕާއި ރާނީ އެލިޒަބަތު ކައިވެނިބައްލަވައިގަތީ 1947 ވަނަ އަހަރުއެވެ. އެއީ އެކަމަނާ ރާނީގެ މަގާމާ ހަވާލުވެވަޑައިގަތުމުގެ 5 އަހަރު ކުރިންނެވެ. އަވަހާރަވިއިރު ޕްރިންސް ފިލިޕާއި ރާނީގެ އެލިޒަބަތުގެ 4 ބޭފުޅުން ތިއްބަވައެވެ.
