ރާއްޖޭގައި ހިމަބިހި ޖެހިގެން ޒުވާނަކު ނިޔާވެއްޖެ

ރާއްޖޭގައި ހިމަބިހި ޖެހިގެން ޒުވާނެއް ނިޔާވެއްޖެ އެވެ.

އިތުބާރު ހުރި ފަރާތަކުން މައުލޫމާތު ދެމުން ބުނީ، ހިމަބިއްސަށް ފަރުވާ ދެމުން ދަނިކޮށް ނިޔާވީ 24 އަހަރުގެ އިބްރާހިމް ދިޔާޝް ރަޝީދު ކަމަށެވެ. ގދ.ފިޔޯރީއަށް އުފަން މި ޒުވާނާ ނިޔާވީ ހޯމަ ދުވަހުގެ ވަގުތެއްގަ އެވެ.

އެ ޒުވާނަށް ފަރުވާ ދެމުންދިޔައީ ހުޅުމާލޭ ހޮސްޕިޓަލުގައި ކަމަށެވެ.

ރާއްޖޭގެ ހިމަބިހި ހާލަތުގެ ސީރިއަސްކަން ހެލްތް މިނިސްޓްރީ އަދި ހެލްތް ޕްރޮޓެކްޝަން އެޖެންސީ (އެޗްޕީއޭ)އިން ހާމަ ނުކުރާ ކަމަށް ގިނަ ބަޔަކު ދަނީ ތުހުމަތު ކުރަމުންނެވެ. އަދި 8 ޖުލައި 2026 ވީ ބުދަ ދުވަހު ރައްޔިތުންގެ މަޖިލީހުގެ ޖަލްސާގައި ރާއްޖޭގައި ހިމަބިހި ނުވަތަ މީސަލްސް ފެތުރެމުންދާތީ، އެ ބައްޔަށް ޓެސްޓުކުރަން ބޭނުންވާ ކިޓުތައް ރާއްޖެއިން ހުސްވެފައިވާ ކަމަށް ދެކެވޭ ވާހަކަތަކާ ގުޅޭގޮތުން މަޖިލީހުގައި ކުރިމަތިކުރި ސުވާލަށް ހެލްތް މިނިސްޓަރު ގީލާ އަލީ ޖަވާބެއް ނުދެއްވައި އެ ސުވާލުން ވަނީ ރެކިވަޑައިގެންފަ އެވެ. 

ހިމަބިއްސާ ގުޅޭގޮތުން އެޗްޕީއޭއިން އެންމެފަހުން އާއްމުކޮށްފައިވާ ތަފާސްހިސާބުތަކަށް ބަލާއިރު، މިދިޔަ ހަފްތާގެ އަންގާރަ ދުވަހާ ހަމައަށް 121 މީހުންނަށް ބަލި ޖެހިފައިވެ އެވެ. އަދި އޭޝިޔާ ސަރަހައްދުން އެންމެ ގަދައަށް ހިމަބިހި ފެތުރޭ ގައުމުތަކުގެ ތެރޭގައި ރާއްޖެ ހިމެނިފައިވާ ކަމަށް ކުޑަކުދިންގެ ޚާއްސަ ޑރ. އަހުމަދު ފައިސަލް ވިދާޅުވެފައިވެ އެވެ. 

ރާއްޖެ އަކީ 2017 ވަނަ އަހަރު ދުނިޔޭގެ ސިއްހަތު ޖަމިއްޔާ (ޑަބްލިއު.އެޗް.އޯ) އިން ހިމަބިހި ނައްތާލެވިފައިވާ ގައުމެއްގެ ގޮތުގައި ކަނޑައަޅާފައިވާ ގައުމެކެވެ. ނަމަވެސް 2023 ވަނަ އަހަރު މި ބަލީގެ ބައެއް ކޭސްތައް ފެނުމަށްފަހު، މިއަހަރުގެ މިދިޔަ މަހުގެ ކުރީކޮޅުން ފެށިގެން ބަލި އަލުން ފެނި، ބަލި ޖެހޭ މީހުންގެ އަދަދު ދަނީ އިތުރުވަމުންނެވެ. އަދި ޖޫން މަހުގެ ތެރޭގައި ހެލްތް ޕްރޮޓެކްޝަން އެޖެންސީ (އެޗްޕީއޭ)އިން ވަނީ ވެކްސިން ދިނުމުގެ ޚާއްސަ ޕްރޮގްރާމެއް ފަށާފަ އެވެ.