ރާއްްޖެއިން ބޭރުން ވެކްސިން ޖެހި މީހުންނަށް ރާއްޖޭގައި ދެވަނަ ޑޯޒު ޖެހޭނެ އިންތިޒާމު ހަމަޖައްސައިދީފި
ޖެހޭނީ ރާއްޖޭގައި މިހާރު ބޭނުންކުރަން ހުއްދަ ދީފައިވާ ވެކްސިންތައް ކަމަށްވާ ކޮވިޝީލްޑް ފައިޒާ އަދި ސިނޮފާމް ވެކްސިންގެ ފުރަތަމަ ޑޯޒު ބޭރުން ޖެހި މީހުންނަށް
ކޮވިޝީލްޑް ވެކްސިން
ރާއްޖޭގައި ދިރިއުޅޭ މީހުންގެ ތެރެއިން ރާއްޖެއިން ބޭރުން ވެކްސިންގެ ފުރަތަމަ ޑޯޒް ޖެހި މީހުންނަށް ދެވަނަ ޑޯޒު ރާއްޖޭގައި ޖެހޭނެ އިންތިޒާމު ހެލްތު ޕްރޮޓެކްޝަން އެޖެންސީ އެޗްޕީއޭއިން ހަމަޖައްސައިދީފިއެވެ.
އެޗްޕީއޭއިން އަންގާރަ ދުވަހުގެ ރޭ ކުރި އިއުލާނެއްގައި ބުނީ ރާއްޖޭގައި ދިރިއުޅޭ މީހުންގެ ތެރެއިން ރާއްޖެއިން ބޭރުން ވެކްސިން ޖަހާފައިވާ މީހުންނަށް ރާއްޖޭގައި ވެކްސިން ޖެހޭނެ އިންތިޒާމު ހަމަޖައްސާދީފައިވާ ކަމަށެވެ. އެގޮތަށް ޖެހޭނީ ރާއްޖޭގައި މިހާރު ބޭނުންކުރަން ހުއްދަ ދީފައިވާ ވެކްސިންތައް ކަމަށްވާ ކޮވިޝީލްޑް ފައިޒާ އަދި ސިނޮފާމް ވެކްސިންގެ ފުރަތަމަ ޑޯޒު ބޭރުން ޖެހި މީހުންނަށް ކަމަށް ވެސް ބުނެފައިވެއެވެ.
އެޗްޕީއޭއިން ބުނީ ވެކްސިން ގެ ދެވަނަ ޑޯޒު ޖެހުމަށް، ފުރަތަމަ ޑޯޒު ޖަހާފައިވާ ތާރީހު އެނގޭނެހެން ވެކްސިން ޖެހި ލިޔުމާއި، އައިޑީ ކާޑު ނުވަތަ ޕާސްޕޯޓުގެ ކޮޕީއެއް އަދި ފޯނު ނަމްބަރު vaccine@health.gov.mv ފޮނުވުމުން އެކަމަށް އެޕޮއިންޓްމަންޓް ހަމަޖައްސާނެ ކަމަށެވެ.
ރާއްޖޭގައި ވެކްސިން ޖެހުމުގެ ގައުމީ ކެމްޕޭން މިދިޔަ ފެބްރުއަރީ މަހުގެ އެއްވަނަ ދުވަހު ފެށި އިރު، އެކަން ފަަށާފައި ވަނީ ރާއްޖޭގައި ދިރިއުޅޭ ދިވެހިންނާއި ބިދޭސީންނަށް ވެސް އެއްވެސް ތަފާތުކުރުމެއް ނެތިއެވެ. އެގޮތުން ބިދޭސީންނަށް ވެސް ހިލޭ ވެކްސިން ޖަހައިދޭއިރު މިހާތަނަށް ރާއްޖެއިން ވެކްސިން ޖެހި މީހުންގެ ޖުމްލަ އަދަދު ވަނީ 255،000ށް އަރާފައެވެ.
ވެކްސިންގެ ދެވަނަ ޑޯޒު ޖެހުން މިދިޔަ ހޮނިހިރު ދުވަހު ފަށާފައިވާއިރު ދެވަނަ ޑޯޒު ޖެހި މީހުންގެ އަދަދު ވެސް ވަނީ 7،000ން މައްޗަށް ގޮސްފައެވެ. ރާއްޖޭގައި މިވަގުތު އާންމު ހާލަތުގައި ބޭނުންކުރަމުން އަންނަނީ ކޮވިޝީލްޑް ވެކްސިން އާއި، ޗައިނާގެ ސިނޮފާމް ވެކްސިންއެވެ. އޭގެ ތެރެއިން މިހާރު ފުރަތަމަ ޑޯޒު ޖަހަނީ ހަމައެކަނި ސިނޮފާމް ވެކްސިންގެއެވެ. އަދި ދެ ލައްކަ އަށް ވުރެ ގިނަ މީހުން ކޮވިޝީލްޑް ގެ ފުރަތަމަ ޑޯޒު ޖެހިފަހުން އެ ވެކްސިންގެ ފުރަތަމަ ޑޯޒު ޖެހުން ހުއްޓާލީ މިދިޔަ މަހު 15ގައެވެ.
ރާއްޖޭގައި ފައިޒާ ވެކްސިން ބޭނުންކުރުމަށް ވެސް ހުއްދަ ދީފައިވާއިރު އެ ވެކްސިން ޖަހަނީ ހަމައެކަނި ވަކި ހާއްސަ ހާލަތްތަކެއްގައެވެ. އެގޮތުން ވަކި ބަލިތަކެއް ހުންނަ އަދި ވަކި ކަހަލަ ބަލިތަކަކަށް ބޭސްކޮށްފައިވާ މީހުންނާއި އުމުރުން 17 އަހަރާއި 16 އަހަރުގެ ކުދިންނަށް ވެސް ފައިޒާ ވެކްސިން ޖަހަން ވަނީ ފަށާފައެވެ.
