ހިޔާ މަޝްރޫއުގެ ފްލެޓުތަކަށް ޑައުންޕޭމެންޓު ނުދައްކާ ވެސް ވަދެވޭނެ - މިނިސްޓަރު އަސްލަމް
ޑައުންޕޭމެންޓެއް ނުދައްކާ 25 އަހަރު ދުވަހަށް ބަހާލައިގެން މަހަކަށް 7500 ރުފިޔާ ދެއްކޭނެ
ނޫސްވެރިންގެ ބައްދަލުވުމުގައި މިނިސްޓަރު އަސްލަމް ވާހަކަދައްކަވަނީ
ހިޔާ މަޝްރޫއުގެ ފްލެޓުތަކަށް ޑައުންޕޭމެންޓު ނުދައްކާ ވެސް ވަދެވޭނެ ކަމަށް ހައުސިން މިނިސްޓަރު މުަހައްމަދު އަސްލަމް ވިދާޅުވެއްޖެއެވެ.
ބުދަ ދުވަހު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ފުލެޓްތަކާއި ގުޅޭ މައުލޫމާތު ހިއްސާ ކުރައްވަމުން މިނިސްޓަރު އަސްލަމް ވިދާޅުވީ ޑައުންޕޭމެންޓް ނުދައްކާ ފަރާތްތަކަށް ޕޭމަންޓު ނުދައްކާ ކުރިއަށް ދިއުމުގެ ފުރުސަތު އެބައޮތް ކަމަށެވެ. އެގޮތުން ޑައުންޕޭމެންޓެއް ނުދައްކާ 25 އަހަރު ދުވަހަށް ބަހާލައިގެން މަހަކަށް 7500 ރުފިޔާ ދެއްކޭނެ ކަމަށް މިނިސްޓަރު އަސްލަމް ވިދާޅުވިއެވެ. އަދި ވިދާޅުވީ ޑައުންޕޭމެންޓަށް ދައްކައިގެން ކުރިއަށް ދިއުމަށް ބޭނުންވާ މީހުންނަށް ވެސް އެފުރުސަތު އެބައޮތް ކަމަށެވެ.
މިނިސްޓަރު އަސްލަމް ވިދާޅުވީ ޑައުންޕޭމަންޓު ދައްކައިގެން ކުރިއަށްދާ މީހުންނަށް މަހަކު ދައްކަން ޖެހޭ ކުލި ކުޑަވާނެ ކަމަށެވެ.
ހިޔާ ފްލެޓުގެ އަސްލު އަގާ އަޅާބަލާއިރު ވަރަށް ކުޑަ އަގެއް ސަރުކާރުން ކަނޑައަޅާފައިވާކަން ފާހަގަކުރައްވައި މިނިސްޓަރު އަސްލަމް ވިދާޅުވީ ހިޔާ ފްލެޓުތައް އެޅުމަށް ނަގާފައިވާ ލޯނަކީ 3.2 ޕަސެންޓް އާއި ލައިބޯގައި 10 އަހަރަށް، އަދި ދެ އަހަރުގެ ގްރޭސް ޕީރިއަޑާއެކު ދައްކަން ޖެހޭ ލޯނެއް ކަމަށެވެ.
މިނިސްޓަރު އަސްލަމް ވިދާޅުވީ ފްލެޓުތަކުގެ ގުރުއަތުނެގުމަށްފަހު، ފްލެޓު ލިބޭ މީހުންނާއެކު އެޗްޑީސީ އިން އެއްބަސްވުން އެކުލަވާލާނެ ކަމަށެވެ. މިނިސްޓަރު އަސްލަމް ވިދާޅުވީ އޭގެ ފަހުން އެތަންތަނަށް ވަނުމަށް ކުރަންޖެހޭ ކަންތައް ކުރަން ތިން މަސް ދޭނެ ކަމަށާއި، އެތިން މަސް ދުވަހުގެ ތެރޭގައި ފްލެޓަށް ވަނުމަށްޓަކައި އެކުރަން ޖެހޭ ކަންކަން ކޮށް ނިމޭނެ ކަމަށް ގަބޫލުކުރާ ކަމަށެވެ.
