ފެލިވަރުގައި އެކަނި 345 ޕޮޒިޓިވް ކޭސް

އަތޮޅުތެރޭގެ ކޮވިޑް-19 ކްލަސްޓަރ ތަކުގެ ތެރެއިން ޅ. ފެލިވަރުން އެކަނި 345 ކޭސް ފެނިފައިވާ ކަމަށް އެޗްޕީއޭއިން ބުނެފިއެވެ.

އެޗްޕީއޭގެ ނޫސްވެރިންގެ ބައްދަލުވުމުގައި ވާހަކަދައްކަވަމުން އަތޮޅު ކްލާސްޓަރ ގެ ހެޑެއްގެ ގޮތުގައި މަސައްކަތްކުރައްވާ އަބްދުﷲ މައުރޫފް ވިދާޅުވީ އަތޮޅުތެރެއިން މިހާރު ވަރަށް ގިނަ ކޭސްތައް ފެންނަމުން އަންނަ އިރު މިހާރު ވެސް 17 ރަށެއް މޮނިޓަރިންގައި އެބައޮތް ކަމަށެވެ. އޭގެ ތެރެއިން އެންމެ ގިނަ ކޭސްތައް ރިޕޯޓުކޮށްފައި ވަނީ ޅ. ފެލިވަރުންނާއި، ޅ. ނައިފަރު އަދި ކ. ހުރާގެ އިތުރަށް ޅ. ހިންނަވަރާއި ކ. ދިއްފުށިން ކަމަށް ވިދާޅުވިއެވެ.

އޭގެ ތެރެއިން އެންމެ ގިނަ ކޭސްތައް ރިޕޯޓުކޮށްފައި ވަނީ ޅ. ފެލިވަރުން ކަމަށާއި އެ ރަށުން މިހާތަނަށް 345 ކޭސް ރިޕޯޓުކޮށްފައިވާ ކަމަށް ވިދާޅުވިއެވެ. އަދި އެ ކޭސްތަކުގެ 550 ކޮންޓެކްޓުން މިހާތަނަށް ހޯދިފައިވާ ކަމަށާއި އެ ކޭސްތަކާ ގުޅިގެން 750 ސާމްޕަލް ވެސް އެ ރަށުން ނަގާފައިވާ ކަމަށް ވިދާޅުވިއެވެ.

އޭނާ ވިދާޅުވީ ޅ. ނައިފަރުގައި 179 އެކްޓިވް ކޭސް މިހާތަނަށް ރިޕޯޓުކޮށްފައިވާ ކަމަށާއި، އޭގެ ކޮންޓެކްޓުންގެ ގޮތުގައި 245 މީހުން ފެނިފައިވާ ކަމަށެވެ. އަދި އެ ކޭސް އާ ގުޅިގެން 1260 ސާމްޕަލް ނަގާފައިވާ ކަމަށް ވެސް ވިދާޅުވިއެވެ. އަދި ތިން ވަނަ އަށް އެންމެ ގިނަ މީހުން ޕޮޒިޓިވްވީ ކ. ހުރާއިން ކަމަށާއި އެ ރަށުން މިހާތަނަށް 138 ކޭސް ފެނިފައިވާ ކަމަށާއި، ކޮންޓެކްޓުންގެ ގޮތުގައި 250 މީހެއް ފެނިފައިވާއިރު 572 ސާމްޕަލް ނަގާފައިވަ ކަމަށް ވެސް ވިދާޅުވިއެވެ.

ޅ. ފެލިވަރުން އެންމެ ފުރަތަމަ ކޭސްއެއް ރިޕޯޓުކޮށްފައި ވަނީ މިދިޔަ މަހުގެ 27 ވަނަ ދުވަހުއެވެ. އޭރުން ފެށިގެން އެ ރަށް މޮނިޓަރިންގައި އޮންނަ އިރު އެރަށުން ލިބެން ޖެހޭ ހިދުމަތްތަކަށް ބުރު ނާރުވާ ކުރިއަށްގެންދެވޭތޯ އަންނަނީ މަސައްކަތްކުރަމުންނެވެ. ޅ. އަތޮޅުން ކޮވިޑް-19ގެ ބޮޑު ކްލަސްޓަރ އެއް ފެނިފައިވާއިރު، އޭގެ ކޭސްތައް ހދ. އަތޮޅާއި ރ. އަތޮޅުން ވެސް ފެނިފައިވެއެވެ.

ރާއްޖެއަށް ކޮވިޑް-19ގެ ތިން ވަނަ ރާޅެއް ބިންދާލާފައިވާއިރު މާލެ ސަރަހައްދުން ވެސް ކޭސްތަކުގެ އަދަދު އިތުރުވެ ހަރުކަށި ފިޔަވަޅުތަކެއް އަޅައި އެކަން ކޮންޓްރޯލްވުމުން މިހާރު ވަނީ ފިޔަވަޅުތަކަށް ލުއި ދީފައެވެ. އެކަމަކު ފާއިތުވެދިޔަ ދެ ހަފްތާއެއްހާ ދުވަސް ތެރޭގައި އަތޮޅުތެރެއިން ފެންނަ ކޮވިޑް-19 ކޭސްތަކުގެ އަދަދުތައް ވަރަށް ބޮޑަށް އިތުރުވެފައިވާތީ ކޭސްތަކުގެ ޖުމްލަ އަދަދަށް މާބޮޑު ބަދަލެއް އައިސްފައެއް ނުވެއެވެ.