އާރުޓީއެލް އަކީ ރައީސް ޞާލިޙުގެ ޤައުމީ ޕްރޮޖެކްޓެއް، ކުލަ ބަދަލުކޮށްގެން ހަގީގަތް ބަދަލެއް ނުވާނެ: އަސްލަމް
29 ޖުލައި 2025 | އަންގާރަ 06:42ލޯގޯގައި ހިމެނޭ ރީނދޫ ކުލައިން ބުނެދެނީ އެއްގަމު ދަތުރު ފަތުރު ކުރުން, އަދި ލޯގޯގައި ހިމެނޭ މަޑު ނޫ ކުލައިން ރަމްޒު ކޮށްދެނީ ވައިގެ ދަތުރު ފަތުރު، އަދި ގަދަ ނޫ ކުލައިން ރަމްޒު ކޮށްދެނީ ކަނޑުގެ ދަތުރު ފަތުރު.
ކުރީގެ ރައީސް އިބްރާހީމް މުޙައްމަދު ޞާލިޙު އަދި ކުރީގެ މިނިސްޓަރު މުޙައްމަދު އަސްލަމް
ރާއްޖެ ޓްރާންސްޕޯޓްސް ލިންކް (އާރުޓީއެލް) ފެރީގެ ނިޒާމަކީ ކުރީގެ ރައީސް އިބްރާހީމް މުޙައްމަދު ޞާލިޙުގެ ސަރުކާރުގައި ފެށި ޤައުމީ ޕްރޮޖެކްޓެއް ކަމަށާއި، އާރުޓީއެލްގެ ލޯގޯގެ ކުލަ ބަދަލުކޮށްގެން ހަގީގަތް ބަދަލު ނުވާނެ ކަމަށް ކުރީގެ ހައުސިންގ، ޕްލޭނިންގ އެންޑް އިނފްރާސްޓްރަކްޗަރ މިނިސްޓަރު މުޙައްމަދު އަސްލަމް ވިދާޅުވެއްޖެ އެވެ.
އަސްލަމް މިހެން ވިދާޅުވެފައި ވަނީ، ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒުގެ ސަރުކާރުން އާރުޓީއެލް ފެރީގެ ލޯގޯގެ ކުލަ ބަދަލު ކޮށްފައި ވަނިކޮށެވެ. އެ ލޯގޯގައި ހުރި ރީނދޫ ކުލައިގެ ބަދަލުގައި މި ސަރުކާރުން ވަނީ އަޅި ކުލަ ބޭނުން ކުރަން ފަށައިފަ އެވެ. އެކަމާ ގުޅިގެން ގިނަ ބަޔަކު އަންނަނީ ސަރުކާރަށް ވަރަށް ބޮޑަށް ފާޑު ވެސް ކިޔަމުންނެވެ.
އެކަމާ ގުޅިގެން އަސްލަމް އޭނާގެ ރަސްމީ އެކްސް އެކައުންޓުގައި ކުރެއްވި ޕޯސްޓެއްގައި ވިދާޅުވެފައި ވަނީ، އާރުޓީއެލް ފެރީގެ ނިޒާމަކީ ރައީސް ޞާލިޙުގެ ސަރުކާރުން ޤައުމީ ޕްރޮޖެކްޓެއްގެ ގޮތުގައި ފެށި މަސައްކަތެއް ކަމަށެވެ. މިއަދު އެ ލޯގޯގެ ކުލަ ބަދަލު ކުރި ނަމަވެސް، އެކަމުގެ ހަގީގަތް ބަދަލު ނުވާނެ ކަމަށް އަސްލަމް ވަނީ ވިދާޅުވެފަ އެވެ. އަސަލަމް ވިދާޅުވެފައި ވަނީ ކަނޑުތަކެކޭ އެއް ފަދައިން، އެ ލޯގޯގެ އަސްލު ކުލަ އަކީ ބްރޭންޑެއް ކަމަށެވެ.
މި ސަރުކާރުން ވަނީ ބ.އަތޮޅުގައި އާރުޓީއެލް ފެރީގެ ޚިދުމަތް ފަށާފައިވާ ކަމަށް އިއުލާން ކޮށްފަ އެވެ. އެކި އެކި މަސްދަރުތަކުން މައުލޫމާތު ލިބިފައިވާ ގޮތުގައި އެ އަތޮޅުގައި އާރުޓީއެލް ފެރީގެ ޚިދުމަތް ފަށާފައި ވަނީ އެހެން ޒޯނެއްގެ ދެ ލޯންޗު ގެންގޮސްގެންނެވެ.
އަސްލަމް ކުރެއްވި އިތުރު ޕޯސްޓެއްގައި ވަނީ އާރުޓީއެލް ލޯގޯގައި ހިމެނޭ ކުލަތަކުން ބުނެދޭ މެސެޖު ވެސް ތަފްސީލު ކޮށްދެއްވައިފަ އެވެ. އެގޮތުން އެ ލޯގޯގައި ހިމެނޭ ރީނދޫ ކުލައިން ބުނެދެނީ އެއްގަމު ދަތުރު ފަތުރު ކުރުން ކަމަށް އަސްލަމް ވިދާޅުވި އެވެ. ލޯގޯގައި ހިމެނޭ މަޑު ނޫ ކުލައިން ރަމްޒު ކޮށްދެނީ ވައިގެ ދަތުރު ފަތުރު ކަަމަށާއި، ގަދަ ނޫ ކުލައިން ރަމްޒު ކޮށްދެނީ ކަނޑުގެ ދަތުރު ފަތުރު ކަމަށް އަސަލަމް ވިދާޅުވި އެވެ.
އެ ޕޯސްޓުގައި އިތުރަށް އަސްލަމް ވިދާޅުވެފައި ވަނީ، އާރުޓީއެލް ލޯގޯގައިވާ ރޮނގުތަކާއި ކުލަ ތަކަކީ އެއްވެސް މާނައެއް ނެތް ރޮނގު އަދި ކުލަ ތަކެއް ނޫން ކަމަށެވެ.
ރައީސް ޞާލިޙުގެ ސަރުކާރުން ވަނީ އާރުޓީއެލް ފެރީގެ ޚިދުމަތް ތައާރަފުކޮށް، ބައެއް ސަރަހައްދުތަކުގައި އެ ޚިދުމަތް ދޭން ފަށައިފަ އެވެ. އެ ޚިދުމަތަކީ ގިނަ ބަޔަކަށް ބޮޑު ލުއި ފަސޭހަ އަކަށްވެފައިވާއިރު، އެއީ ގިނަ ބަޔަކު ބަލައިގެންފައިވާ ޚިދުމަތެކެވެ.
ނަމަވެސް މި ސަރުކާރު އައި ފަހުން، ކުރިން ޚިދުމަތް ދެމުން އައި އަތޮޅު ތަކުގައި ވެސް އެ ޚިދުމަތް ރަނގަޅަށް ނުލިބޭ ކަމުގެ ޝަކުވާ ވަނީ ބޮޑުވެފަ އެވެ. ދަތުރު ކުރުމަށް ބޭނުން ކުރާ ބައެއް ލޯންޗުތައް މައްސަލަ ޖެހުމުން، އެ ލޯންޗުތައް މަރާމާތު ކުރާނެ ގޮތެއް ވެސް ސަރުކާރަށް ނުހޯދި، އެ ޚިދުމަތް ރަނގަޅަށް ނުލިބި ގިނަ ބައެއްގެ ކަންބޮޑުވުން ފާޅު ކުރަން ފެށި އެވެ.
